សហរដ្ឋអាមេរិកមានករណីស្លាប់ដោយសារជំងឺកូវីដ១៩ ជាង ៧០០.០០០ នាក់ ដែលជាចំនួនខ្ពស់ជាងប្រទេសណាៗទាំងអស់នៅលើពិភពលោក។
គិតត្រឹមល្ងាចថ្ងៃសុក្រទី ១ ខែតុលា សហរដ្ឋអាមេរិកមានមនុស្សស្លាប់ដោយសារជំងឺកូវីដ១៩ ចំនួន ៧០០.២៥៨ នាក់។ នេះបើយោងតាមទិន្នន័យរបស់សាកលវិទ្យាល័យ Jonhs Hopkins។
ប្រទេសប្រេស៊ីលមានចំនួនមនុស្សស្លាប់ដោយសារជំងឺនេះលំដាប់ទីពីរ ដោយមានចំនួន ៥៩៧.២៥៥ នាក់។ ប្រទេសឥណ្ឌាស្ថិតក្នុងលំដាប់ទី ៣ ដោយមានចំនួន ៤៤៨.៣៣៩ នាក់ ប្រទេសម៉ិកស៊ិកស្ថិតក្នុងលំដាប់ទី ៤ ដោយមានចំនួន ២៧៧.៥០៧ នាក់ និងប្រទេសរុស្ស៊ីស្ថិតក្នុងលំដាប់ទី ៥ ដោយមានចំនួន ២០៤.៤២៤ នាក់។ នេះបើយោងតាមទិន្នន័យរបស់សាកលវិទ្យាល័យ Jonhs Hopkins ដដែលនេះ។ នៅទូទាំងពិភពលោក មនុស្សជិត ៤ លាន ៨ សែននាក់ បានស្លាប់ដោយសារជំងឺកូវីដ១៩ នេះ។
មន្ត្រីសុខាភិបាលសហរដ្ឋអាមេរិកបាននិយាយថា ករណីឆ្លងជំងឺកូវីដ១៩ បានធ្លាក់ចុះនៅទូទាំងសហរដ្ឋអាមេរិកនៅក្នុងរយៈពេលប៉ុន្មានសប្ដាហ៍ចុងក្រោយនេះ។ ប៉ុន្តែ ស្របពេលដែលរលកថ្មីចុងក្រោយបង្អស់នៃការឆ្លងជំងឺកូវីដ១៩ បានកើនឡើងជាទូទៅនៅទូទាំងប្រទេស រដ្ឋមួយចំនួន ជាពិសេសរដ្ឋនៅភាគខាងជើង មានកំណើននៃការឆ្លងជំងឺនេះ។
សម្រាប់ព្រឹត្តិការណ៍ផ្សេងទៀតនៅក្នុងសហរដ្ឋអាមេរិកទាក់ទិននឹងជំងឺកូវីដ១៩ នេះដែរ រដ្ឋ California បានក្លាយជារដ្ឋដំបូងគេបង្អស់ដែលបានប្រកាសអំពីការតម្រូវឲ្យសិស្សានុសិស្សចាក់វ៉ាក់សាំងកូវីដ១៩ នៅពេលណាដែលទីភ្នាក់ងារម្ហូបអាហារនិងឱសថ (FDA) យល់ព្រមជាផ្លូវការឲ្យចាក់វ៉ាក់សាំងនេះដល់កុមារក្មេងៗ។
នៅពេលបច្ចុប្បន្ននេះ វ៉ាក់សាំងកូវីដ១៩ របស់ក្រុមហ៊ុន Pfizer ត្រូវបានយល់ព្រមឲ្យចាក់ជាផ្លូវការសម្រាប់មនុស្សដែលមានអាយុចាប់ពី ១៦ ឆ្នាំឡើង និងត្រូវបានផ្ដល់ការអនុញ្ញាតសម្រាប់ការប្រើប្រាស់ក្នុងគ្រាបន្ទាន់សម្រាប់កុមារអាយុពី ១២ ដល់ ១៥ ឆ្នាំ។
នៅពេលណាដែលវ៉ាក់សាំងនេះត្រូវបានគេផ្ដល់ការអនុញ្ញាតពេញលេញសម្រាប់កុមារអាយុពី ១២ ដល់ ១៥ ឆ្នាំ រដ្ឋ California នឹងដាក់កំហិតឲ្យសិស្សថ្នាក់ទី ៧ ដល់ទី ១២ ចាក់វ៉ាក់សាំងនេះ។
ជាងនេះទៀត នៅពេលណាដែលវ៉ាក់សាំងនេះ ត្រូវបានផ្ដល់ការអនុញ្ញាតជាផ្លូវការសម្រាប់មនុស្សចាប់ពីអាយុ ៥ ឆ្នាំឡើង នោះរដ្ឋ California នឹងដាក់កំហិតឲ្យសិស្សចាប់ពីថ្នាក់មត្តេយ្យរហូតដល់ថ្នាក់ទី ៦ ចាក់វ៉ាក់សាំងនេះ។
សិស្សខ្លះនឹងទទួលបានការលើកលែង ប្រសិនបើមានហេតុផលផ្នែកសាសនា និងផ្នែកសុខភាពណាមួយ៕
ព័ត៌មានខ្លះនៅក្នុងសេចក្ដីរាយការណ៍នេះ ត្រូវបានដកស្រង់មកពីទីភ្នាក់ងារព័ត៌មាន Associated Press។
ប្រែសម្រួលដោយលោក ឈឹម សុមេធ
