សហរដ្ឋអាមេរិកនិងប្រទេសកូរ៉េខាងត្បូងបានបាញ់មីស៊ីលមួយចំនួនចូលក្នុងសមុទ្រនៅព្រឹកថ្ងៃពុធនេះ និងបានធ្វើសមយុទ្ធទម្លាក់គ្រាប់បែកនៅក្នុងសមុទ្រលឿង (Yellow Sea) ដើម្បីឆ្លើយតបទៅនឹងការបាញ់គ្រាប់ផ្លោងមីស៊ីលរបស់ប្រទេសកូរ៉េខាងជើងកាត់ពីលើប្រទេសជប៉ុនកាលពីថ្ងៃអង្គារ។
ក្រុមនាយសេនាធិការកងទ័ពរបស់ប្រទេសកូរ៉េខាងត្បូងបានបញ្ជាក់ថា ខ្លួនបានបាញ់មីស៊ីល Army Tactical Missile Systems (ATACMS) ចំនួន ៤ គ្រាប់និងគ្រាប់ផ្លោងមីស៊ីលប្រភេទ Hyumoo-2 ចំនួនមួយគ្រាប់។ គ្រាប់ផ្លោងមីស៊ីលរយៈចម្ងាយមធ្យមទី ២ ប្រភេទ Hyumoo-2 មិនបានដំណើរការល្អនោះទេហើយបានធ្លាក់បុកចំដីនៅមូលដ្ឋានកងទ័ពជើងអាកាសនៅជាយក្រុង Gangneung នៃប្រទេសកូរ៉េខាងត្បូង។
ការធ្លាក់បុកចំដីរបស់គ្រាប់ផ្លោងមីស៊ីលនេះត្រូវបានគេរាយការណ៍ថាមិនបណ្ដាលឱ្យមានការរងរបួសអ្វីនោះទេ ហើយការស៊ើបអង្កេតចំពោះមូលហេតុដែលបណ្ដាលឱ្យមានការធ្លាក់នេះបានធ្វើឡើង។ ការធ្លាក់នេះបានធ្វើឱ្យរង្គើដល់ពលរដ្ឋដែលរស់នៅក្នុងទីក្រុង Gangneung នេះ ដោយពួកគេភ័យខ្លាចថាវាអាចជាការវាយប្រហាររបស់កូរ៉េខាងជើង។
នៅថ្ងៃពុធនេះផងដែរ អង្គការសហប្រជាជាតិនឹងរៀបចំកិច្ចប្រជុំបន្ទាន់មួយដែលសហរដ្ឋអាមេរិកបានស្នើឡើង ដើម្បីពិភាក្សាអំពីហេតុការណ៍បាញ់មីស៊ីលរបស់ប្រទេសកូរ៉េខាងជើងកាត់ពីលើប្រទេសជប៉ុននេះ។
ឯកអគ្គរដ្ឋទូតសហរដ្ឋអាមេរិកប្រចាំអង្គការសហប្រជាជាតិអ្នកស្រី Linda Thomas-Greenfield បានសរសេរនៅលើ Twitter ថា៖ «យើងត្រូវតែដាក់កំហិតលើសមត្ថភាពរបស់ប្រទេសកូរ៉េខាងជើងដើម្បីកុំឱ្យប្រទេសនេះធ្វើឱ្យមានការវិវឌ្ឍទៅមុខនូវកម្មវិធីគ្រាប់ផ្លោងមីស៊ីលនិងអាវុធប្រល័យលោកខុសច្បាប់របស់ខ្លួន»។
ប្រធានគណៈរដ្ឋមន្ត្រីជប៉ុនលោក Hirokazu Matsuno បានប្រាប់អ្នកកាសែតកាលពីថ្ងៃអង្គារថា កូរ៉េខាងជើងបានបាញ់គ្រាប់ផ្លោងមីស៊ីលនេះនៅវេលាម៉ោង ៧ និង ២២ នាទីព្រឹកនៅថ្ងៃអង្គារ មុនពេលធ្លាក់ចូលទៅក្នុងមហាសមុទ្រប៉ាស៊ីហ្វិកនៅក្រៅតំបន់សេដ្ឋកិច្ចពិសេសរបស់ប្រទេសជប៉ុនក្នុងរយៈពេល ២២ នាទីក្រោយមក។
រដ្ឋមន្ត្រីការពារជាតិជប៉ុនលោក Yasukazu Hamada បាននិយាយថា មីស៊ីលនេះបានហោះពីលើប្រទេសជប៉ុនរយៈពេលប្រហែល ១ នាទី ដោយហោះបានចម្ងាយប្រហែល ៤.៦០០ គីឡូម៉ែត្រ ដែលមានចម្ងាយឆ្ងាយជាងមីស៊ីលរយៈចម្ងាយមធ្យមកាលពីលើកមុនៗ មុនពេលធ្លាក់ចូលទៅក្នុងសមុទ្រនៅចម្ងាយប្រមាណ ៣.២០០ គីឡូម៉ែត្រពីភាគខាងកើតប្រទេសជប៉ុន។
ប្រធានាធិបតីសហរដ្ឋអាមេរិកលោក Joe Biden និងនាយករដ្ឋមន្ត្រីជប៉ុនលោក Fumio Kishida បានថ្កោលទោសការបាញ់មីស៊ីលរបស់កូរ៉េខាងជើងនេះនៅក្នុងការសន្ទនាគ្នាតាមទូរស័ព្ទកាលពីថ្ងៃអង្គារ។ នេះបើយោងតាមសេចក្ដីថ្លែងការណ៍របស់សេតវិមាន។
សេតវិមានបានលើកឡើងនៅក្នុងសេចក្ដីថ្លែងការណ៍នោះដូច្នេះថា៖ «មេដឹកនាំទាំងពីរបានរួមគ្នាថ្កោលទោសខ្លាំងក្លាបំផុតលើការសាកល្បងមីស៊ីលរបស់កូរ៉េខាងជើងនេះ ដោយទទួលស្គាល់ការបាញ់មីស៊ីលនេះថាជាគ្រោះថ្នាក់ចំពោះប្រជាពលរដ្ឋជប៉ុន ធ្វើឱ្យមានអស្ថិរភាពដល់តំបន់ និងជាការរំលោភយ៉ាងជាក់ច្បាស់លើសេចក្ដីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ»៕
ព័ត៌មានខ្លះនៅក្នុងសេចក្ដីរាយការណ៍នេះត្រូវបានដកស្រង់មកពីទីភ្នាក់ងារព័ត៌មាន Associated Press ទីភ្នាក់ងារព័ត៌មាន AFP និងទីភ្នាក់ងារព័ត៌មាន Reuters។
អាមេរិកនិងកូរ៉េខាងត្បូងបាញ់មីស៊ីលចូលសមុទ្រដើម្បីឆ្លើយតបនឹងការបាញ់មីស៊ីលរបស់កូរ៉េខាងជើងកាត់ពីលើជប៉ុន
ទីក្រុងសេអ៊ូល ប្រទេសកូរ៉េខាងត្បូង —
