លោករដ្ឋមន្ត្រីការបរទេសស.រ.អា John Kerry បានគូសបញ្ជាក់អំពីសារៈសំខាន់នៃចំណងទាក់ទងរវាងស.រ.អា និងប្រទេសអេហ្ស៊ីប ព្រមទាំងសារៈសំខាន់របស់អេហ្ស៊ីបនៅមជ្ឈិមបូព៌ា នៅពេលដែលលោកជួបជាមួយរដ្ឋមន្ត្រីការបរទេស Sameh Shoukri នៃប្រទេសអេហ្ស៊ីបនៅថ្ងៃអាទិត្យនេះ។
ក្នុងសុន្ទរកថាបើកកិច្ចប្រជុំនៅទីក្រុងគែរ លោក Kerry បានថ្លែងថា ភាគីទាំងសងខាងនឹងពិភាក្សាអំពីការគំរាមកំហែងពីសំណាក់ពួកក្រុមអ៊ីស្លាម ហើយថាប្រទេសអេហ្ស៊ីបបានធ្វើពលិកម្មយ៉ាងច្រើនរួចជាស្រេចទៅហើយ នៅក្នុងការប្រយុទ្ធប្រឆាំងទល់នឹងពួកនិយមជ្រុលនេះ។ លោកបានបញ្ជាក់អំពីសេចក្តីត្រូវការយុទ្ធសាស្ត្រប្រឆាំងទល់នឹងពួកភេរវជនមួយ ដែលមានការគាំទ្រពីសំណាក់មេដឹកនាំសាសនា ក្រុមអ្នកអប់រំ ព្រមទាំងពលរដ្ឋទូទៅដែលច្រានចោលមនោគមវិជ្ជាស្អប់អ្នកដទៃនោះ។
លោក Kerry ថែមទាំងបានពិភាក្សាអំពីតួនាទីរបស់រដ្ឋាភិបាល ដោយនិយាយថា ចាំបាច់ត្រូវតែមានការទុកចិត្តគ្នារវាងអាជ្ញាធរនិងពលរដ្ឋ ហើយថា នៅពេលដែលពលរដ្ឋមានមោទនភាពលើស្ថាប័នគ្រប់គ្រងកាន់តែច្រើន ពេលនោះ ស្ថាប័នគ្រប់គ្រងកាន់តែមានប្រសិទ្ធភាពបន្ថែមទៀត៕
