ប្រជុំកោះដែលបង្កើតឡើងសម្រាប់គោលបំណងខាងយោធារបស់ចិននៅក្នុងសមុទ្រចិនខាងត្បូង នឹងមិនបន្លាចសហរដ្ឋអាមេរិកដែលកំពុងសន្យាបន្តធ្វើនាវាចរណ៍ដោយសេរីទេ ថ្វីបើការគំរាមកំហែងកើនឡើងក៏ដោយ។
លោកឧត្តមសេនីយ៍ឯកកងនាវាមុជទឹក Kenneth McKenzie នាយអគ្គសេនាធិការបាននិយាយកាលពីថ្ងៃព្រហស្បតិ៍សប្តាហ៍មុន នៅពេលដែលគេសួរថាតើសហរដ្ឋអាមេរិកអាចកម្ទេចកោះណាមួយដែលចិនបង្កើតឡើង។
លោកឧត្តមសេនីយ៍ McKenzie បាននិយាយថា៖ «យើងមានបទពិសោធន៍យ៉ាងច្រើននៅក្នុងសង្គ្រាមលោកលើកទី២ដើម្បីកម្ទេចប្រជុំកោះតូចៗដែលនៅដាច់ពីគេ។ ដូច្នេះ នេះជាសមត្ថភាពយ៉ាងខ្លាំងមួយរបស់កងទ័ពសហរដ្ឋអាមេរិក»។ ទោះជាយ៉ាងណាក៏ដោយ លោកឧត្តមសេនីយ៍និយាយបន្ថែមទៀតថា ចិនមិនត្រូវបកស្រាយអ្វីច្រើនក្រៅ ពីធ្វើសេចក្តីថ្លែងការណ៍បង្ហាញពីការពិតជាក់ស្តែងនៃប្រវត្តិសាស្រ្តនោះទេ។
នាវាសហរដ្ឋអាមេរិកបានធ្វើសមយុទ្ធជាបន្តបន្ទាប់ដែលមានគោលបំណងជំទាស់ប្រឆាំងការទាមទារបស់ចិនថា ផ្នែកនានានៃសមុទ្រចិនខាងត្បូងជាផ្នែកមួយនៃទឹកដីរបស់ខ្លួន។ កាលពីពេលថ្មីៗនេះ នាវាចំបាំង២គ្រឿងរបស់សហរដ្ឋអាមេរិកបានធ្វើដំណើរនៅជិតប្រជុំកោះ Paracel នៅផ្ទៃទឹកទល់មុខឆ្នេរសមុទ្រវៀតណាម។
ចិនបានចោទសួរពីកិច្ចប្រតិបត្តិការកាលពីព្រឹកថ្ងៃព្រហស្បតិ៍សប្តាហ៍មុនដែលបានហៅការអះអាងថា ចិនធ្វើសកម្មភាពខាងយោធាក្នុងសមុទ្រចិនខាងត្បូងនោះ«ជាការគួរឲ្យអស់សំណើច»។
លោកស្រី Hua Chunying អ្នកនាំពាក្យក្រសួងការបរទេសចិនបាននិយាយក្នុងអំឡុងនៃសន្និសីទកាសែតថា៖ «វោហាសាសន៍នេះដូចជាករណីចោរស្រែកហៅឲ្យគេបញ្ឈប់ចោរដើម្បីបិទបាំងអំពើអាក្រក់របស់ខ្លួន»។
លោកស្រីអ្នកនាំពាក្យក្រសួងការបរទេសចិននិយាយទៀតថា៖ «វត្តមានយោធាសហរដ្ឋអាមេរិកក្នុងសមុទ្រចិនខាងត្បូងកំពុងរីកកាន់តែធំឡើងជាងវត្តមានចិននិងប្រទេសផ្សេងៗទៀតនៅជុំវិញសមុទ្រនោះ»។
ពួកមន្រ្តីយោធាសហរដ្ឋអាមេរិកនិយាយថា ចិនបានដឹកកាំជ្រួចមីស៊ីលបាញ់ពីដីទៅអាកាសហើយនឹងកាំជ្រួចមីស៊ីលការពារដែនអាកាសដែលមានសមត្ថភាពបាញ់ទៅលើប្រជុំកោះនៅក្នុងសមុទ្រចិនខាងត្បូង។
