ឯកអគ្គរដ្ឋទូតសហរដ្ឋអាមេរិកប្រចាំអង្គការសហប្រជាជាតិលោកស្រី Nikki Haley បានចោទប្រកាន់រុស្ស៊ីពីបទក្លែងបន្លំអំពីទណ្ឌកម្មអន្តរជាតិប្រឆាំងនឹងកូរ៉េខាងជើងដោយបានចោទប្រកាន់ថារដ្ឋាភិបាលក្រុងមូស្គូកំពុងធ្វើឲ្យប៉ះពាល់ដល់កិច្ចខំប្រឹងប្រែងរបស់សហរដ្ឋអាមេរិកក្នុងការធ្វើមិនឲ្យមាននុយក្លេអ៊ែរនៅក្នុងឧទ្វីបកូរ៉េទាំងមូល។ លោកស្រី Haley បានថ្លែងនៅក្នុងកិច្ចប្រជុំក្រុមប្រឹក្សាសន្តិសុខអង្គការសហប្រជាជាតិកាលពីថ្ងៃចន្ទថា៖ «អំពើពុករលួយរបស់ប្រទេសរុស្ស៊ីដូចជាមេរោគអ៊ីចឹង។ វាកំពុងរារាំងដល់លទ្ធភាពរបស់យើងក្នុងការសម្រេចបានការធ្វើមិនមាននុយក្លេអ៊ែរទាំងស្រុងនៅក្នុងប្រទេសកូរ៉េខាងជើង»។
លោកស្រី Haley បានថ្លែងបន្តថាលោកស្រីមិនពេញចិត្តនឹងរបាយការណ៍របស់ក្រុមអ្នកជំនាញឯករាជ្យដែលត្រួតពិនិត្យលើការអនុវត្តការដាក់ទណ្ឌកម្មរបស់អង្គការសហប្រជាជាតិទេ។
សហរដ្ឋអាមេរិកបានផ្តល់ភស្តុតាងទៅដល់ក្រុមជំនាញការអំពីការរំលោភបំពានរបស់រុស្ស៊ី។ ប៉ុន្តែរបាយការណ៍ដែលក្រុមជំនាញបានបង្ហាញទៅកាន់សមាជិកក្រុមប្រឹក្សាបានលុបការរំលោភបំពាននានារបស់រុស្ស៊ី។
លោកស្រីឯកអគ្គរដ្ឋទូត Haley បានថ្លែងបន្តថា «ជាក់ស្តែងណាស់ រុស្ស៊ីបានគំរាមការពារការចេញផ្សាយរបាយការណ៍នេះ លុះត្រាតែមានការយល់ព្រមទៅលើសំណើឲ្យបិទបាំងភស្តុតាងរំលោភបំពានទាំងនេះ។ ហើយយើងមានការសោកស្តាយណាស់ដែលគណៈកម្មការយល់ព្រមទៅនឹងសំណើនេះ»។
លោកស្រី Haley បានថ្លែងបន្ថែមថាសហរដ្ឋអាមេរិកគ្មានជម្រើសណាក្រៅពីការទប់ស្កាត់ការផ្សព្វផ្សាយរបាយការណ៍ដែលគ្រោះថ្នាក់នេះទេ»។
លោកស្រី Haley បានប្រាប់សមាជិកក្រុមប្រឹក្សាថា «ផលលំបាកនានានៅក្នុងកិច្ចចរចាជាមួយកូរ៉េខាងជើងនៅបន្តកើតឡើង។ ជំនួបកំពូលរវាងលោក Trump និងលោក Kim បានបង្កើតផ្លូវឲ្យយើងដើរឆ្ពោះទៅមុខរហូតទាល់តែសម្រេចការធ្វើមិនឲ្យមាននុយក្លេអ៊ែរ ប៉ុន្តែយើងមិនទាន់ដើរទៅដល់ចំណុចនេះនៅឡើយទេ។ ហើយដើម្បីដើរទៅដល់ចំណុចនោះ យើងមិនត្រូវបញ្ឈប់ទណ្ឌកម្មដ៏ខ្លាំងក្លាដែលបានដាក់នៅទូទាំងពិភពលោកនោះទេ»៕
