នៅថ្ងៃសុក្រនេះតុលាការកំពូលនៃប្រទេសថៃបាននិយាយថាខ្លួនបានចេញដីកាចាប់ខ្លួនមួយសម្រាប់លោកស្រី Yingluck Shinawatra អតីតនាយករដ្ឋមន្ត្រីនៅក្រោយលោកស្រីមិនបានបង្ហាញខ្លួនក្នុងតុលាការដើម្បីស្តាប់សេចក្តីវិនិច្ឆ័យនៅក្នុងករណីយធ្វេសប្រហែសមួយប្រឆាំងនឹងលោកស្រី។
ពួកមេធាវីលោកស្រីបាននិយាយថា លោកស្រីមានជំងឺមិនអាចមកបង្ហាញខ្លួនបានទេ។
តុលាការបានកំណត់យកថ្ងៃទី២៧ខែកញ្ញាជាថ្ងៃប្រជុំលើកក្រោយដើម្បីចេញសាលដីកា។ សេចក្តីថ្លែងការណ៍មួយរបស់តុលាការកំពូលនៃប្រទេសថៃចែងថា «យើងយល់ថាជនចាប់ចោទកំពុងលាក់ខ្លួន ឬគេចខ្លួនហើយ»។
លោកស្រី Yingluck បាននិយាយថា លោកស្រីគ្មានទោសពៃរ៍អ្វីទេចំពោះការចោទប្រកាន់ទាក់ទិនជាមួយគ្រោងការណ៍ផ្តល់ប្រាក់ជំនួយបំពេញខាតអង្ករសម្រាប់ក្រុមកសិករដែលបានឱ្យរដ្ឋបង់សោហ៊ុយរាប់ពាន់លានដុល្លារ។
ថ្លែងនៅក្នុងក្រុងបាងកក លោកនាយករដ្ឋមន្ត្រី Prayuth Chan-ocha អ្នកគ្រប់គ្រងយោធាដែលបានបណ្តេញរដ្ឋាភិបាលលោកស្រី Yingluck ចេញពីតំណែងនៅក្នុងរដ្ឋប្រហារយោធាមួយកាលពីឆ្នាំ២០១៤ បានមានប្រសាសន៍ថា លោកមិនបានដឹងថា លោកស្រីនៅទីណាទេ ក៏ប៉ុន្តែរដ្ឋាភិបាល «កំពុងរកលោកស្រី»។
លោកស្រី Yingluck ប្រឈមនឹងទោសជាប់គុក១០ឆ្នាំប្រសិនបើតុលាការរកឃើញថា លោកស្រីមានទោស។ ក៏ប៉ុន្តែទោះជាយ៉ាងណាក៏ដោយ ប្រសិនបើមានទោស លោកស្រីមានសិទ្ធិតវ៉ាឡើងឧទ្ធរណ៍។
នៅថ្ងៃសុក្រនេះដែរ តុលាការមួយក្នុងក្រុងបាងកកបានកាត់ទោសលោក Boonsong Teriyapirom អតីតរដ្ឋមន្ត្រីក្រសួងពាណិជ្ជកម្មឱ្យជាប់គុក៤២ឆ្នាំនៅក្នុងការទាក់ទិនជាមួយរឿងអាស្រូវនៃការផ្តល់ប្រាក់ជំនួយបំពេញខាតអង្ករ។ លោក Phum Saraphon ដែលជាអនុរដ្ឋមន្ត្រីក្រសួងពាណិជ្ជកម្មបានត្រូវកាត់ទោសឱ្យជាប់ពន្ធនាគារ៣៦ឆ្នាំដោយសារមុខនាទីរបស់លោកក្នុងការកែបំភ្លៃកិច្ចព្រមព្រៀងខាងអង្កររវាងរដ្ឋាភិបាលជាមួយប្រទេសចិន។
ការផ្តល់ប្រាក់ជំនួយបំពេញខាតអង្ករដែលបានត្រូវសន្យាដល់ក្រុមកសិករនៅក្នុងការបោះឆ្នោតកាលពីឆ្នាំ២០១១បានជួយឱ្យគណបក្សរបស់លោកស្រី Yingluck មានជ័យជម្នះនៅក្នុងការបោះឆ្នោតនោះ។
ពួកអ្នកប្រឆាំងបាននិយាយថា កម្មវិធីនេះជាវិធីមានប្រសិទ្ធិភាពក្នុងការទិញសន្លឹកឆ្នោត ចំណែកឯពួកអ្នកគាំទ្រលោកស្រី Yingluck វិញបានស្វាគមន៍ការផ្តល់ប្រាក់ជំនួយបំពេញខាតអង្ករ ហើយបាននិយាយថាករណីក្តីក្តាំប្រឆាំងនឹងលោកស្រីមានទាក់ទិននឹងរឿងនយោបាយ៕
