រដ្ឋបាលម្ហូបអាហារនិងឱសថសហរដ្ឋអាមេរិក បានអនុញ្ញាតឲ្យប្រើដូសទី៣នៃវ៉ាក់សាំងកូវីដ១៩របស់ក្រុមហ៊ុន Pfizer-BioNTech សម្រាប់ពលរដ្ឋអាមេរិកាំងអាយុចាប់ពី៦៥ឆ្នាំឡើង និងមនុស្សពេញវ័យដែលមានជំងឺធ្ងន់ធ្ងរ។
ការសម្រេចកាលពីថ្ងៃពុធ ក៏បានអនុម័តឲ្យចាក់ដូសជំរុញសម្រាប់បុគ្គលិកអាជីពមួយចំនួនដូចជា អ្នកថែទាំសុខភាព គ្រូបង្រៀន បុគ្គលិកនៅហាងលក់គ្រឿងទេសនិងអ្នករស់នៅទីជម្រកសម្រាប់មនុស្សគ្មានផ្ទះនៅ ឬអ្នកនៅក្នុងពន្ធនាគារ។
ការអនុញ្ញាតនេះ ទំនងជានឹងត្រួសត្រាយផ្លូវសម្រាប់ការបោះឆ្នោតនៅថ្ងៃព្រហស្បតិ៍ដោយគណៈកម្មាធិការផ្តល់យោបល់នៃមជ្ឈមណ្ឌលគ្រប់គ្រង និងបង្ការជំងឺ (CDC)ដែលសម្រេចថា តើពលរដ្ឋអាមេរិកាំងក្រុមណា នឹងអាចចាក់វ៉ាក់សាំងដូសជំរុញរបស់ក្រុមហ៊ុន Pfizer។
ក្រុមប្រឹក្សារបស់មជ្ឈមណ្ឌលគ្រប់គ្រងនិងបង្ការជំងឺ បានជួបពិភាក្សាគ្នាកាលពីថ្ងៃពុធថា តើអ្នកណានឹងត្រូវចាក់វ៉ាក់សាំងដូសជំរុញមុនគេ ដែលជាការសម្រេចដ៏ចម្រូងចម្រាសដែលកើតចេញជាង១ខែបន្ទាប់ពីលោកប្រធានាធិបតី Joe Biden បានប្រកាសផែនការនេះជាលើកដំបូង កាលពី៨ខែមុន ក្រោយការចាក់វ៉ាក់សាំងដូសទី២។
ក្រុមប្រឹក្សារដ្ឋបាលម្ហូបអាហារ និងឱសថសហរដ្ឋអាមេរិក (FDA) កាលពីសប្តាហ៍មុនបានបោះឆ្នោតដ៏ច្រើនលើសលប់ច្រានចោលផែនការរបស់សេតវិមានឱ្យចាក់វ៉ាក់សាំងដូសជំរុញដល់ពលរដ្ឋអាមេរិកាំងភាគច្រើន ដោយលើកហេតុផលថា ខ្វះទិន្នន័យអំពីសុវត្ថិភាពការចាក់វ៉ាក់សាំងដូសជំរុញ និងខ្វះភស្តុតាងនៃផលប្រយោជន៍។
ក្រុមប្រឹក្សា បានយល់ព្រមឲ្យចាក់វ៉ាក់សាំងដូសជំរុញចំពោះមនុស្សអាយុចាប់ពី៦៥ឆ្នាំឡើង និងអ្នកមានហានិភ័យនៃជំងឺធ្ងន់ធ្ងរ។
ពួកអ្នកវិទ្យាសាស្រ្តបានបញ្ជាក់ថា ការព្រួយកង្វល់ដ៏ចម្បងរបស់សហរដ្ឋអាមេរិក គឺការចាក់វ៉ាក់សាំងឲ្យអ្នកដែលមិនទាន់បានចាក់ទាល់តែសោះ៕
