សវនាការជំនុំជម្រះក្តីរបស់អតីតប្រធានាធិបតីសហរដ្ឋអាមេរិកលោក Donald Trump ពីបទញុះញង់ឲ្យមានអំពើហិង្សា បានបញ្ចប់នៅរសៀលថ្ងៃសៅរ៍ ម៉ោងនៅសហរដ្ឋអាមេរិក បន្ទាប់ពីសមាជិកព្រឹទ្ធសភាសហរដ្ឋអាមេរិកចំនួន ១០០ នាក់ បានបោះឆ្នោតក្នុងសំឡេង ៥៧ ទល់នឹង ៤៣។
លទ្ធផលនៃសំឡេងឆ្នោតនេះ បានកំណត់ថា លោក Trump «មិនមានទោស» ពីបទចោទប្រកាន់ពីការញុះញង់ឲ្យមានអំពើហិង្សានៅវិមានសភាសហរដ្ឋអាមេរិក កាលពីថ្ងៃទី ៦ ខែមករានោះទេ។
សមាជិកព្រឹទ្ធសភាមកពីខាងគណបក្សសាធារណរដ្ឋចំនួន ៧ នាក់ បានចូលរួមជាមួយសមាជិកព្រឹទ្ធសភាមកពីខាងគណបក្សប្រជាធិបតេយ្យចំនួន ៥០ នាក់ (សរុប ៥៧ នាក់) ដោយបានបោះឆ្នោតថា លោក Trump មានទោស។
ក៏ប៉ុន្តែសំឡេងឆ្នោតនេះ (៥៧ សំឡេង) មិនគ្រប់គ្រាន់ដើម្បីផ្តន្ទាទោសលោក Trump ពីបទញុះញង់ឲ្យមានអំពើហិង្សានោះទេ។ ព្រឹទ្ធសភាត្រូវការសំឡេងឆ្នោតយ៉ាងតិច ៦៧ សំឡេង ឬ ២ ភាគ ៣ ដើម្បីអាចផ្ដន្ទាទោសលោក Trump បាន។
នៅក្នុងដំណើរការសវនាការជំនុំជម្រះក្តីលោក Trump ពីបទញុះញង់ឲ្យមានអំពើហិង្សានៅវិមានសភាសហរដ្ឋអាមេរិក កាលពីថ្ងៃទី ៦ ខែមករា ក្រុមប្រជាធិបតេយ្យបានអះអាងថា លោក Trump បានបង្កឲ្យមានការវាយប្រហារហិង្សានេះ ដោយបានលើកឡើងម្តងហើយម្តងទៀត ពីការអះអាងដែលមិនពិត ថា ការបោះឆ្នោតត្រូវបានលួចបន្លំ ហើយថា លោក Trump បានអំពាវនាវដល់ក្រុមអ្នកគាំទ្ររូបលោក ឲ្យ «តស៊ូយ៉ាងខ្លាំងក្លា» មុននឹងពួកគេបានលុកលុយវិមានសភា។
ក្រុមប្រជាធិបតេយ្យបានអះអាងថា លោក Trump មាន «គោលបំណងពិតប្រាកដ» ស្របពេលដែលលោកបានជំរុញឲ្យក្រុមអ្នកគាំទ្ររូបលោក ដើរទៅរកអំពើហិង្សា។
ដោយឡែក ក្រុមមេធាវីការពារក្តីរបស់លោក Trump បានអះអាងថា សវនាការជំនុំជម្រះក្តីនេះ ត្រូវបានធ្វើឡើងដោយសារតែ «ភាពស្អប់ខ្ពើម» របស់ក្រុមប្រជាធិបតេយ្យមកលើលោក Trump ហើយថា សវនាការនេះបានធ្វើឡើងដោយរំលោភរដ្ឋធម្មនុញ្ញ ពីព្រោះលោក Trump បានចាកចេញពីតំណែងរួចទៅហើយ។
ក្រុមមេធាវី បាននិយាយថា ក្រុមកុបករបានប្រព្រឹត្ត [អំពើហិង្សា] ដោយខ្លួនឯង បើទោះបីជាមានពាក្យសម្តីរបស់លោក Trump ក្តី។ ក្រុមមេធាវីក៏បានអះអាងថា លោក Trump មានសិទ្ធិក្នុងការបញ្ចេញមតិ ហើយថា ការកាត់ទោសលោក Trump ដោយផ្អែកលើពាក្យសម្តីដែលលោកបាននិយាយនោះ អាចកំណត់មាគ៌ាដ៏គ្រោះថ្នាក់មួយ៕
