ភ្ជាប់​ទៅ​គេហទំព័រ​ទាក់ទង

លោក ត្រាំ ថ្លែង​អំណរគុណ​ដល់​កងកម្លាំង​យោធា​និង​កោតសរសើរ​ពី​សមិទ្ធផល​របស់​ខ្លួន


ប្រធានាធិបតី​សហរដ្ឋអាមេរិក​ Donald Trump រៀបចំ​សាំងវិច​សម្រាប់​ទាហាន​ឆ្មាំសហរដ្ឋអាមេរិក​នៅ​ស្ថានីយ៍ Lake Worth Inlet Station ទីក្រុង​ Riviera Beach រដ្ឋ Florida នៅ​ថ្ងៃ Thanksgiving កាលពី​ថ្ងៃទី​២៣ វិច្ឆិកា ២០១៧។

លោក​ប្រធានាធិបតី​អាមេរិក ដូណាល់ ត្រាំ បាន​កោត​សរសើរ​កងកម្លាំង​អាមេរិក​កាល​ពី​ថ្ងៃ​ព្រហស្បតិ៍ ហើយ​បាន​ថ្លែង​អំណរគុណ​ដល់​ពួកគេ​សម្រាប់​ការ​បំពេញ​ការងារ​របស់​ពួកគេ ខណៈ​ដែល​គូសបញ្ជាក់​ថា ​នេះ​គឺ​ជា​អ្វី​ដែល​លោក​មើលឃើញថា​ជា​សមិទ្ធផល​ផ្ទាល់​ខ្លួន​របស់​លោក​ក្នុង​នាម​ជា​ប្រធានាធិបតី នៅ​ក្នុង​សារ​មួយ​ទៅ​កាន់​កងទ័ព​ទាំងអស់​នៅ​ជុំវិញ​ពិភពលោក ​ក្នុង​ទិវា​ថ្លែង​អំណរគុណ ឬ​ជា​ភាសា​អង់គ្លេស​ហៅ​ថា Thanksgiving Day។

លោក​ ត្រាំ បាន​ថ្លែង​នៅ​ក្នុង​សុន្ទនា​តាម​វីដេអូ​ថា «វា​គឺ​ជា​កិត្តិយស​ណាស់​ដែល​បាន​និយាយ​ជាមួយ​អ្នក និង​អរគុណ​ដល់​ព្រះជាម្ចាស់​ដែល​បាន​ប្រទាន​សេរីភាព​និង​វីរជន​ដែល​មាន​ភាពក្លាហាន​ក្នុង​ការការពារ​យើង​ទាំងអស់គ្នា​និង​ការពារ​សេរីភាព‍»។​

លោក​ប្រធានាធិបតី ដែល​កំពុង​តែ​ចំណាយ​ពេល​វេលា​នៅ​ចុង​សប្តាហ៍​នេះ​នៅ​ឯ​រមណីយដ្ឋាន​ឯកជន Mar-a-Lago របស់​លោក​ក្នុង​រដ្ឋ Florida ក៏លើក​សរសើរ​អំពី​អ្វី​ដែល​លោក​មើល​ឃើញ​ថា​ជា​ការ​រីកចម្រើន​ខាង​យោធា​អាមេរិក​ក្នុង​ពេល​ថ្មីៗ​នេះ​ ចំពោះ​ការ​បន្ថែម​កងកម្លាំង​យោធា​អាមេរិក​ទៅ​ក្នុង​ប្រទេស​អ៊ីរ៉ាក់​និង​អាហ្វហ្គានីស្ថាន‍។ ​លោក​ ត្រាំ បាន​មាន​ប្រសាសន៍​ដោយ​សំដៅ​ទៅ​លើ​ការ​សម្រេច​ចិត្ត​របស់​លោក​ក្នុង​ការ​បង្កើន​សង្គ្រាម​អាមេរិក​នៅ​ក្នុង​ប្រទេស​អាហ្វហ្គានីស្ថាន​ថា «យើង​មិន​មែន​ប្រយុទ្ធ​លំៗ​ទៀត​ទេ។ យើង​ប្រយុទ្ធ​ដើម្បី​យក​ឈ្នះ។ ហើយ​អ្នក​ទាំងអស់​គ្នា​ពិត​ជា​បាន​ជោគជ័យ​យ៉ាង​ច្រើន​កាល​ពី​៣​ឬ៤​ខែ​មុន​នេះ ដែល​ជា​ជ័យជម្នះ​មិន​ធ្លាប់​ឃើញ​មាន​ពី​មុន​មក‍»៕

XS
SM
MD
LG