ទំនាក់ទំនងរវាងសហរដ្ឋអាមេរិក និងប្រទេសអេហ្ស៊ីប ដែលមានភាពប្រសើរឡើងនៅក្រោមរដ្ឋបាលរបស់លោកប្រធានាធិបតី Donald Trump បានប្រឈមនឹងភាពតឹងតែងកាលពីថ្ងៃពុធម្សិលមិញ បន្ទាប់ពីសហរដ្ឋអាមេរិកបានកាត់ជំនួយមួយចំនួនសម្រាប់ប្រទេសអេហ្ស៊ីប ដោយសារតែបញ្ហាសិទ្ធិមនុស្ស។
សហរដ្ឋអាមេរិកបានកាត់ជំនួយផ្នែកសេដ្ឋកិច្ច និងយោធាចំនួនជិត ១ រយលានដុល្លារអាមេរិក និងបានពន្យារពេលផ្ដល់ជំនួយផ្នែកយោធាចំនួនជិត ២ រយលានដុល្លារអាមេរិកបន្ថែមទៀត សម្រាប់ប្រទេសអេហ្ស៊ីប ដែលជាប្រទេសទទួលជំនួយដ៏ធំមួយពីសហរដ្ឋអាមេរិក។
មន្ត្រីរដ្ឋាភិបាលអាមេរិក ដែលថ្លែងក្នុងលក្ខខណ្ឌមិនបញ្ចេញឈ្មោះ បានបញ្ជាក់ថា ការកាត់ជំនួយនេះ គឺបណ្ដាលមកពីប្រទេសអេហ្ស៊ីបបរាជ័យក្នុងផ្នែកសិទ្ធិមនុស្ស និងបរាជ័យក្នុងការបន្ធូរបន្ថយការដាក់កំហិតតឹងតែងលើអង្គការសង្គមស៊ីវិល និងអង្គការក្រៅរដ្ឋាភិបាលនានា។
ក្រសួងការបរទេសអេហ្ស៊ីបបានបដិសេធចំពោះការសម្រេចរបស់រដ្ឋាភិបាលសហរដ្ឋអាមេរិកនេះ ដោយបានហៅការសម្រេចនេះថា «ការវិនិច្ឆ័យខុសចំពោះស្ថានភាពនៃទំនាក់ទំនងយុទ្ធសាស្ត្ររវាងប្រទេសទាំងពីរអស់រយៈពេលប៉ុន្មានទសវត្សរ៍កន្លងមកនេះ»។
គេក៏ឃើញមានការរាយការណ៍មកថា រដ្ឋាភិបាលអេហ្ស៊ីបបានលុបចោលនូវជំនួបរវាងទីប្រឹក្សាសេតវិមានសហរដ្ឋអាមេរិកលោក Jared Kushner និងរដ្ឋមន្ត្រីការបរទេសអេហ្ស៊ីបលោក Sameh Shoukry ផងដែរ។
ប៉ុន្តែ ក្រោយមក រដ្ឋមន្ត្រីការបរទេសអេហ្ស៊ីបបានបញ្ចេញនូវវីដេអូមួយតាមរយៈប្រព័ន្ធ Twitter ដែលបង្ហាញអំពីលោក Jared Kushner និងក្រុមរបស់លោកជួបជាមួយនឹងលោក Sameh Shoukry៕