កាលពីដើមសប្តាហ៍មុន លោក Jim Mattisរដ្ឋមន្ត្រីការពារប្រទេសសហរដ្ឋអាមេរិកបានរិះគន់ការស្ថាបនាខាងយោធារបស់ចិននៅក្នុងតំបន់។
លោក Mattis រដ្ឋមន្រ្តីការពារសហរដ្ឋអាមេរិកបានប្រាប់ពួកអ្នកយកព័ត៌មានដោយបានចោទប្រកាន់រដ្ឋាភិបាលក្រុងប៉េកាំងពីការមិនគោរពពាក្យសន្យាឆ្នាំ២០១៥ ដោយប្រធានាធិបតី ស៊ី ជីងពីង ចំពោះលោក បារ៉ាក់ អូបាម៉ា ដែលកាលនោះជាប្រធានាធិបតីសហរដ្ឋអាមេរិក។
លោករដ្ឋមន្រ្តីការពារប្រទេសអាមេរិក Mattis ក៏បាននិយាយដែរថា ចិនជាប្រទេសតែមួយគត់ដែលហាក់ដូចជាចាត់វិធានការយ៉ាងសកម្មដើម្បីច្រានចោលសេរីភាពនៃកិច្ចប្រតិបត្តិការនៃការធ្វើនាវាចរណ៍ក្នុងផ្ទៃទឹកអន្តរជាតិ។
លោករដ្ឋមន្រ្តីការពារប្រទេសអាមេរិកបាននិយាយខណៈដែលកំពុងធ្វើដំណើរទៅកាន់ប្រទេសសិង្ហបុរីដើម្បីចូលរួមការសន្ទនាប្រចាំឆ្នាំហៅថា Shangri –La ដែលជាជំនួបមួយរបស់ពួកមន្រ្តីការពារប្រទេសអាស៊ី និងមេដឹកនាំប្រទេសផ្សេងៗទៀត។
អត្ថាធិប្បាយរបស់លោករដ្ឋមន្រ្តីការពារប្រទេសបានកើតមានឡើងនៅពេលដែលមន្ទីរបញ្ចកោណ កាលពីសប្តាហ៍មុនបានលុបចោលសេចក្តីអញ្ជើញឲ្យចិនចូលរួមក្នុងសម យុទ្ធនាវា RIMPAC នៅចុងឆ្នាំនេះដោយលើកហេតុផលពីអាកប្បកិរិយារបស់ចិនក្នុងសមុទ្រចិនខាងត្បូង។
អ្នកនាំពាក្យក្រសួងការពារប្រទេសចិន បានច្រានចោលការចោទប្រកាន់របស់លោករដ្ឋមន្រ្តីការពារប្រទេសអាមេរិក Mattis កាលពីថ្ងៃព្រហស្បតិ៍សប្តាហ៍មុន ក៏ប៉ុន្តែ បាននិយាយថា ចំណងទាក់ទងរវាងរដ្ឋាភិបាលក្រុងប៉េកាំងនិងវ៉ាស៊ីនតោនមានស្ថិរភាពយ៉ាងខ្លាំង ថ្វីបើមានការចោទប្រកាន់គ្នាទៅវិញទៅមកក៏ដោយ។
លោក Ren Guoqiang អ្នកនាំពាក្យក្រសួងការពារប្រទេសចិនក៏បានសម្តែងនូវក្តីសង្ឃឹមដែរថា លោក Mattis រដ្ឋមន្រ្តីការពារប្រទេសអាមេរិកនឹងបំពេញទស្សនៈកិច្ចប្រទេសចិននៅអនាគតឆាប់ៗនេះ។
អ្នកនាំពាក្យការពារប្រទេសចិនបាននិយាយទៀតថា៖ «ភាគីទាំង២បានរក្សាការទាក់ទងនិងសម្របសម្រួលគ្នាជាប្រចាំ»៕
ប្រែសម្រួលដោយ ជឹង ប៉ូជីន
