អ្នកស្រី យ៉ុន សារី បានចាកចេញពីផ្ទះមកស្នាក់អាស្រ័យលើផ្លូវ ដោយសារផ្ទះថ្មរបស់អ្នកស្រីត្រូវបានជន់លិចយ៉ាងខ្លំាង។ ស្រ្តីវ័យ៤២ឆ្នាំ ដែលរស់នៅក្នុងភូមិពោធិ៍រលំ សង្កាត់សាក់សំពៅ ខណ្ឌដង្កោ រាជធានីភ្នំពេញនេះ ថ្លែងថា អ្នកស្រីបានមកបោះតង់កៅស៊ូលើចិញ្ចើមផ្លូវ ដើម្បីស្នាក់នៅបណ្តោះអាសន្នជាមួយកូន និងចៅប្រមាណ១០នាក់ ទម្រាំទឹកស្រកទៅវិញ។
អ្នកស្រីប្រាប់វីអូអេកាលពីថ្ងៃចន្ទថា៖ «ឆ្នាំមុន [ទឹកឡើង]ដូចតិចជាងបន្តិចទេ ចង់ប្រហាក់ប្រហែលគ្នាហ្នឹង។ ឆ្នាំទៅ បានធ្វើផ្លូវហ្នឹង កុំអីលិច បាក់ផ្លូវដូចគ្នាហ្នឹង និយាយទៅទឹកហ្នឹងប្រហាក់ប្រហែលគ្នា[ជាមួយ]ឆ្នាំទៅ[ឆ្នាំ២០២២]ហ្នឹង»។
អ្នកស្រី សារី គឺជាអ្នករងគ្រោះម្នាក់ក្នុងចំណោមអ្នករងគ្រោះរាប់រយនាក់ផ្សេងទៀត ដែលផ្ទះត្រូវបានជន់លិចចាប់តាំងពីសប្តាហ៍មុន នៅគ្រាដែលទឹកស្ទឹងព្រែកត្នោតបានហក់ឡើងខ្លាំង រហូតដល់ជន់លិចផ្ទះរបស់ប្រជាពលរដ្ឋ។
មេឃកំពុងភ្លៀងស្រិចៗ លាយឡំតំណក់ទឹកភ្លៀងដែលហូរពីកន្លែងធ្លុះធ្លាយនៃតង់កៅស៊ូ អ្នកស្រី សារី បានរៀបរាប់ថា អ្នកស្រី និងកូនចៅបានស្នាក់នៅតាមចិញ្ចើមផ្លូវ ជិតវត្តកំពង់ក្តុលនេះ ចាប់តាំងពីថ្ងៃព្រហស្បតិ៍សប្តាហ៍មុន ពោលគឺពេលទឹកឡើងខ្លាំងលិចផ្ទះថ្មរបស់អ្នកស្រីពាក់កណ្តាលផ្ទះ ឬក្នុងកម្រិតប្រមាណ២ម៉ែត្រ។
អ្នកស្រីថ្លែងថា កម្ពស់ទឹកស្ទឹងព្រែកត្នោតឆ្នាំនេះ ប្រហាក់ប្រហែលនឹងឆ្នាំមុន ប៉ុន្តែឆ្នាំនេះ ទឹកស្ទឹងមិនបានសាយភាយ ចូលភូមិដូចឆ្នាំ២០២២នោះទេ។
ផ្លូវថ្នល់គ្រួស នៅខាងមុខផ្ទះរបស់អ្នកស្រី យ៉ុន សារី ត្រូវបានអាជ្ញាធរសង្កាត់ សាងសង់ខ្ពស់ជាងផ្ទះរបស់អ្នកស្រី កាលពីឆ្នាំ២០២២ ដែលបណ្តាលឱ្យផ្ទះអ្នកស្រី និងផ្ទះអ្នកភូមិផ្សេងទៀត ដែលសាងសង់ផ្ទាល់ដី និងជាប់សណ្តស្ទឹងព្រែកត្នោត ត្រូវបានជន់លិច។
