លោករដ្ឋមន្ត្រីការបរទេសសហរដ្ឋអាមេរិក ចន ឃែរី (John Kerry) កំពុងរៀបចំធ្វើដំណើរទៅតំបន់មជ្ឈិមបូព៌ាដើម្បីទៅស្វែងរកមធ្យោបាយជួយឱ្យមានភាពស្ងប់ស្ងាត់ឡើងវិញក្នុងពេលមានរលកហិង្សារវាងជនជាតិប៉ាឡេស្ទីន និងអ៊ីស្រាអែល។
លោកចន ឃឺប៊ី (John Kirby) អ្នកនាំពាក្យក្រសួងការបរទេសបានបញ្ជាក់ថា អ្វីដែលលោករដ្ឋមន្ត្រីមានចំណាប់អារម្មណ៍ខ្លាំង និងបន្ទាន់គឺកាត់បន្ថយហិង្សា ជួយរក្សាភាពស្ងប់ស្ងាត់ និងស្វែងរកមធ្យោបាយក្នុងការជួយស្វែងរកដំណោះស្រាយមួយសម្រាប់រដ្ឋទាំងពីរ។
ក្នុងចំណោមហិង្សានាពេលថ្មីៗនេះ រួមមានករណីដែលប៉ូលិសអ៊ីស្រាអែលបានបាញ់សម្លាប់ជនប៉ាឡេស្ទីនម្នាក់កាលពីថ្ងៃពុធដោយសារជននោះបានចាក់ស្ត្រីអ៊ីស្រាអែលអាយុ៧០ឆ្នាំនៅខាងក្រៅស្ថានីយ៍រថយន្តក្រុងនៅទីក្រុងហ្ស៊េរុយសាឡិម (Jerusalem)។
ជនប៉ាឡេស្ទីនម្នាក់ទៀតត្រូវបានសម្លាប់នៅពេលបុរសនោះព្យាយាមចាក់ប៉ូលិសម្នាក់នៅឯផ្លូវចូលក្រុង Old City នៃទីក្រុងហ្ស៊េរុយសាឡិម។
ប្រទេសអ៊ីស្រាអែលបានដាក់ពង្រាយយោធាជាច្រើនរយនាក់នៅទូទាំងប្រទេសដើម្បីជួយប៉ូលិសទប់ទល់នឹងការគំរាមកំហែងពីការវាយប្រហាររបស់ជនជាតិប៉ាឡេស្ទីន៕
