អង្គការការពារអ្នកកាសែតក្នុងស្រុកនិងក្រៅស្រុកមួយចំនួនបានអះអាងថា រដ្ឋាភិបាលកម្ពុជាបង្កើនការរឹតត្បិតគេហទំព័រព័ត៌មានសំខាន់ៗ នៅមុនការបោះឆ្នោតជាតិដែលនឹងចូលមកដល់ថ្ងៃអាទិត្យនេះ។ នេះបើយោងតាមសេចក្តីថ្លែងការណ៍មួយរបស់អង្គការសង្គមស៊ីវិលចេញផ្សាយនៅថ្ងៃអង្គារនេះ ដែលវីអូអេទទួលបាន។
ការអះអាងនេះ ក្រោយនិយ័តករទូរគមនាគមន៍កម្ពុជាបានស្នើឱ្យអ្នកផ្គត់ផ្គង់សេវាអ៊ីនធឺណិតចាត់វិធានការបិទខ្ទប់តំណភ្ជាប់របស់អង្គភាពសារព័ត៌មានមួយចំនួន ក្រោមហេតុផលថា សារព័ត៌មានទាំងនោះ «ធ្វើឱ្យមានការយល់ច្រឡំ ប៉ះពាល់ដល់កិត្តិយស និងកិត្យានុភាពរបស់រាជរដ្ឋាភិបាល ដែលមិនបានបំពេញលក្ខខណ្ឌក្នុងការធ្វើអាជីវកម្មនៅក្រសួងព័ត៌មាន»។ សារព័ត៌មានទាំងនោះ មានវិទ្យុអាស៊ីសេរី សារព័ត៌មាន The Cambodia Daily និងគេហទំព័រកំណត់ត្រា ដែលជាបណ្តុំព័ត៌មានរបស់សារព័ត៌មានវីអូឌី ដែលត្រូវបានរដ្ឋាភិបាលបិទដំណើរការកាលពីខែកុម្ភៈ ដោយលោកនាយករដ្ឋមន្ត្រី ហ៊ុន សែន។
នៅក្នុងសេចក្តីថ្លែងការណ៍មួយចេញផ្សាយនាថ្ងៃអង្គារនេះ សមាគម អង្គការក្នុងស្រុក និងក្រៅស្រុកមួយចំនួន រួមមានសមាគមខេមបូចា មជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ និងសហព័ន្ធអ្នកសារព័ត៌មានអន្តរជាតិ (IFJ) បានលើកឡើងថានៅមុនការបោះឆ្នោត មានការខិតខំប្រឹងប្រែងរួមក្នុងការគាបសង្កត់សិទ្ធិរបស់ប្រជាពលរដ្ឋកម្ពុជា ជាពិសេសសិទ្ធិទទួលបានព័ត៌មាន។
លោក អ៊ិត សូធឿត នាយកផ្នែកប្រព័ន្ធផ្សព្វផ្សាយនៃមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យដែលគ្រប់គ្រងគេហទំព័រកំណត់ត្រា លើកឡើងក្នុងសេចក្តីថ្លែងការណ៍ថា ការបិទគេហទំព័រនឹងប៉ះពាល់សិទ្ធិទទួលបានព័ត៌មានរបស់ប្រជាពលរដ្ឋដែលត្រូវបានធានាដោយច្បាប់។
លោកបញ្ជាក់ថា៖ «វាក៏ប៉ះពាល់ការងាររបស់អ្នកកាសែតដែលកំពុងខិតខំធ្វើការ ដើម្បីធ្វើឱ្យប្រជាពលរដ្ឋទទួលបានព័ត៌មាន»។