បើតាមអ្នកស្រី យ៉ុន សារី ការស្ថាបនាផ្លូវថ្នល់ខ្ពស់បែបនេះក៏បានទប់ស្កាត់ទឹកជំនន់ស្ទឹងព្រែកត្នោត កុំឱ្យជន់លិចផ្ទះអ្នកភូមិ ដែលរស់នៅម្ខាងទៀតនៃថ្នល់ ដែលមិនជាប់សណ្តស្ទឹងព្រែកត្នោត។
អ្នកស្រីរៀបរាប់ថា៖ «កុំធ្វើផ្លូវនេះ ដែរហ្នឹង ទឹកឡើងមកដល់ថ្នល់នេះ ហើយនេះ។ កុំធ្វើផ្លូវនេះបាន[រួចរាល់]ឆ្នាំទៅ[ឆ្នាំ២០២២] កុំអីទឹកត្រូវបាក់ ត្រូវលិចចូលក្នុងភូមិទៀត»។
បើតាមអ្នកភូមិរូបនោះ ទឹកបានស្រកទៅជាបណ្តើរៗ ប៉ុន្តែមានសភាពយឺត ខណៈអ្នកស្រី នៅចាំមើលថាតើទឹកនឹងឡើងទៀត ឬយ៉ាងណា ព្រោះអ្នកស្រីឮអាជ្ញាធរនិយាយថា ភ្លៀងនៅខេត្តកំពង់ស្ពឺច្រើន ដែលបណ្តាលឱ្យទឹកស្ទឹងព្រែកត្នោត ដែលហូរភ្ជាប់គ្នាពីខេត្តកំពង់ស្ពឺឡើងបែបនេះ។
អ្នកស្រីបញ្ជាក់ថា៖ «ទឹកឡើងតាំងថ្ងៃព្រហស្បតិ៍ ទី១៨ [ខែតុលា] [ទឹក]ឡើងរហូត អត់មានស្រកទេ ទើបប៉ុន្មានថ្ងៃហ្នឹង ស្រកបានបន្តិចហ្នឹង»។
អ្នកស្រីក៏ត្អូញត្អែរអំពីជីវភាព ដែលស្នាក់នៅក្នុងតង់ធ្លុះធ្លាយ ខណៈចៅតូចម្នាក់កំពុងក្តៅខ្លួន។ អ្នកស្រីទើបទទួលបានអំណោយជាអង្ករ ទឹកត្រី មី ពីអាជ្ញាធរសង្កាត់។
ចំណែកស្ត្រីម្នាក់ទៀត ដែលរស់នៅក្នុងភូមិពោធិ៍រលំ សង្កាត់សាក់សំពៅ ខណ្ឌដង្កោ រាជធានីភ្នំពេញ អ្នកស្រី សេង ស្រីណែត អាយុ៣៦ឆ្នាំ តែងតែព្រួយបារម្ភឱ្យតែខែទឹកឡើងម្តងៗ។ ស្រ្តីដែលមានកូនប្រុស៣នាក់រូបនោះរៀបរាប់ថា៖ «ពេលទឹកឡើងមក ចិត្តខ្វល់ខ្វាយច្រើន រឿងទឹកឡើងហ្នឹង ខ្លាចទឹកឡើងខ្លាំង រើ [គ្រែ មុង ភួយជាដើម]មិនទាន់អ៊ីចឹង កូនផង អីផង»។
កំពុងអង្គុយប្រលេះផ្លែម្ទេសស្រស់ ស៊ីឈ្នួលប្រលេះឱ្យគេ អ្នកស្រី ស្រីណែត រៀបរាប់ប្រាប់អ្នកសារព័ត៌មានវីអូអេនៅក្រោមតង់កៅស៊ូ ដែលជាកន្លែងស្នាក់នៅបណ្តោះអាសន្ន ពេលទឹកជន់លិចនោះថា ជារៀងរាល់ឆ្នាំ ផ្ទះអ្នកស្រីតែងតែលិច ព្រោះជាផ្ទះប្រក់ស័ង្កសី ដែលសង់ជាប់ដី។
