ក្រុមអ្នកជំនាញនិយាយថាប្រទេសវៀតណាមកំពុងធ្វើតាមប្រទេសចិននៅក្នុងកិច្ចប្រឹងប្រែងរបស់ខ្លួនដើម្បីធ្វើឲ្យសេដ្ឋកិច្ចរីកចម្រើន។ សេដ្ឋកិច្ចវៀតណាមដើរយឺតជាងប្រទេសចិនប្រហែលតែមួយទសវត្សរ៍ប៉ុណ្ណោះ។
ប្រទេសកុម្មុយនិស្តទាំងពីរដែលជាគូប្រជែងនយោបាយនោះ បានបង្កើតសេដ្ឋកិច្ចគ្រប់គ្រងដោយរដ្ឋក្នុងការបង្កើតការងារតាមរយៈការងាររោងចក្រសម្រាប់ផលិតទំនិញនាំចេញ។
ប្រទេសចិនបានបើកឲ្យមានការវិយោគពីបរទេសកាលពីឆ្នាំ១៩៧៨ ហើយចំណែកប្រទេសវៀតណាមវិញបានបើកឱកាសសម្រាប់ការវិយោគបរទេសនេះនៅ១០ឆ្នាំក្រោយប្រទេសចិន។
បច្ចុប្បន្នប្រទេសវៀតណាមកំពុងដោះស្រាយបញ្ហាអំពើពុករលួយ បញ្ហាកកស្ទះចរាចរណ៍ និងការធ្លាក់ចុះនៃបណ្តាក្រុមហ៊ុនដែលគ្រប់គ្រងដោយរដ្ឋ ខណៈដែលវណ្ណៈកណ្តាលកំពុងតែកើនឡើងនៅក្នុងប្រទេសនេះ។
ទាំងអស់នេះគឺជាអ្វីដូចទៅនឹងការអភិវឌ្ឍនៅក្នុងប្រទេសចិន។
ការអភិវឌ្ឍស្រដៀងគ្នាថ្មីបំផុតគឺសភាជាតិវៀតណាមកំពុងត្រួតពនិត្យសេចក្តីព្រាងច្បាប់មួយដើម្បីអនុញ្ញាតឲ្យប្រទេសនេះបង្កើតតំបន់សេដ្ឋកិច្ចពិសេស៣កន្លែង។
សេចក្តីព្រាងច្បាប់នះនឹងដាក់ឲ្យសភាអនុម័តនៅខែក្រោយនេះ។ តំបន់សេដ្ឋកិច្ចពិសេសទាំងនេះនឹងបើកឱកាសឲ្យពួកអ្នកវិយោគបរទេសបង្កើតរោងចក្រសម្រាប់ផលិតទំនិញនាំចេញដែលមានការលើកលែងពន្ធគយ និងអាចជួលទីតាំងក្នុងរយៈពេលវែង។ នេះបើយោងតាមគេហទំព័រសារព័ត៌មានរបស់វៀតណាមឈ្មោះ Vnexpress International ដែលបានផ្សព្វផ្សាយ។ ប្រទេសចិនបានបង្កើតតំបន់សេដ្ឋកិច្ចពិសេស៤ដំបូងបំផុតកាលពីឆ្នាំ១៩៧៩ ដើម្បីទាក់ទាញការវិនិយោគបរទេស។ បច្ចុប្បន្នចិនមានតំបន់សេដ្ឋកិច្ចពិសេសសរុបចំនួន៣២៕
