រដ្ឋាភិបាលជប៉ុនបានបញ្ជាក់នៅថ្ងៃអង្គារនេះថា ប្រទេសកូរ៉េខាងជើងបានបាញ់គ្រាប់ផ្លោងមីស៊ីលដែលគេមិនស្គាល់ប្រភេទមួយគ្រាប់កាត់ពីលើប្រទេសជប៉ុន ដែលនេះគឺជាការបង្កហេតុមួយដែលគេមិនដែលឃើញក្នុងពេលជាច្រើនឆ្នាំកន្លងមកនេះ។ ការបាញ់នេះបានជំរុញឱ្យរដ្ឋាភិបាលជប៉ុនជម្លៀសពលរដ្ឋមួយចំនួននៅក្នុងអាណាខេត្ត Hokkaido និងអាណាខេត្ត Aomori នៅភាគខាងជើងប្រទេសនៅព្រឹកថ្ងៃអង្គារនេះ។
ប្រធានគណៈរដ្ឋមន្ត្រីជប៉ុនលោក Hirokazu Matsuno បានប្រាប់អ្នកកាសែតថា មីស៊ីលនេះត្រូវបានបាញ់នៅវេលាម៉ោង ៧ និង ២២ នាទីព្រឹកនៅថ្ងៃអង្គារនេះ មុនពេលធ្លាក់ចូលទៅក្នុងមហាសមុទ្រប៉ាស៊ីហ្វិកនៅក្រៅតំបន់សេដ្ឋកិច្ចពិសេសរបស់ប្រទេសជប៉ុនក្នុងរយៈពេល ២២ នាទីក្រោយមក។
ក្រុមនាយសេនាធិការកងទ័ពប្រទេសកូរ៉េខាងត្បូងបានបញ្ជាក់ថា មីស៊ីលរបស់កូរ៉េខាងជើងនេះគឺជាគ្រាប់ផ្លោងមីស៊ីលរយៈចម្ងាយធម្យម (IRBM) ដែលបាញ់ចេញពីតំបន់ Jagang នៅភាគខាងជើងប្រទេសកូរ៉េខាងជើង និងហោះបានចម្ងាយ ៤.៥០០ គីឡូម៉ែត្រក្នុងរយៈកម្ពស់ ៩៧០ គីឡូម៉ែត្រ។
នាយករដ្ឋមន្ត្រីជប៉ុនលោក Fumio Kishida បានថ្កោលទោសខ្លាំងក្លាលើការបាញ់មីស៊ីលនេះ ដោយបានហៅការបាញ់នេះថាជាសកម្មភាព «ហួសហេតុ»។
រដ្ឋមន្ត្រីការពារជាតិជប៉ុនលោក Yasukazu Hamada បាននិយាយថា មីស៊ីលនេះបានហោះពីលើប្រទេសជប៉ុនរយៈពេលប្រហែល ១ នាទី ដោយហោះបានចម្ងាយប្រហែល ៤.៦០០ គីឡូម៉ែត្រ ដែលមានចម្ងាយឆ្ងាយជាងមីស៊ីលរយៈចម្ងាយមធ្យមកាលពីលើកមុនៗ មុនពេលធ្លាក់ចូលទៅក្នុងសមុទ្រនៅចម្ងាយប្រមាណ ៣.២០០ គីឡូម៉ែត្រពីភាគខាងកើតប្រទេសជប៉ុន។
កាលពីចុងខែមករាកន្លងទៅនេះ ប្រទេសកូរ៉េខាងជើងបានសាកល្បងគ្រាប់ផ្លោងមីស៊ីលរយៈចម្ងាយធម្យមប្រភេទ Hwasong-12។ បន្ទាប់ពីការសាកល្បងនេះមក ប្រព័ន្ធផ្សព្វផ្សាយរដ្ឋរបស់កូរ៉េខាងជើងបានពន្យល់ថា គន្លងហោះហើរនៃមីស៊ីលនេះគឺធ្វើឡើងដោយ «គិតគូរអំពីសន្តិសុខរបស់ប្រទេសជិតខាង»។ ប៉ុន្តែសម្រាប់ការបាញ់លើកនេះហាក់ដូចជាខុសពីការលើកឡើងនេះ ដោយមីស៊ីលនេះបានហោះកាត់ពីលើប្រទេសជប៉ុនប្រហែល ១ នាទី ដូចដែលរដ្ឋមន្ត្រីការពារជាតិជប៉ុនបានបញ្ជាក់ខាងលើ៕