អ្នកស្រីបន្តថា៖ «ខ្ញុំពិភាក្សាជាមួយប្តីខ្ញុំរហូតហ្នឹងថា ធ្វើម៉េចឱ្យសល់លុយ ចាក់ជើងសសរ ហើយឱ្យផុតពីទឹកហ្នឹងទៅ ឆ្នាំហ្នឹងខ្ញុំអត់សល់ទេ ព្រោះយើងអត់ដីនៅអ៊ីចឹង។ យើងចងការគេ ក៏គេអត់ឱ្យដែរ រកធនាគារ ក៏គេមិនឱ្យដែរ ព្រោះយើងអត់មានប្លង់ដី ប្លង់អីទាំងអស់។ ...តែខ្ញុំអត់មែន [ក្រ] ប៉ុនខ្ញុំអត់ដែលជំពាក់លុយគេទេ។ បានតែហូបគ្រប់គ្រាន់អ៊ីចឹង។ ខ្ញុំរំពឹងខ្លួនឯងឱ្យបានលើកជើងសសរផុត[ពី ទឹក] ព្រោះរាល់ថ្ងៃ ឱ្យទឹក[ឡើង]មក ខ្ញុំលើកគ្រែទៅ ជំងឺខ្ញុំរឹតតែធ្វើទុក្ខ»។
ចំណែកលោក ហ៊ន ហ៊ុន អាយុ ៥០ឆ្នាំ រស់នៅភូមិពាម សង្កាត់ព្រៃស ខណ្ឌដង្កោ រាជធានីភ្នំពេញ កំពុងអង្គុយលើផ្ទះឈើ ដែលទឹកក្រោមផ្ទះនៅកម្រិតជាង១ម៉ែត្រ ប្រាប់អ្នកសារព័ត៌មានវីអូអេថាកាលពីសប្តាហ៍មុន ផ្ទះរបស់លោកលិចខ្លាំង ហើយកម្ពស់ទឹកជាង២ម៉ែត្រ។ លោក និងភរិយាបានទៅសុំផ្ទះអ្នកជិតខាងស្នាក់នៅបណ្តោះអាសន្ន។ លោកត្អូញត្អែរអំពីការលំបាករស់នៅទីនោះ ដោយសារតែទឹកជន់រាល់ឆ្នាំ។
មូលហេតុដែលលោកមិនផ្លាស់ទីលំនៅទៅកន្លែងផ្សេង ដោយសារលោកមិនមានធនធានសេដ្ឋកិច្ច ដើម្បីផ្លាស់ប្តូរ។ លោកនិងភរិយាជាអ្នកលក់បន្លែ ដឹកតាមរម៉កលក់នៅខាងមុខរោងចក្រ។
លោកថ្លែងថា៖ «ពិបាករស់នៅ ភ្លើងក៏អត់មាន ភ្លើងក៏គេអត់ឱ្យយើងប្រើ បិទចោលហ្មងនេះ ទៅនៅណា បើអត់មានកន្លែងនៅ។ ថ្ងៃណា យើងអស់ជីវិត យើងគិតតាមហ្នឹងទៀត»។
ផ្ទះរបស់ប្រជាពលរដ្ឋមួយចំនួនទៀត ក្នុងសង្កាត់សាក់សំពៅ ខណ្ឌដង្កោ រាជធានីភ្នំពេញ ក៏នៅតែបន្តជន់លិច នាសប្តាហ៍នេះ ខណៈភ្លៀងបន្តធ្លាក់ជារៀងរាល់ថ្ងៃ។
ខណៈទឹកបានស្រកទៅវិញជាបណ្តើរៗ ប្រជាពលរដ្ឋខ្លះក៏បានចូលទៅរស់នៅក្នុងផ្ទះរបស់ខ្លួនវិញ ខណៈពលរដ្ឋខ្លះក៏បន្តរស់នៅកន្លែងទីទួលមានសុវត្ថិភាព។
លោក ឃួង ស្រេង អភិបាលរាជធានីភ្នំពេញ និងជាប្រធានគណៈកម្មាធិការគ្រប់គ្រងគ្រោះមហន្តរាយរាជធានីភ្នំពេញ ប្រាប់វីអូអេកាលពីថ្ងៃចន្ទថា នាប៉ុន្មានថ្ងៃចុងក្រោយនេះ ទឹកស្ទឹងព្រែកត្នោតបានស្រកជាង១ម៉ែត្រ។