លោកបន្ថែមថា គោលបំណងនៃការបង្កើតគេហទំព័រកំណត់ត្រារបស់ស្ថាប័នលោក គឺដើម្បីបម្រើប្រយោជន៍សាធារណជន តាមរយៈការផ្សព្វផ្សាយរបាយការណ៍ និងឯកសារនានារបស់រដ្ឋាភិបាល។
ក្រោយការបិទតំណភ្ជាប់របស់គេហទំព័រ និងប្រព័ន្ធផ្សព្វផ្សាយសង្គម វិទ្យុអាស៊ីសេរីក៏បានចេញសេចក្ដីថ្លែងការណ៍មួយ ដោយថ្កោលទោសការសម្រេចនេះ។
នៅក្នុងសេចក្តីថ្លែងការណ៍មួយ លោក Rohit Mahajan ប្រធានផ្នែកទំនាក់ទំនងរបស់វិទ្យុអាស៊ីសេរី បានលើកឡើងថា ការបិទដំណើរការគេហទំព័រវិទ្យុអាស៊ីជាការរំលោភបំពានច្បាប់ និងគាបសង្កត់លំហសារព័ត៌មាននៅកម្ពុជា ខណៈការបើកលំហសិទ្ធិសេរីភាពសារព័ត៌មាន មានសារៈសំខាន់នៅក្នុងសង្គមប្រជាធិបតេយ្យ។
លោកបញ្ជាក់ថា៖ «វិទ្យុអាស៊ីសេរីថ្កោលទោសរដ្ឋាភិបាលកម្ពុជាដែលបញ្ជាឱ្យក្រុមហ៊ុនអ៊ីនធឺណិតបិទខ្ទប់គេហទំព័រអនឡាញវិទ្យុអាស៊ីសេរី»។
លោកបន្ថែមថា ការបិទតំណភ្ជាប់នេះជាការប៉ុនប៉ងត្រួតត្រាលំហព័ត៌មានសេរី នៅមុនការបោះឆ្នោតថ្ងៃទី ២៣ ខែកក្កដាមកដល់។
លោក មាស សុភ័ណ្ឌ អ្នកនាំពាក្យក្រសួងព័ត៌មានប្រាប់វីអូអេនៅថ្ងៃអង្គារនេះថាសេចក្តីថ្លែងការណ៍របស់វិទ្យុអាស៊ីសេរីគ្រាន់តែចង់បិទបាំងកំហុសរបស់ខ្លួនតែប៉ុណ្ណោះ។
លោកប្រាប់វីអូអេតាមប្រព័ន្ធតេឡេក្រាមថា៖ «សម្រាប់សារព័ត៌មានដែលគ្មានក្រមសីលធម៌ មិនគោរពវិជ្ជាជីវៈ និងមិនគោរពច្បាប់ ដូចជាវិទ្យុអាស៊ីសេរីនេះគ្មានតម្លៃទាស់តែសោះ មករិះគន់លំហសេរីភាពសារព័ត៌មាននៅកម្ពុជានោះទេ»។
សេរីភាពសារព័ត៌មាននៅប្រទេសកម្ពុជាបន្តសិ្ថតក្នុងស្ថានភាពអាក្រក់ នៅឆ្នាំ ២០២៣នេះ ដោយសារការកើនឡើងនៃការធ្វើទុក្ខបុកម្នេញរបស់រដ្ឋាភិបាលមកលើប្រព័ន្ធផ្សព្វផ្សាយឯករាជ្យ។ នេះបើតាមសន្ទស្សន៍របស់អង្គការអ្នកសារព័ត៌មានគ្មានព្រំដែន (Reporters Without Border) ដែលចេញផ្សាយជាសាធារណៈ កាលពីខែឧសភា ឆ្នាំ ២០២៣។ កម្ពុជាស្ថិតនៅលំដាប់លេខរៀងទី ១៤៧ លើ ១៨០ ប្រទេសនៅឆ្នាំ ២០២៣ ដែលថយពីលេខរៀងទី ១៤២ កាលពីឆ្នាំមុន៕
អង្គការការពារអ្នកកាសែត៖ រដ្ឋាភិបាលកម្ពុជាបង្កើនការរឹតត្បិតគេហទំព័រព័ត៌មានសំខាន់ៗ មុនការបោះឆ្នោត
ភ្នំពេញ —
