អនុប្រធានាធិបតីអាមេរិក លោកស្រី Kamala Harris នឹងពង្រឹងទំនាក់ទំនងរបស់លោកស្រីជាមួយតំបន់អាស៊ីអាគ្នេយ៍ក្នុងសប្តាហ៍នេះ នៅឯកិច្ចប្រជុំកំពូលអាស៊ានក្នុងទីក្រុងហ្សាការតា ប្រទេសឥណ្ឌូណេស៊ី ជាទីដែលលោកស្រីនឹងព្យាយាមលុបមន្ទិលនានាអំពីការប្តេជ្ញាចិត្តរបស់សហរដ្ឋអាមេរិកចំពោះតំបន់នោះ ដោយសារតែអវត្តមានរបស់ប្រធានាធិបតីលោក Joe Biden។ នេះបើយោងតាមសេចក្តីរាយការណ៍របស់ទីភ្នាក់ងារសារព័ត៌មាន AP។
នេះជាដំណើរទស្សនកិច្ចលើកទី៣របស់លោកស្រី Harris ទៅកាន់តំបន់អាស៊ីអាគ្នេយ៍ និងលើកទី៤ទៅកាន់តំបន់អាស៊ីទាំងមូល ហើយលោកស្រីធ្វើដំណើរទៅប្រទេសនានាក្នុងទ្វីបអាស៊ីច្រើនជាងទៅទ្វីបផ្សេងៗទៀត។ ទស្សនកិច្ចម្តងហើយម្តងទៀត រួមទាំងកិច្ចប្រជុំនានាដែលលោកស្រីទទួលធ្វើជាម្ចាស់ផ្ទះក្នុងរដ្ឋធានីវ៉ាស៊ីនតោនផង បានធ្វើឱ្យលោកស្រី ក្លាយជាអ្នកភ្ជាប់ទំនាក់ទំនងដ៏សំខាន់សម្រាប់រដ្ឋបាលអាមេរិកដឹកនាំដោយគណបក្សប្រជាធិបតេយ្យ ខណៈអាមេរិកព្យាយាមជំរុញបណ្តាញភាពជាដៃគូដើម្បីតតាំងឥទ្ធិពលចិន។
ដំណើរលើកចុងក្រោយបង្អស់នេះ គឺជាឱកាសមួយទៀតសម្រាប់លោកស្រី Harris ដើម្បីបង្ហាញ សមត្ថភាពខាងគោលនយោបាយការបរទេសរបស់លោកស្រី ពេលលោកស្រី កំពុងត្រៀមខ្លួនសម្រាប់ការឃោសនារកសំឡេងឆ្នោត។ លោកស្រីកំពុងរងការវាយប្រហារជាពាក្យសម្តីពីបេក្ខជនប្រធានាធិបតីខាងគណបក្សសាធារណរដ្ឋ ដែលនិយាយថា លោកស្រីមិនទាន់ត្រៀមខ្លួនរួចរាល់ទេដើម្បីឡើងជំនួសលោក Biden ដែលជាប្រធានាធិបតីអាមេរិកចំណាស់ជាងគេក្នុងប្រវត្តិសាស្ត្រ បើលោកមិនអាចបញ្ចប់អាណត្តិទី២ បានទេនោះ។
អ្នកនាំពាក្យខាងសន្តិសុខជាតិនៅសេតវិមាន លោក John Kirby និយាយថា លោកស្រី Harris បានធ្វើឱ្យសម្ព័ន្ធភាពនិងភាពជាដៃគូក្នុងតំបន់ឥណ្ឌូប៉ាស៊ីហ្វិក ក្លាយជាផ្នែកមួយនៃរបៀបវារៈរបស់លោកស្រីក្នុងនាមជាអនុប្រធានាធិបតី ហើយបានហៅគម្រោងដំណើរទស្សនកិច្ចរបស់លោកស្រីថា «ត្រូវចំនឹងបញ្ហាដែលអ្នកស្រីផ្តោតលើ»។
ប៉ុន្តែអតីតរដ្ឋមន្ត្រីការបរទេសឥណ្ឌូណេស៊ី លោកស្រី Marty Natalegawa និយាយថា៖ «ការសម្រេចចិត្តរបស់លោក Biden ក្នុងការរំលងកិច្ចប្រជុំកំពូលរបស់សមាគមប្រជាជាតិអាស៊ីអាគ្នេយ៍ ឬអាស៊ាននេះ ធ្វើឱ្យមានការភ្ញាក់ផ្អើលខ្លះដែរ ពិសេសដោយសារលោក Biden នឹងស្ថិតក្នុងប្រទេសឥណ្ឌានិងវៀតណាមជុំវិញអំឡុងពេលដូចគ្នា។ ការនៅជិតកៀកបង្កើយរបស់លោកប្រធានាធិបតីនេះ ធ្វើឱ្យអវត្តមានរបស់លោក ត្រូវគេសម្លក់សម្លឹងកាន់តែច្រើនទៅវិញ»។
តែលោកស្រី Natalegawa ទទួលស្គាល់ថា អាស៊ានមានការលំបាកក្នុងការបញ្ចុះបញ្ចូលឱ្យមេដឹកនាំពិភពលោកជឿថា ខ្លួនស័ក្តិសមដើរតួនាទីស្នូលក្នុងតំបន់ ទោះបីជាសមាគមអាស៊ានតំណាងឱ្យពលរដ្ឋជាង៦៥០លាននាក់នៅទូទាំង១០ប្រទេសដែលរួមគ្នាមានសេដ្ឋកិច្ចធំជាងគេទី៥លើពិភពលោកក៏ដោយ។
សមាគមអាស៊ាន មិនទាន់ដោះស្រាយវិបត្តិនៅមីយ៉ាន់ម៉ាបាននៅឡើយ ដែលនៅទីនោះ មេដឹកនាំរដ្ឋប្រហារយោធាកាលពីពីរឆ្នាំមុន មិនត្រូវបានអញ្ជើញចូលរួមក្នុងកិច្ចប្រជុំកំពូលនេះឡើយ។ ផែនការសន្តិភាពមួយដែលមានការព្រមព្រៀងពីឧត្ដមសេនីយ៍កំពូលរបស់ប្រទេសនោះ ក៏គ្មានការវិវត្តទៅមុខដែរ៕