លោក ឃួង ស្រេង បានផ្តល់បទសម្ភាសន៍ដល់សារព័ត៌មានថ្មីៗ កាលពីថ្ងៃទី២២ ខែតុលាថា ការលិចឆ្នាំនេះមិនប៉ះពាល់ខ្លាំងដល់ផ្ទះប្រជាពលរដ្ឋ ដូចឆ្នាំ២០២២ឡើយ។
លោកថ្លែងថា៖ «តាមពិតទៅទឹកនេះ វាធំ ប៉ុនវាលិច អត់បាចសាច ដូចឆ្នាំកន្លងមកទេ ដោយសារយើងបានធ្វើទំនប់ទប់ស្កាត់មួយ នៅខាងបុរី នៅជិតភូមិភាគពិសេសនេះ យើងមានទំនប់ទប់។ ឯលិចនេះគឺលិចបងប្អូន[រស់នៅ]ក្នុងសណ្តស្ទឹងតែម្តង»។
អ្នកស្រី គឹម ញឹប អភិបាលខណ្ឌដង្កោ ប្រាប់វីអូអេយ៉ាងខ្លីថា ស្ថានភាពទឹកស្ទឹងព្រែកត្នោត បានស្រកចុះវិញហើយ ដោយឡែកអ្នកស្រីបដិសេធមិនឆ្លើយតបនឹងសំណួរបន្ថែមទៀត។
អ្នកស្រីថ្លែងនៅថ្ងៃអង្គារថា៖ «ខ្ញុំជម្រាបជូន[តែ]បន្តិចទេបង ពាក់ព័ន្ធជាមួយស្ថានភាព គឺទឹកស្រក ហើយល្អប្រសើរវិញហើយ»។
កាលពីសប្តាហ៍មុន មន្រ្តីកាកបាទក្រហមកម្ពុជាបានចុះចែកអំណោយជាគ្រឿងបរិភោគមួយចំនួនដល់ប្រជាពលរដ្ឋដែលរងផលប៉ះពាល់ដោយសារទឹកជំនន់ស្ទឹងព្រែកត្នោតចំនួន២,១០០គ្រួសារ ដែលស្ថិតក្នុងសង្កាត់ចំនួន១០ ក្នុងខណ្ឌដង្កោ។ នេះបើតាមការបង្ហោះព័ត៌មានរបស់រដ្ឋបាលខណ្ឌដង្កោ កាលពីថ្ងៃទី២២ ខែតុលា។
រដ្ឋបាលរាជធានីភ្នំពេញក៏បានចេញសេចក្តីណែនាំមួយឱ្យប្រជាពលរដ្ឋដែលមានលំនៅឋានតាមបណ្តោយដងទន្លេមេគង្គ និងដងស្ទឹងព្រែកត្នោត ឱ្យបង្កើនការប្រុងប្រយ័ត្នខ្ពស់ និងតាមដានកម្ពស់ទឹក ដើម្បីបញ្ចៀសហានិភ័យនានា។
ត្រឡប់មកអ្នកស្រី យ៉ុន សារី ដែលជាពលរដ្ឋរងគ្រោះដោយសារទឹកជំនន់ស្ទឹងព្រែកត្នោត អំពាវនាវឱ្យអាជ្ញាធរផ្តល់តង់កៅស៊ូថ្មីសម្រាប់ប្រក់ការពារទឹកភ្លៀង ព្រោះអ្នកស្រីមិនដឹងថា ទឹកនឹងស្រកអស់ទៅវិញនាពេលណានោះទេ។
អ្នកស្រីថ្លែងថា៖ «ទឹកឡើងខ្លាំងបំផុតដល់ផ្លូវហើយ ដល់ស្រក់ម្សិលមិញ ម្សិលម្ងៃហ្នឹង បានបន្តិចហ្នឹង។ បើវាស្រកខ្លាំងហ្មង វាលឿនទេ តែអានេះស្រកតិចៗ ឮសូរថានៅមានទឹកទៀតអ៊ីចឹង។ នៅមានទឹកថែមទៀត អ៊ីចឹងទៅ ឥឡូវបងនៅតែលើថ្នល់ ភ្លៀងមករហូតដែរហ្នឹង»៕
