ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ព្រឹទ្ធសភា​អាមេរិក​បរាជ័យ​ជា​ថ្មី​នៅ​ក្នុង​ការ​ព្រមព្រៀង​លើ​សំណើ​ច្បាប់​ថវិកា​ទាក់ទិន​នឹង​ជំងឺ COVID-19


លោក Mitch McConnell ថ្លែង​ទៅ​កាន់​អ្នក​សារព័ត៌មាន​នៅ​ខាង​ក្រៅ​ព្រឹទ្ធសភា​ បន្ទាប់​ពី​គណបក្ស​សាធារណរដ្ឋ​រារាំង​ដល់​សំណើ​ផ្តល់​កញ្ចប់​ជំនួយ​ដើម្បី​ទប់ស្កាត់​មេរោគ​កូរ៉ូណា នៅ​វិមាន​សភា Capitol Hill កាលពី​ថ្ងៃទី២៣ ខែមីនា ឆ្នាំ២០២០។

មេដឹកនាំ​ខាង​គណបក្ស​ប្រជាធិបតេយ្យ​នៃ​ព្រឹទ្ធសភា​លោក Chuck Schumer និង​រដ្ឋមន្ត្រី​ក្រសួង​ហិរញ្ញវត្ថុ​សហរដ្ឋ​អាមេរិក​លោក Steven Mnuchin បាន​និយាយ​ថា ពួកគេ​សង្ឃឹម​ថា​អាច​សម្រេច​បាន​នូវ​កិច្ច​ព្រមព្រៀង​លើ​កញ្ចប់​ថវិការ​សេដ្ឋកិច្ច​ក្នុង​ទឹក​ប្រាក់ ២ លាន​លាន​ដុល្លារ​នៅ​ថ្ងៃ​អង្គារ​នេះ។

លោក​ទាំង​ពីរ​បាន​ពិភាក្សា​គ្នា​រហូត​ដល់​យប់​ថ្ងៃ​ចន្ទ​ម្សិលមិញ បន្ទាប់ពី​ព្រឹទ្ធសភា​បរាជ័យ​ជា​លើក​ទី​ពីរ​នៅ​ក្នុង​ការ​សម្រេច​លើ​សំណើ​ច្បាប់​មួយ ដែល​អនុញ្ញាត​ឲ្យ​មាន​ការ​បញ្ជូន​លុយ​ទៅ​ឲ្យ​ពលរដ្ឋ​អាមេរិកាំង​ភាគ​ច្រើន និង​អាជីវកម្ម​ជា​ច្រើន ដែល​បាន​រង​ផល​ប៉ះពាល់​ធ្ងន់ធ្ងរ​ដោយសារ​មេរោគ​កូរ៉ូណា​ថ្មី​ដ៏​កាច​សាហាវ។

ថ្នាក់​ដឹកនាំ​ខាង​គណបក្ស​សាធារណរដ្ឋ និង​ថ្នាក់​ដឹកនាំ​ខាង​គណបក្ស​ប្រជាធិបតេយ្យ បាន​ជជែក​គ្នា​តឹង​សរសៃ​ក នៅ​ពេល​ដែល​ដំណើរការ​នេះ​លាត​ត្រដាង​ឡើង​ក្នុង​ពេល​ប៉ុន្មាន​ថ្ងៃ​ថ្មីៗ​នេះ ដោយ​មេដឹកនាំ​ខាង​គណបក្ស​សាធារណរដ្ឋ​នៃ​ព្រឹទ្ធសភា​លោក Mitch McConnell បាន​ចោទ​ប្រកាន់​គណបក្ស​ប្រជាធិបតេយ្យ​ថា​បាន​ពន្យារពេល​ដំណើរការ​នេះ ដោយសារ​បាន​ស្នើ​ឲ្យ​មាន​ការ​កែ​សម្រួល​សំណើ​ច្បាប់​នេះ ហើយ​ចំណែក​ឯ​លោក Chuck Schumer វិញ បាន​និយាយ​ថា លោក McConnell បាន​ខ្ជះខ្ជាយ​ពេលវេលា ដោយ​បើក​ឲ្យ​មាន​ការ​បោះ​ឆ្នោត​សម្រេច​ពីរ​ដង​លើ​សំណើ​ច្បាប់ ដែល​លោក​បាន​ថា​នឹង​មិន​ទទួល​ជោគជ័យ​នេះ។

កញ្ចប់​ថវិកា​ជំនួយ​នេះ​មាន​បំណង​បង្កើន​សេដ្ឋកិច្ច​របស់​សហរដ្ឋ​អាមេរិក ដោយ​ការ​ផ្ញើ​លុយ​ទៅ​ឲ្យ​ពលរដ្ឋ​អាមេរិកាំង​ជាង ៩០ ភាគរយ និង​កន្លែង​អាជីវកម្ម​ជា​ច្រើន ដើម្បី​ជួយ​ពួកគេ​នៅ​ក្នុង​ការ​ទ្រាំទ្រ​នឹង​ផល​ប៉ះពាល់​ផ្នែក​សេដ្ឋកិច្ច​បន្ទាន់ និង​កើន​ឡើង​យ៉ាង​ឆាប់ ដោយដារ​មេរោគ​កូរ៉ូណា​ថ្មី។

ក្រុម​គ្រួសារ​អាមេរិកាំង​ដែល​មាន​សមាជិក ៤ នាក់ នឹង​ទទួល​បាន​ថវិកា​ជំនួយ​ចំនួន ៣.០០០ ដុល្លារ។ កញ្ចប់​ថវិកា​នេះ​ក៏​មាន​បញ្ចូល​នូវ​កម្មវិធី​ផ្ដល់​ប្រាក់​កម្ចី​ចំនួន ៥០០ ពាន់​លាន​ដុល្លារ​ដល់​កន្លែង​អាជីវកម្ម ទីក្រុង និង​រដ្ឋ​នានា និង​ទឹក​ប្រាក់​ចំនួន ៣៥០ ពាន់​លាន​ដុល្លារ​ទៀត​ដើម្បី​ជួយ​អាជីវកម្ម​តូចៗ​ទប់ទល់​នឹង​ការ​បើក​ប្រាក់​ខែ​ដល់​បុគ្គលិក នៅ​ចំ​ពេល​មាន​ការ​ធ្លាក់​ចុះ​នូវ​តម្រូវការ​របស់​អ្នក​ប្រើប្រាស់​ចំពោះ​ផលិតផល និង​សេវាកម្ម​របស់​អាជីវកម្ម​ទាំង​នេះ៕

XS
SM
MD
LG