សារព័ត៌មានសំឡេងប្រជាធិបតេយ្យវីអូឌី (VOD) នឹងបើកដំណើរការផ្សាយព័ត៌មានឡើងវិញពីរដ្ឋវ៉ាស៊ីនតោន (Washington State) ភាគខាងលិចសហរដ្ឋអាមេរិក ក្រោមការគ្រប់គ្រងរបស់អតីតនាយកប្រតិបត្តិនៃមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ(CCIM) លោក ប៉ា ងួនទៀន ដែលលោកបានគេចខ្លួនទៅក្រៅប្រទេសជាង៥ឆ្នាំមកហើយ ដោយសាររងសម្ពាធពីអាជ្ញាធរកម្ពុជា ក្នុងសំណុំរឿងប្រមូលមូលនិធិសម្រាប់បុណ្យសពលោកបណ្ឌិត កែម ឡី។
សេចក្តីប្រកាសព័ត៌មាននៅលើទំព័រហេ្វសប៊ុកវីអូឌី នាថ្ងៃពុធនេះបានឱ្យដឹងថា វីអូឌីនឹងបើកដំណើរការផ្សាយឡើងវិញតាមបណ្តាញសង្គមហ្វេសប៊ុក យូធូប (YouTube) និងTik Tok ចាប់ពីថ្ងៃទី២ ខែតុលា ឆ្នាំ២០២៣ ចាប់ពីម៉ោង៥:៣០នាទី ដល់ម៉ោង៦ល្ងាចម៉ោងក្នុងប្រទេសកម្ពុជា ជារៀងរាល់ថ្ងៃ។
លោក ប៉ា ងួនទៀន ស្ថាបនិក និងជាអតីតនាយកប្រតិបត្តិនៃមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ(CCIM) ដែលបានគ្រប់គ្រងវីអូឌី ប្រាប់វីអូអេនៅថ្ងៃពុធនេះថា មូលហេតុដែលលោកសម្រេចដំណើរការព័ត៌មានសំឡេងប្រជាធិបតេយ្យវីអូឌីឡើងវិញ ដោយសារលោកមើលឃើញពីតម្រូវការរបស់ប្រជាពលរដ្ឋខ្មែរក្នុងការទទួលបានព័ត៌មានពិត និងឯករាជ្យ ក្រោយសារព័ត៌មានមួយនេះបានដើរតួនាទីយ៉ាងដល់ប្រជាពលរដ្ឋអស់រយៈពេល២០ឆ្នាំមកហើយនោះ។
លោកបន្តថាការ បើកដំណើរព័ត៌មានវីអូឌីឡើងវិញ ក៏ជាចំណែកក្នុងការចូលរួមលើកស្ទួយសេរីភាពសារព័ត៌មាន ក៏ដូចជាសេរីភាពក្នុងការបញ្ចេញមតិផងដែរ។
លោកថ្លែងថា៖ «ទីបីហ្នឹងគឺផ្តល់នូវក្តីសង្ឈឹមដល់អ្នកដែលគាំទ្រវីអូឌី និងប្រជាពលរដ្ឋខ្មែរដែលចង់បានវីអូឌីដំណើរការឡើងវិញ អ៊ីចឹងបានជាខ្ញុំហ្នឹងគឺខំឱ្យអស់លទ្ធភាពពីការបំពេញបំណងប្រជាពលរដ្ឋខ្មែរនូវរឿងអស់ទាំងហ្នឹង»។
លោក ប៉ា ងួនទៀន ក៏បានបញ្ជាក់ថា សហការីនៅក្រៅប្រទេសនឹងចូលរួមផ្សព្វផ្សាយព័ត៌មាន ហើយវាមិនមានជាប់ពាក់ព័ន្ធនឹងអ្នកស្ថិតក្នុងប្រទេសកម្ពុជាឡើយ។
