ភ្ជាប់​ទៅ​គេហទំព័រ​ទាក់ទង

ការ​ជាប់​គាំង​របស់​តុលាការ​កំពូល​អាមេរិក​រារាំង​ផែនការ​អន្តោប្រវេសន៍​របស់​រដ្ឋបាល​អូបាម៉ា


លោក Antonio Surco មក​ពី​ក្រុង Silver Spring ចូលរួម​ក្នុង​បាតុកម្ម​នៅ​ខាង​ក្រៅ​តុលាការ​កំពូល​នៅ​ក្នុង​រដ្ឋធានី​វ៉ាស៊ីនតោន កាលពី​ថ្ងៃទី២៣ ខែមិថុនា ឆ្នាំ២០១៦។

ភាព​ជាប់​គាំង​របស់​តុលាការ​កំពូល​សហរដ្ឋ​អាមេរិក​កាល​ពី​ថ្ងៃ​ព្រហស្បតិ៍ បាន​ធ្វើ​ឲ្យ​ខកខាន​ផែនការ​របស់​លោក​ប្រធានាធិបតី បារ៉ាក់ អូបាម៉ា​ដើម្បី​ពន្យារពេល​ការ​និរទេស​ខ្លួន​ជន​អន្តោប្រវេសន៍​រាប់​លាន​នាក់​ដែល​គ្មាន​ឯកសារ​ត្រឹមត្រូវ​តាម​ច្បាប់។​

ការ​សម្រេច​ដោយ​សំឡេង​ឆ្នោត​៤​ទល់​នឹង​៤​នៅ​ក្នុង​ការ​សម្រេច​របស់​សភា​ជាន់​ទាប​ដែល​បាន​ច្រាន​ចោល​ការ​ស្វះស្វែង​របស់​លោក​ប្រធានាធិបតី​អូបាម៉ា​ដើម្បី​កំណត់​គោលនយោបាយ​អន្តោប្រវេសន៍​ថ្មី​ដោយ​បទ​បញ្ជា​របស់​ប្រធានាធិបតី​បន្ទាប់​ពី​សភា​មិន​បាន​អនុម័ត​ការ​កែ​ប្រែ​អន្តោប្រវេសន៍​ដ៏​ធំ​ទូលាយ។

លោក​ប្រធានាធិបតី ​បាន​ហៅ​ការ​សម្រេច​នេះ​ថា «ជា​ការ​ខក​ចិត្ត‍» ​សម្រាប់​ជន​អន្តោប្រវេសន៍​ដែល​នឹង​មិន​អាចចេញ​ពី​ស្រមោលដើម្បី​ចូលរួម​ចំណែក​ដល់​ប្រទេស​នេះ​ក្នុង​មធ្យោបាយ​ប្រកប​ដោយ​អត្ថន័យ‍»។​ ក៏ប៉ុន្តែ ​លោក​ប្រធានាធិបតី ​មាន​ប្រសាសន៍​ទៀត​ថា នឹង​មិន​មាន​ការ​បង្ខំ​ឲ្យ​និរទេស​ជន​អន្តោប្រវេសន៍​ដែល​គោរព​ច្បាប់​ដែល​កំពុង​រស់​នៅ​ក្នុង​សហរដ្ឋ​អាមេរិក​ទេ ​ទោះ​ជា​យ៉ាង​ណា​ក៏​ដោយ ​សេចក្តី​សម្រេច​នេះ ​ទុក​ឲ្យ​វត្ត​មាន​របស់​ពួកគេ​នៅ​ក្នុង​ប្រទេស​នេះ​ស្ថិតក្នុង​ភាព​ស្រពិច​ស្រពិល។

ដូចកាល​ពី​ពេល​មុន​ដែរ ​លោក​ប្រធានាធិបតី ​អូបាម៉ា ​បាន​ថ្កោលទោស​ពួក​គណបក្ស​សាធារណរដ្ឋ​នៅ​ក្នុង​ព្រឹទ្ធ​សភា​ចំពោះ​ការ​បដិសេធ​ពុំ​ព្រម​ពិចារណា​ការ​តែងតាំង​លោក Merrick Garland ​ចៅក្រម​តុលាការ​សាលា​ឧទ្ធរណ៍​របស់​សហព័ន្ធ​ដើម្បី​បំពេញអាសនៈ​នៅ​ទំនេរ​របស់​តុលាការ​ដោយ​ការ​ស្លាប់​ចៅក្រម Antonia Scalia កាល​ពី​ដើម​ឆ្នាំ​នេះ។​ ពួក​សមាជិក​សភា ​និយាយ​ថា ​អាសនៈ​នេះ ​ត្រូវ​តែ​បំពេញដោយ​ប្រធានាធិបតី​ថ្មី​របស់​អាមេរិក​ បន្ទាប់​ពី​ប្រធានាធិបតី ​អូបាម៉ា​ចាក​ចេញ​ពី​តំណែង​នៅ​ខែ​មករា​ឆ្នាំ​ក្រោយ។

រដ្ឋ​តិច​សាស​និង​រដ្ឋ​២៥​ផ្សេង​ទៀត ​បាន​ប្តឹង​រដ្ឋបាល​របស់​លោក​អូបាម៉ាអំពី​ផែន​ការ​អន្តោប្រវេសន៍​របស់​លោក​នេះ ​ដោយ​ជជែក​ឲ្យ​ហេតុផល​ថា ​វា ​ជាការ​ខុស​រដ្ឋ​ធម្មនុញ្ញ​ពីព្រោះ​តែ​វា ​ប៉ះពាល់​ដល់​ច្បាប់​អន្តោប្រវេសន៍​សហព័ន្ធ​នា​ពេល​បច្ចុប្ប​នេះ។ ទោះ​ជា​យ៉ាង​នោះ​ក៏​ដោយ ​រដ្ឋ​បាល​លោក​អូបាម៉ា ​បាន​ជជែក​ឲ្យ​ហេតុ​ផល​ថា ​រដ្ឋ​នានា ​មិន​អាច​ប្តឹង​បាន​ទេ ​ពី​ព្រោះ​តែ​ច្បាប់​អន្តោប្រវេសន៍ ​ស្ថិត​នៅ​ក្រោម​រដ្ឋាភិបាល​សហព័ន្ធ៕

XS
SM
MD
LG