លោកអនុប្រធានាធិបតី Mike Pence បានមានប្រសាសន៍នៅក្នុងជំនួបមួយនៅឯសេតវិមានកាលពីថ្ងៃអង្គារជាមួយពួកអ្នកចាត់ចែងកិច្ចការប្រតិបត្តិនៃក្រុមហ៊ុនធានារ៉ាប់រងការថែទាំសុខភាពសហរដ្ឋអាមេរិកថា ក្រុមហ៊ុនទាំងនេះនឹងបង់សោហ៊ុយដល់ការធ្វើតេស្តរកមេរោគវីរុសកូរ៉ូណា។
លោក Pence បានមានប្រសាសន៍ថា «ក្រុមហ៊ុនធានារ៉ាប់រងការថែទាំសុខភាពទាំងអស់នៅទីនេះនៅថ្ងៃនេះឬនៅមុនថ្ងៃនេះបានយល់ព្រមមិនយកប្រាក់ដែលពួកសមាជិកត្រូវបង់ទាំងអស់ក្នុងការធ្វើតេស្ត និងបន្ថែមការព្យាបាលជំងឺនេះក្នុងផែនការផ្តល់អត្ថប្រយោជន៍ទាំងអស់របស់ពួកគេ»។
លោក Pence បានមានប្រសាសន៍បន្តថា ក្រុមហ៊ុនទាំងនេះក៏នឹងបង់សោហ៊ុយសម្រាប់ការថែទាំសុខភាពពីចម្ងាយដល់ពួកអ្នកជំងឺដោយមិនចាំបាច់ឱ្យពួកគេចាកចេញពីផ្ទះទេ។
គេរំពឹងថា លោកប្រធានាធិបតីអាមេរិក Donald Trump នឹងស្នើកញ្ចប់លើកកម្លាំងសេដ្ឋកិច្ចមួយដល់ពួកសាធារណរដ្ឋក្នុងព្រឹទ្ធសភាអាមេរិកនៅថ្ងៃអង្គារតាមពេលវេលាសហរដ្ឋអាមេរិកជាការឆ្លើយតបនឹងការរាលដាលមេរោគនេះ។ នៅក្នុងសំណើនេះមានការកាត់បន្ថយពន្ធដារដែលជាគំនិតមួយមានការជំទាស់ពីពួកសាធារណរដ្ឋខ្លះនិងពួកប្រជាធិបតេយ្យដែរ។
លោក Charles Schumer មេដឹកនាំប្រជាធិបតេយ្យនៅក្នុងព្រឹទ្ធសភាអាមេរិកបានមានប្រសាសន៍កាលពីថ្ងៃអង្គារថា អាទិភាពកំពូលសម្រាប់អាមេរិកគឺគួរពន្លឿនសមត្ថភាពខាងការធ្វើតេស្ត។
កាលពីថ្ងៃអង្គារ ប្រធានាធិបតីចិន Xi Jinping បានធ្វើដំណើរទៅកាន់ក្រុង Wuhan ជាលើកដំបូងចាប់តាំងពីតំបន់នោះបានក្លាយទៅជាតំបន់ស្នូលនៃការរាលដាលមេរោគវីរុសកូរ៉ូណាដែលបានឆ្លងដល់មនុស្សជាង៨ម៉ឺននាក់និងបានធ្វើឱ្យមនុស្ស៣ពាន់១រយនាក់ស្លាប់ក្នុងប្រទេសចិន។
លោក Xi ដែលពាក់ម៉ាស់បានជួបជាមួយពួកពេទ្យនិងពួកអ្នកជំងឺនៅក្នុងកន្លែងមួយចំនួននៅក្នុងក្រុង Wuhan ទីរួមខេត្ត Hubei ដោយមានរួមបញ្ចូលទាំងមន្ទីរពេទ្យមួយកន្លែងដែលបានត្រូវកសាងជាពិសេសក្នុងពេលតែប៉ុន្មានថ្ងៃសម្រាប់ព្យាបាលពួកអ្នកជំងឺ COVID-19៕