លោកថ្លែងថា៖ «ក្រុមការងារសុទ្ធតែក្រុមនៅក្រៅប្រទេសទាំងអស់ សូម្បីការងារនៅក្រៅប្រទេសខ្ញុំជាអ្នករៀបចំមិនឱ្យមានការទាក់ទិនជាមួយអ្នកនៅខាងក្នុង[កម្ពុជា]ទេ គឺអ្នកបំពេញការងារសុទ្ធតែនៅក្រៅប្រទេស»។
ការប្រកាសបើកផ្សាយវីអូឌីឡើងវិញ ក្រោយលោក ប៉ា ងួនទៀង បានលាលែងពីតំណែងជានាយកប្រតិបត្តិអង្គការ CCIM នៅចុងខែសីហាថ្មីៗនេះ ដែលបានដំណើរការអង្គការ CCIMតាំងពីឆ្នាំ២០០៧។
ក្រោយមានការប្រកាសបើកដំណើរការផ្សាយឡើងវិញរបស់សំឡេងប្រជាធិបតេយ្យវីអូឌី មជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ(CCIM) ក៏បានចេញសេចក្តីប្រកាសមួយ ដោយលើកឡើងថា CCIM មិនជាប់ពាក់ព័ន្ធនឹងដំណើរការផ្សាយឡើងវិញរបស់វីអូឌីនោះទេ។
អ្នកស្រី ឆន សុគន្ធា នាយិកាប្រតិបត្តិថ្មីនៃCCIM លើកឡើងថា វីអូឌីបានដើរតួនាទីយ៉ាងសំខាន់ក្នុងការផ្តល់ព័ត៌មានពិត និងឯករាជ្យ ហើយអ្នកស្រីថា ការបើកដំណើរការឡើងវិញនេះគឺស្ថិតនៅក្រោមការគ្រប់គ្រងរបស់លោកប៉ា ងួនទៀន ប៉ុណ្ណោះ ដែលលោកបានលាលែងតំណែងជានាយកប្រតិ្តបតិ្តតាំងពីចុងខែសីហា ហើយមជ្ឈមណ្ឌលកម្ពុជា ដើម្បីប្រព័ន្ធផ្សព្វផ្សាយឯករាជ្យមិនជាប់ពាក់ព័ន្ធនឹងដំណើរការផ្សាយព័ត៌មានឡើងវិញរបស់វីអូឌីនោះទេ។
អ្នកស្រីថ្លែងថា៖ «សម្រាប់ការដំណើរការឡើងវិញនេះ ខ្ញុំសូមបញ្ជាក់ដែរថា សម្រាប់សកម្មភាពការងាររបស់មជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ យើងអត់បានអនុវត្តផ្ទុយពីសេចក្តីណែនាំ ឬលិខិតពីខាងក្រសួងព័ត៌មានដែលដាក់មកមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យហ្នឹងតាំងតែថ្ងៃទី១៣ ខែកុម្ភៈកន្លងមកហ្នឹង។ គឺរាល់សកម្មភាពផ្សេងៗដែលពាក់ព័ន្ធនឹងរឿងព័ត៌មាន ជាពិសេសការផ្សាយរបស់វីអូឌីទាំងភាសាខ្មែរ និងភាសាអង់គ្លេសហ្នឹងគឺខាងយើងមិនអនុវត្តសកម្មភាព ឬការផ្សាយផ្ទុយពីសេចក្តីប្រកាសរបស់ខាងក្រសួងទេ»។
សេរីភាពសារព័ត៌មាន និងសេរីភាពក្នុងការបញ្ចេញមតិក្នុងពេលបច្ចុប្បន្ននេះ មានការរឹតត្បិតយ៉ាងខ្លាំង ជាពិសេសសម្រាប់អ្នកសារព័ត៌មានដែលហ៊ានរាយការណ៍រឿងរសើបនៅក្នុងសង្គម។ នេះបើតាមអ្នកស្រី ឆន សុគន្ធា។
