ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

លោក​ ហ៊ុន សែន ​ថ្កោល​ទោស​ការ​បាញ់​មីស៊ីល​របស់​កូរ៉េ​ខាង​ជើង​ឆ្លង​កាត់​ប្រទេស​ជប៉ុន


រូបឯកសារ៖ លោកនាយករដ្ឋមន្ត្រី ហ៊ុន សែន ស្ថិត​នៅក្នុងជំនួបជាមួយរដ្ឋមន្ត្រីការបរទេសរុស្ស៊ី នៅវិមានសន្តិភាព ក្នុងរាជធានីភ្នំពេញ កាលពីថ្ងសទី ៤ ខែសីហា ឆ្នាំ ២០២២។ (Photo by HANDOUT / RUSSIAN FOREIGN MINISTRY / AFP)
រូបឯកសារ៖ លោកនាយករដ្ឋមន្ត្រី ហ៊ុន សែន ស្ថិត​នៅក្នុងជំនួបជាមួយរដ្ឋមន្ត្រីការបរទេសរុស្ស៊ី នៅវិមានសន្តិភាព ក្នុងរាជធានីភ្នំពេញ កាលពីថ្ងសទី ៤ ខែសីហា ឆ្នាំ ២០២២។ (Photo by HANDOUT / RUSSIAN FOREIGN MINISTRY / AFP)

លោក​នាយក​រដ្ឋមន្រ្តី ​ហ៊ុន សែន ​បាន​ថ្កោល​ទោស​ចំពោះ​ការ​បាញ់​មីស៊ីល​របស់​កូរ៉េ​ខាង​ជើង​ឆ្លង​កាត់​ប្រទេស​ជប៉ុន ​កាល​ពី​ថ្ងៃ​អង្គារ ​ដែល​កំពុង​បង្ក​ការ​ព្រួយ​បារម្ភ​ក្នុង​ប្រទេស​ជប៉ុន។​

លោក ​ហ៊ុន សែន ​បាន​លើក​ឡើង​បែប​នេះ​ក្នុង​ពេល​ជួប​ពិភាក្សា​ទ្វេ​ភាគី​ជាមួយ​សម​ភាគី​របស់​លោក ​គឺ​លោក ​ម៉ានូអែល ម៉ារ៉េរ៉ូ គ្រុស ​(Manuel Marrero Cruz)​ នាយក​រដ្ឋមន្រ្តី​ប្រទេស​គុយបា ​ដែល​បាន​មក​បំពេញ​ទស្សន​កិច្ច​នៅ​កម្ពុជា ​កាល​ពី​ថ្ងៃ​ទី៤ ​ខែ​តុលា ​ឆ្នាំ​២០២២។ ​នេះ​បើ​តាម​សេចក្តី​ប្រកាស​ព័ត៌មាន​របស់​ក្រសួង​ការ​បរទេស​កម្ពុជា ​ចុះ​ថ្ងៃទី​៥ ​ខែ​តុលា ​ឆ្នាំ​២០២២។​

បើ​តាម​សេចក្តី​ប្រកាស​ព័ត៌មាន ​លោក ​ហ៊ុន សែន ​បាន​ប្រាប់​សម​ភាគី​របស់​លោក​ថា​ លោក​«សោក​ស្តាយ»​ចំពោះ​ការ​បាញ់​មីស៊ីល ​និង​«ថ្កោល​ទោស»​ចំពោះ​ការ​បាញ់​នេះ។ ​

សេចក្តី​ប្រកាស​ព័ត៌មាន​បញ្ជាក់​ថា៖​ «សម្តេច​តេជោ​នាយក​រដ្ឋមន្ត្រី​បាន​មាន​ប្រសាសន៍​ថា ​ឥរិយាបទ​របស់​សាធារណ​រដ្ឋ​ប្រជា​មានិត​ប្រជា​ធិបតេយ្យ​កូរ៉េ​គឺ​ប្រកប​ដោយ​គ្រោះ​ថ្នាក់ ​និង​ជា​ការ​បំពាន​មួយ​ទៀត​ទៅ​លើ​សេចក្តី​សម្រេច​នៃ​ក្រុម​ប្រឹក្សា​សន្តិសុខ​អង្គការ​សហ​ប្រជាជាតិ»។​

នាយក​រដ្ឋមន្ត្រី​ជប៉ុន ​លោក ​Fumio Kishida ​ក៏​បាន​ថ្កោល​ទោស​ខ្លាំង​ក្លា​លើ​ការ​បាញ់​មីស៊ីល​នេះ​ដែរ​ ហើយ​បាន​ចាត់​ទុក​ថា​ វា​ជា​សកម្មភាព​«ហួសហេតុ»។​ ការ​បាញ់​នេះ​បាន​ជំរុញ​ឱ្យ​រដ្ឋាភិបាល​ជប៉ុន​ជម្លៀស​ពលរដ្ឋ​មួយ​ចំនួន​នៅ​ក្នុង​ខេត្ត ​Hokkaido ​និង​ខេត្ត ​Aomori ​នៅ​ភាគ​ខាង​ជើង​ប្រទេស ​កាល​ពី​ព្រឹក​ថ្ងៃ​អង្គារ៕

XS
SM
MD
LG