វេទិកាពិភាក្សាដេញដោលចុងក្រោយបំផុតរបស់បេក្ខជនឈរឈ្មោះប្រធានាធិបតីអាមេរិកខាងគណបក្សសាធារណរដ្ឋកាលពីយប់ថ្ងៃព្រហស្បតិ៍ បានក្លាយទៅជាការពិភាក្សាដែលស្រែកគំហកដាក់គ្នា ដោយសារតែបេក្ខជនទាំងអស់ជជែកវែកញែកទៅលើបញ្ហាអន្តោប្រវេសន៍ខុសច្បាប់ គោលនយោបាយការបរទេសរបស់អាមេរិកនៅមជ្ឈិមបូព៌ា និងតម្លាភាពនៃប្រវត្តិបង់ពន្ធរបស់បេក្ខជននីមួយៗ។
លោកមហាសេដ្ឋីអចលនទ្រព្យ Donald Trump បានអះអាងម្តងហើយម្តងទៀតថា លោកនឹងមិនឲ្យប្រទេសម៉ិកស៊ិកចេញថ្លៃសាងសង់ជញ្ជាំងដែលលោកបានស្នើឡើងឲ្យសង់នៅព្រំប្រទល់អាមេរិកប៉ែកខាងត្បូង ដើម្បីដោះស្រាយបញ្ហាអន្តោប្រវេសន៍ខុសច្បាប់នោះទេ ហើយដោយសារតែមានការជំទាស់ពីក្រុមមេដឹកនាំប្រទេសម៉ិកស៊ិកចំពោះការសាងសង់ជញ្ជាំងនេះ លោកបាននិយាយថា ជញ្ជាំងនោះនឹងមានកម្ពស់ខ្ពស់ជាងមុនប្រហែល៣ម៉ែត្រ។
គូប្រជែងដ៏ប្រកៀកប្រកិតរបស់លោក គឺលោក Marco Rubio សមាជិកព្រឹទ្ធសភានៃរដ្ឋ Florida និងលោក Ted Cruz សមាជិកព្រឹទ្ធសភានៃរដ្ឋ Texas បានចោទប្រកាន់លោក Trump ថាបានប្រើកម្លាំងពលកម្មជនអន្តោប្រវេសន៍ខុសច្បាប់នៅក្នុងគម្រោងសាងសង់ល្បីៗមួយចំនួនរបស់លោក។ អ្នកទាំង២បាននិយាយថា លោក Trump ត្រូវបានគេបង្ខំឲ្យបង់ប្រាក់ពិន័យចំនួន១លានដុល្លារចំពោះការជួលជនអន្តោប្រវេសន៍ខុសច្បាប់។
ទាំងលោក Rubio និងលោក Cruz បានបង្ហាញពីឆន្ទៈរបស់ពួកគេក្នុងការបង្ហាញនូវប្រវត្តិបង់ពន្ធរបស់ពួកគេជាសាធារណៈ និងបានរិះគន់លោកTrump ចំពោះការបដិសេធមិនព្រមបង្ហាញឯកសារបង់ពន្ធរបស់លោកជាសាធារណៈ។ លោក Trump បានមានប្រសាសន៍ថា លោកនឹងបង្ហាញឯកសារបង់ពន្ធរបស់លោកជាផ្លូវការ ដរាបណាមានការធ្វើសវនកម្មជាទៀងទាត់មួយ។ ការបង្ហាញឯកសារបង់ពន្ធជាសាធារណៈគឺជាការអនុវត្តធម្មតាមួយសម្រាប់បេក្ខជនដែលឈរឈ្មោះជាប្រធានាធិបតីអាមេរិក៕