អ្នកស្រីថ្លែងថា៖ «ហើយយើងឃើញថាសេរីភាពសារព័ត៌មានដូចជាខាងក្រសួងគាត់បានដកអាជ្ញាបណ្ណ ក៏មានការគំរាមកំហែងដល់អ្នកសារព័ត៌មានជាបន្តបន្ទាប់។ អ៊ីចឹងយើងឃើញថាសេរីភាពសារព័ត៌មាននៅក្នុងប្រទេសកម្ពុជា ជាពិសេសអ្នកសារព័ត៌មានដែលគាត់ហ៊ាននៅក្នុងការរាយការណ៍ព័ត៌មានពិតជូនដល់មហាជនគឺតែងតែទទួលរងគំរាម ឬក៏ការបៀតបៀនផ្សេងៗដល់អ្នកសារព័ត៌មាន»។
យ៉ាងណាមិញ អ្នកនាំពាក្យក្រសួងព័ត៌មាន លោក ទេព អស្នារិទ្ធ សុំមិនធ្វើការ អត្ថាធិប្បាយចំពោះការបើកដំណើរការផ្សាយឡើងវិញរបស់វីអូឌី។
លោកថ្លែងថា៖ «សូមជំរាបជូនថា ក្រសួងព័ត៌មានមិនមានការអត្ថាធិប្បាយអ្វីផ្សេងទៅ លើប្រធានមួយនេះ ក្រៅតែពីការសម្រេចកន្លងទៅទាក់ទងនឹងវិទ្យុវីអូឌីហ្នឹងទេបាទ»។
កាលពីខែកុម្ភៈ ក្រសួងព័ត៌មានបានលុបចោលអាជ្ញាបណ្ណរបស់វីអូឌី តាមបញ្ជារបស់អតីតនាយករដ្ឋមន្រ្តីលោក ហ៊ុន សែន ពាក់ព័ន្ធនឹងការផ្សាយអត្ថបទថា លោក ហ៊ុន ម៉ាណែត ចុះហត្ថលេខាជំនួសលោកនាយករដ្ឋមន្រ្តី ហ៊ុន សែន ក្នុងការផ្តល់ជំនួយ ១០០.០០០ ដុល្លារដល់ប្រទេសតួកគី សម្រាប់គ្រោះរញ្ជួយដី។ ក្រសួងព័ត៌មានបានបញ្ជាក់ថា វីអូឌី«រំលោភយ៉ាងធ្ងន់ធ្ងរលើវិជ្ជាជីវៈសារព័ត៌មាន ធ្វើឱ្យប៉ះពាល់ដល់កិត្តិយស និងកិត្យានុភាពរបស់រាជរដ្ឋាភិបាលកម្ពុជា ហើយមិនព្រមធ្វើការកែសម្រួលតាមបទប្បញ្ញត្តិច្បាប់ស្តីពីរបបសារព័ត៌មាន»។
គួរបញ្ជាក់ថា នៅមុនការបោះឆ្នោតជាតិកាលពីខែកក្កដា រដ្ឋាភិបាលកម្ពុជាបានបញ្ជាឱ្យអ្នកផ្គត់ផ្គង់សេវាអ៊ីនធឺណិតក្នុងប្រទេសកម្ពុជារាំងខ្ទប់គេហទំព័រសារព័ត៌មានមួយចំនួន ក្នុងនោះមានសារព័ត៌មានអាស៊ីសេរី The Cambodia Daily និងគេហទំព័រកំណត់ត្រា ដែលជាបណ្តុំព័ត៌មានរបស់សារព័ត៌មានវីអូឌី ដែលត្រូវបានរដ្ឋាភិបាលបិទដំណើរការ។ គេហទំព័រឈ្មោះ«កំណត់ត្រា» kamnotra.io គឺជាការប្រមូលផ្តុំនូវទិន្នន័យព័ត៌មានដែលត្រូវបានផ្សព្វផ្សាយជាសាធារណៈរួចហើយ។ វាត្រូវបានមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ (CCIM) ដែលគ្រប់គ្រងវីអូឌី ដាក់ឱ្យដំណើរការកាលពីខែមិថុនា៕
