ចំណងទាក់ទងរវាងសហរដ្ឋអាមេរិកនិងអេហ្ស៊ីបដែលមានភាពប្រសើរឡើងនៅក្រោមប្រធានាធិបតីអាមេរិកដូណាល់ ត្រាំ បង្ហាញពីការតានតឹងកាលពីថ្ងៃពុធបន្ទាប់ពីសហរដ្ឋអាមេរិកកាត់បន្ថយជំនួយខ្លះទៅឲ្យប្រទេសអេហ្ស៊ីបដោយសារការព្រួយកង្វល់ពីសិទ្ធិមនុស្ស។
សហរដ្ឋអាមេរិកបានកាត់បន្ថយជំនួយខាងសេដ្ឋកិច្ចនិងយោធាជិត១រយលានដុល្លារហើយបានពន្យារជំនួយខាងយោធាជាង២រយលានដុល្លារទៅឲ្យអេហ្ស៊ីប ដែលជាប្រទេសមួយទទួលជំនួយបរទេសដ៏ធំបង្អស់របស់សហរដ្ឋអាមេរិក។
ពួកមន្រ្តីសហរដ្ឋអាមេរិកដែលថ្លែងក្នុងលក្ខខណ្ឌមិនបញ្ចេញឈ្មោះ បានលើកឡើងពីការខកខានរបស់អេហ្ស៊ីបមិនបានធ្វើឲ្យប្រសើរឡើងនូវសិទ្ធិមនុស្សឬបន្ធូរបន្ថយទៅលើអង្គការសង្គមស៊ីវិលនិងអង្គការក្រៅរដ្ឋាភិបាល។
ក្រសួងការបរទេសអេហ្ស៊ីបបានរិះគន់ការសម្រេចចិត្តនេះ ដោយបានហៅថា ជាការវិនិច្ឆ័យមិនត្រឹមត្រូវពីទំនាក់ទំនងយុទ្ធសាស្រ្តដែលភ្ជាប់ប្រទេសទាំង២អស់រាប់ទសវត្សរ៍។
អេហ្ស៊ីបក៏ត្រូវបានគេរាយការណ៍ដែរថា បានលុបចោលជំនួបរវាងលោក Jared Kushner ទីប្រឹក្សាសេតវិមានដែលកំពុងបំពេញទស្សនកិច្ចប្រទេសនោះនិងលោក Sameh Shoukry រដ្ឋមន្រ្តីការបរទេសអេហ្ស៊ីប។
ក៏ប៉ុន្តែ ក្រសួងការបរទេសអេហ្ស៊ីបក្រោយមកបានចេញផ្សាយវីដេអូតាមរយៈ បណ្តាញ Twitter របស់លោក Kushner ហើយនឹងជំនួបក្រុមរបស់លោកជាមួយលោករដ្ឋមន្រ្តីការបរទេសអេហ្ស៊ីបShoukryដោយគណៈប្រតិភូទាំង២បានញញឹមហើយនឹងសើចដាក់ម៉ាស៊ីនថត។
លោក Kushner ដែលជាកូនប្រសារបស់ប្រធានាធិបតីត្រាំ បានស្ថិតនៅក្នុងរដ្ឋធានីឡឺគែដែលជាផ្នែកមួយនៃការខំប្រឹងប្រែងដើម្បីស្តារឡើងវិញនូវការចរចាសន្តិភាព។ លោកក៏ត្រូវគេរំពឹងនឹងជួបជាមួយប្រធានាធិបតី Abdel Fattah al-Sissi នៃប្រទេសអេហ្ស៊ីបដែរ៕
