នៅក្នុងការជជែកដេញដោលដែលបង្ហាញពីការមិនចុះសម្រុងគ្នាលើការឆ្លើយតបនឹងជំងឺកូវីដ១៩ ទូទាំងប្រទេស អនុប្រធានាធិបតីសហរដ្ឋអាមេរិកលោក Mike Pence ដែលជាបេក្ខជនអនុប្រធានាធិបតីខាងគណបក្សសាធារណរដ្ឋ និងសមាជិកព្រឹទ្ធសភាអ្នកស្រី Kamala Harris បេក្ខជនអនុប្រធានាធិបតីខាងគណបក្សប្រជាធិបតេយ្យ បានប្រកែកគ្នា អំពីការសមិទ្ធផលរបស់លោកប្រធានាធិបតី Trump នៅប៉ុន្មានថ្ងៃដំបូងនៃការរាតត្បាតនៃជំងឺកូវីដ១៩។
នៅក្នុងការជជែកដេញ រយ:ពេល ៩០ នាទី កាលពីយប់ថ្ងៃពុធ នៅសាកលវិទ្យាល័យ Utah នៅក្នុងទីក្រុង Salt Lake City លោក Pence និងអ្នកស្រី Harris ប្រឈមមុខគ្នាលើប្រធានបទមួយចំនួនចាប់ពីសេដ្ឋកិច្ច បរិស្ថាន និងការសម្រេចតែងតាំងចៅក្រមតុលាការកំពូលដោយលោក Trump ជាដើម។
ប៉ុន្តែ ការប្រកាសរបស់លោក Trump កាលពីថ្ងៃសុក្រសប្តាហ៍មុនថា លោកមានជំងឺកូវីដ១៩ បានធ្វើឲ្យបេក្ខជនអនុប្រធានាធិបតីទាំងពីរ ផ្តោតសំខាន់លើរោគរាតត្បាតដែលបណ្ដាលឲ្យមនុស្សជាង ២ សែន ១ ម៉ឺន ១ ពាន់ បាត់បង់ជីវិត និង ៧ លាន ៥ សែននាក់ ឆ្លងជំងឺនេះនៅសហរដ្ឋអាមេរិក។ នេះ យោងតាមទិន្នន័យរបស់សាកលវិទ្យាល័យ Johns Hopkins ។
អ្នកស្រី Harris បេក្ខជនប្រធានាធិបតីខាងគណបក្សប្រជាធិបតេយ្យ បាននិយាយថា៖ «ពលរដ្ឋអាមេ រិកបានជួបប្រទះនូវបរាជ័យដ៏ធំបំផុតនៃរដ្ឋបាលប្រធានាធិបតីនេះ ក្នុងប្រវិត្តិសាស្ត្រប្រទេសរបស់យើង»។
អ្នកស្រី Harris បាននិយាយថា៖ «អ្នកគិតទៅមើលថា បើអ្នកបានដឹងនៅថ្ងៃទី ២៨ ខែមករា មិនមែននៅថ្ងៃទី ១៣ ខែមីនា នូវអ្វីដែលពួកគេដឹងតើ អ្នកនឹងបានធ្វើអ្វីខ្លះដើម្បីទប់ទល់? ពួកគេបានដឹងហើយពួកគេបានលាក់បាំង។ លោកប្រធានាធិបតីបាននិយាយថា វាជាការបោកបញ្ចោត»។
អ្នកស្រីបានរៀបរាប់ឡើងវិញពីរបាយការណ៍ក្នុងសៀវភៅថ្មីមួយរបស់លោក Bob Woodward ដែលថា ទីប្រឹក្សាសន្តិសុខជាតិរបស់លោក Trump បានជូនដំណឹងលោកនៅក្នុងការប្រជុំក្នុងសេតវិមាន កាលពីថ្ងៃ ២៨ ខែមករា ថា ជំងឺកូវីដ១៩ អាចបង្កឲ្យមាន «ការគំរាមកំហែងដល់សន្តិជាតិធំបំផុត» ដែលលោក Trump នឹងជួបប្រទះ។
អ្នកស្រី Harris បន្ថែមថា ទោះបីជាយ៉ាងនេះក្ដី សព្វថ្ងៃនេះពួកគេនៅតែមិនមានផែនការ។
ប៉ុន្តែ លោក Pence បាននិយាយថា ការសម្រេចចិត្តរបស់លោកប្រធានាធិបតីក្នុងការបិទជើងហោះហើរពីប្រទេសចិននៅប៉ុន្មានថ្ងៃដំបូងនៃការរាតត្បាត «បានផ្ដល់ឲ្យយើងនូវពេលវេលា ដែលមិនអាចកាត់ថ្លៃបាន សម្រាប់យើងកៀរគរសាមគ្គីគ្នា ក្នុងកម្រិតថ្នាក់ជាតិដ៏ធំបំផុត ចាប់តាំងពីសង្គ្រាមលោកលើកទី ២ មក។ ហើយខ្ញុំគិតថា វាបានជួយជីវិតពលរដ្ឋអាមេរិកាំងរាប់ម៉ឺននាក់»៕
