ភ្ជាប់​ទៅ​គេហទំព័រ​ទាក់ទង

រដ្ឋមន្រ្តី​វៀតណាម​រិះគន់​ក្រុមហ៊ុន​ចិន​ចំៗ​នៅ​ក្រោយ​គ្រោះថ្នាក់​ដែល​បណ្តាល​ឲ្យ​មាន​ការ​បាត់​បង់​ជីវិត


អ្នកបើកបរ​រថយន្ត​ឆ្លងកាត់​ផ្នែក​ម្ខាង​នៃ​គម្រោង​ផ្លូវ​រថភ្លើង​ដែល​កំពុង​សាងសង់​នៅ​ក្នុង​ក្រុង​ហាណូយ​ ប្រទេស​វៀតណាម​ កាលពី​ថ្ងៃទី៧​ ខែមេសា ឆ្នាំ២០១៣។

រដ្ឋមន្រ្តី​ក្រសួង​ដឹក​ជញ្ជូន​វៀតណាម​បាន​ធ្វើ​ការ​រិះគន់​ជា​សាធារណ​ដល់​ការ​ចាត់ចែង​របស់​ក្រុមហ៊ុន​រថភ្លើង​ចិន​បន្ទាប់​ពី​គ្រោះថ្នាក់​នៅ​ឯ​គម្រោង​សំណង់​រថភ្លើង​ខ្ពស់​ពី​ដីដ៏​សំខាន់​មួយ​នៅ​ក្នុង​រដ្ឋ​ធានី​ហាណូយ។

​លោក Dinh La Thang បាន​ត្រូវ​គេ​ឃើញ​នៅ​ក្នុង​ការផ្សាយ​តាមទូរទស្សន៍​ជាតិ​កាល​ពី​យប់​ថ្ងៃ​ពុធ​បាន​ស្រែក​ហើយ​និង​បាន​ម្រាម​ដៃ​ចង្អុលទៅ​តំណាង​ក្រុមហ៊ុន China Railway Sixth Group ​ក្នុង​អំឡុងពេល​នៃ​ជំនួបមួយ។

«នៅពេល​ដែល​គ្រោះថ្នាក់​កើត​មាន​ឡើង​ម្តង​ៗ​លោក​សុខចិត្ត​ទទួល​យក​ការ​ទទួល​ខុសត្រូវ ​ក៏បុន្តែ​គ្មាន​អ្វី​បាន​ផ្លាស់​ប្តូរ​ទេ។ ​ទោះ​បី ​លោកឯង​ធ្វើ​ការ​ដោះ​សារ​នៅពេល​នេះដោយ​និយាយ​ថា ​យើង​បាន​ខ្ចី​ប្រាក់​កម្ចី​មក​ពី​ចិន​ក៏ដោយ ​ខ្ញុំ​អាច​សុំ​ឲ្យ​រដ្ឋាភិបាល​យើង​ធ្វើ​ជំនួស​លោក​បាន​ដែរ។​ យើង​មិន​អាច​ដោះ​ដូរ​ប្រាក់​កម្ចី​របស់​ចិន​ជាមួយ​អាយុ​ជី​វិត​របស់​ជនជាតិ​វៀតណាម​បាន​ទេ»។

ពាក្យ​សម្តី​ធ្ងន់ៗ​របស់​រដ្ឋ​មន្រ្តី​វៀតណាម​បាន​ត្រូវ​ធ្វើ​ឡើង​ប៉ុន្មាន​ថ្ងៃ​បន្ទាប់​ពី​ការ​ដួល​រលំ​រន្ទា​ដែល​ស្ទើរ​តែ​សម្លាប់​អ្នកបើក​រថយន្ត​តាក់ស៊ី​និងអ្នក​ជិះ​នៅ​ក្នុង​រថយន្ត​តាក់ស៊ី​នេះ ​ហើយ​មួយ​ខែ​បន្ទាប់​ពី​គ្រោះថ្នាក់​ដែល​ពាក់ព័ន្ធ​នឹង​ការ​ដួល​រលំ​ដងសន្ទូចដែល​បាន​សម្លាប់​មនុស្ស​ម្នាក់។

​លោក Thang បាន​ជម្រុញ​ឲ្យ​ភាគី​ចិន​បណ្តេញ​អ្នកពិគ្រោះ​និងអ្នក​ទទួល​កាងារ​តាម​កិច្ចសន្យា​រង​របស់​ក្រុមហ៊ុន​នោះ​ហើយ​ជំនួស​ដោយកម្មករ​ក្នុង​ស្រុក​វិញ។

​នៅ​ក្នុង​ការ​ឆ្លើយតប តំណាង​របស់​កិច្ចសន្យា​បាន​និយាយ​ថា ​ក្រុមហ៊ុន​របស់​លោក​នឹង​ធ្វើ​ទៅ​តាម​ការ​ណែនាំ​របស់​លោក Thang ​ហើយនិង​ចាប់​ឲ្យ​បុគ្គលិក​របស់​លោក​ទទួល​ខុសត្រូវ។

​គម្រោង​រថភ្លើង​ទីក្រុង​លើក​ដំបូង​ក្នុង​ទីក្រុង​ហាណូយ ​ដោយ​មាន​ប្រាក់​កម្ចី​ពី​រដ្ឋាភិបាល​ចិន​បាន​ប្រឈម​ការ​ពន្យា​ពេល​ម្តង​ហើយ​ម្តងទៀត​ដែល​ធ្វើ​ឲ្យ​ខាត​បង់​ប្រយោជន៍​វៀតណាម​ប្រហែល​៣រយ​លាន​ដុល្លារ។

​ការ​ព្រួយ​បារម្ភ​ជា​សាធារណ​លើ​កិច្ចសន្យា​ហេដ្ឋារចនាសម្ព័ន្ធ​កើត​មាន​ឡើង​នៅពេល​ដែល​មនោសញ្ចេតនាប្រឆាំង​ចិន​បាន​បណ្តាល​មក​ពី​ចំណាត់​ការ​របស់​រដ្ឋាភិបាល​ទីក្រុង​ប៉េកាំង​ក្នុង​សមុទ្រ​ចិន​ខាង​ត្បូង​កាល​ពី​ឆ្នាំ​ទៅ។

ក្នុង​អំឡុងពេល​នៃ​ការ​ប្រឈមមុខ​ខ្លាំង​បំផុត​លើ​ការដ្ឋាន​អណ្តូង​ប្រេង​ចិនក្នុង​ដែន​ទឹក​ដែល​មាន​ជម្លោះកុប្បកម្ម​របស់​ជនជាតិ​វៀតណាម​បាន​ធ្វើ​ឲ្យ​ខូចខាត​ពាណិជ្ជកម្ម​ដែលកាន់​កាប់​ដោយចិន​នៅទូទាំង​ប្រទេស​វៀត​ណាម៕

XS
SM
MD
LG