នៅពេលតែប៉ុន្មានម៉ោងក្រោយពីព្រឹទ្ធសភាស.រ.អា.ដឹកនាំដោយពួកសាធារណរដ្ឋបានបោះឆ្នោតចាប់ផ្តើមការជជែកដេញដោលគ្នាអំពីការលុបចោលច្បាប់ថែរក្សាសុខភាពរបស់លោកអតីតប្រធានាធិបតីបារ៉ាក់ អូបាម៉ា ព្រឹទ្ធសភាបានច្រានចោលសេចក្តីព្រាងច្បាប់ទូលំទូលាយមួយដែលមានគោលដៅលុបចោលច្បាប់របស់លោកអូបាម៉ា។
កាលពីយប់ថ្ងៃអង្គារពួកសមាជិកព្រឹទ្ធសភាបានបោះឆ្នោត៤៣សំឡេងទល់នឹង៥៧សំឡេងអំពីវិធានការព្រាងដោយលោក Mitch McConnell មេដឹកនាំក្រុមភាគច្រើនដែលនឹងបញ្ចប់ការពង្រីកកម្មវិធី Medicaid ដែលជាកម្មវិធីផ្តល់ការធានារ៉ាប់រងខាងការថែរក្សាសុខភាពសម្រាប់ប្រជារាស្ត្រអាមេរិកាំងក្រីក្រ កាត់បន្ថយការផ្តល់ប្រាក់ជំនួយបង្គ្រប់ដើម្បីជួយក្រុមជនមានប្រាក់ចំណូលទាបឱ្យទិញផែនការធានារ៉ាប់រងសុខភាពឯកជន និងលុបចោលការពិន័យខាងពន្ធដារដល់ពួកជនទាំងឡាយណាដែលមិនបានទិញការធានារ៉ាប់រងខាងសុខភាព។
វិធានការនេះក៏មានរួមបញ្ចូលផងដែរនូវវិសោធនកម្មមួយដោយលោក Ted Cruz អ្នកសាធារណរដ្ឋមកពីរដ្ឋ Texas ដែលនឹងអនុញ្ញាតឱ្យពួកអ្នកធានារ៉ាប់រងខាងសុខភាពផ្តល់ផែនការមិនសូវប្រកបដោយសប្បុរសធម៌ជាងផែនការដែលបានតម្រូវតាមច្បាប់ Affordable Care Act ហៅកាត់ថា ACA។
ការបោះឆ្នោតកាលពីយប់ថ្ងៃអង្គារជាការបោះឆ្នោតទីមួយក្នុងបណ្តាការបោះឆ្នោតជាច្រើនដែលនឹងមានធ្វើក្នុងសប្តាហ៍នេះនៅក្នុងការខិតខំប្រឹងប្រែងច្រើនឆ្នាំមកហើយរបស់គណបក្សសាធារណរដ្ឋដើម្បីលុបចោល និងបង្កើតកម្មវិធីមួយជំនួសច្បាប់ ACA ដែលគេស្គាល់ថាកម្មវិធី Obamacare ផងដែរ៕
