ភ្ជាប់​ទៅ​គេហទំព័រ​ទាក់ទង

ស.រ.អា​នឹង​វាយតម្លៃ​ឡើង​វិញ​នូវ​ជម្រើស​ផ្សេង​ៗ​បន្ទាប់​ពី​សេចក្តី​អធិប្បាយ​របស់​លោក​ Netanyahu


ទង់ជាតិ​អ៊ីស្រាអែល​នៃ​រថយន្ត​របស់​លោក​នាយករដ្ឋមន្រ្តី​អ៊ីស្រាអែល​ Benjamin Netanyahu នៅ​អំឡុង​ពេល​ជំនួប​របស់​លោក​ជាមួួយ​នឹង​ប្រធានាធិបតី​អាមេរិក​លោក Barack Obama នៅ​សេតវិមាន​ នៅ​រដ្ឋធានី​វ៉ាស៊ីងតោន។

លោក​ប្រធានា​ធិបតី​សហរដ្ឋ​អាមេរិក ​បារ៉ាក់ ​អូបាម៉ា ​បាន​ប្រាប់​លោក​នាយករដ្ឋ​មន្រ្តី​អ៊ីស្រាអែល Benjamin Netanyahu ​ថា លោក​នឹងពិ​និត្យ​មើលឡើង​វិញ​នូវ​ទំនាក់​ទំនង​រវាង​សហរដ្ឋ​អាមេរិក​ និង​អ៊ីស្រាអែល​បន្ទាប់​ពី​អត្ថាធិប្បាយ​របស់​មេដឹកនាំ​អ៊ីស្រាអែល​រូប​នោះ​ ដែល​បាន​ច្រាន​ចោល​ដំណោះ​ស្រាយ​មាន​រដ្ឋ​២​នោះ។

តាម​មន្រ្តី​សេតវិមាន​ដែល​ថ្លែង​ក្នុង​លក្ខខណ្ឌមិន​បញ្ចេញ​ឈ្មោះ ​បាន​ប្រាប់​ឲ្យដឹង​ថា លោក​ប្រធានា​ធិបតី​អូបាម៉ា ​បានថ្លែង​សារ​នេះ​កាល​ពី​ថ្ងៃ​ព្រហស្បតិ៍​ម្សិល​មិញ​ក្នុង​អំឡុងពេលនៃ​ការ​សន្ទ​នា​តាម​ទូរស័ព្ទ​ ដើម្បី​ស្វាគមន៍​លោក Netanyahu ​អំពី​ជ័យ​ជម្នះ​នៃ​ការ​បោះ​ឆ្នោត​របស់​លោកនៅ​សប្តាហ៍​នេះ។

មន្រ្តី​នោះ​បាន​និយាយ​ថា «​លោក​ប្រធានា​ធិបតី​បាន​ប្រាប់​លោក​នាយករដ្ឋ​មន្រ្តីថា ​យើង​នឹង​ត្រូវ​ការ​ពិនិត្យ​មើល​ឡើង​វិញ​នូវ​ជម្រើស​របស់​យើងបន្ទាប់​ពីជំហរ​និង​អត្ថាធិប្បាយថ្មី​របស់​នាយករដ្ឋ​មន្រ្តីចំពោះដំណើរ​ស្រាយ​រដ្ឋ​២​នោះ‍»។

មុន​ការ​បោះឆ្នោត​កាល​ពី​ថ្ងៃ​អង្គារ នាយករដ្ឋ​មន្រ្តី Netanyahu ​បាន​ប្រាប់​បណ្តាញ​ផ្សាយ​ព័ត៌មានអ៊ីស្រាអែល​ថា ​លោក​នឹង​មិនគាំទ្រ​ការ​បង្កើត​រដ្ឋ​ប៉ាឡេស្ទីន​ដែល​ជា​វិធី​មួយដើម្បី​ដោះ​ស្រាយ​វិបត្តិ​ជាយូរយារ​ណាស់​មក​ហើយ​រវាង​អ៊ី​ស្រាអែល​និង​ប៉ាឡេស្ទីន​ទេ។

កាល​ពី​ថ្ងៃ​ព្រហស្បតិ៍​ លោក​បាន​ហាក់​ដូច​ជា​ស្ថិត​ងាករេ​ពី​សេចក្តី​ថ្លែង​ការណ៍​ទាំង​នោះ ​ដោយ​បាន​ប្រាប់​បណ្តាញ​ផ្សាយ​ព័ត៌មាន​ជា​ច្រើន​ថា លោក​មិន​ច្រាន​ចោល​រដ្ឋ​ប៉ាឡេស្ទីនដែល​គ្មាន​យោ​ធា​នោះទេ ក៏ប៉ុន្តែ​លោក ​បាន​បន្ថែមថា ​ការណ៍​នោះមិន​អាច​សម្រេច​ជោគ​ជ័យនៅពេល​នេះ​ទេ៕

XS
SM
MD
LG