នៅថ្ងៃច័ន្ទនេះ ប្រព័ន្ធផ្សព្វផ្សាយរបស់រដ្ឋក្នុងប្រទេសចិនបានផ្សាយមើលស្រាលទៅលើសារៈសំខាន់នៃជ័យជម្នះរបស់លោកស្រី Tsai Ing-wen ខាងគណបក្សវឌ្ឍនភាពប្រជាធិបតេយ្យដែលល្បីខ្ទរខ្ទារកាលពី ថ្ងៃសៅរ៏នោះ ដោយមានការបញ្ជាក់អំពីទំនាក់ទំនងរវាងរដ្ឋាភិបាលចិននិងរដ្ឋាភិបាលតៃវ៉ាន់នៅពេលអនាគតផង។
សារព័ត៌មាន The Global Times បានចុះផ្សាយថា មានការផ្តោតសំខាន់ទៅលើសេដ្ឋកិច្ច វិសមភាពសង្គមនិងអនាគតរបស់ក្មេងៗជំនាន់ក្រោយរបស់កោះតៃវ៉ាន់ច្រើនជាង។ ប៉ុន្តែសារព័ត៌មាន China Daily បានចុះផ្សាយជំរុញឲ្យលោកស្រី Tsai ទទួលយកកិច្ចព្រមព្រៀងឆ្នាំ១៩៩២ ស្តីពីការបង្រួបបង្រួមប្រទេសចិនតែមួយ ហើយព្រមានសហគមន៍អន្តរជាតិថា អ្វីៗដែលពាក់ព័ន្ធនឹងកោះតៃវ៉ា់ន់គឺជាកិច្ចការផ្ទៃក្នុងរបស់ប្រទេសចិនដែលប្រទេសចិនខ្លួនឯងជាអ្នកដោះស្រាយ។
លោក Bruce Jacobs ដែលជាអ្នកវិភាគពីកោះតៃវ៉ាន់នៃសាកលវិទ្យាល័យអូស្រ្តាលីមួយ ដែលមានឈ្មោះ Monash University បានថ្លែងប្រាប់លោកVictor Beatle នៃ VOA ពីទីក្រុងតៃប៉ិមកថា វាគឺជាជ័យជម្នះភ្លូកទឹកភ្លូកដីសម្រាប់គណបក្សវឌ្ឍនភាពប្រជាធិបតេយ្យ ទៅលើគណបក្សKuomintang ដែលជាគណបក្សកាន់អំណាចគាំទ្ររដ្ឋាភិបាលទីក្រុងប៉េកាំង ដែលដឹកនាំដោយលោកប្រធានាធិបតី Ma Ying-jeou នោះ។
ខណៈពេលជាមួយគ្នានេះដែរ លោក Joseph Wu ដែលជាអគ្គលេខាធិការនៃគណបក្សវឌ្ឍនភាពប្រជាធិបតេយ្យនឹងធ្វើដំណើរទស្សនកិច្ចមកកាន់រដ្ឋធានី Washington ក្នុងសប្តាហ៍នេះ ស្របពេលដែលអតីតអនុរដ្ឋមន្រ្តីការបរទេសសហរដ្ឋអាមេរិកលោក Bill Burns កំពុងតែស្ថិតនៅកោះតៃវ៉ាន់ ដើម្បីប្រជុំពិភាក្សាផ្តល់ការគាំទ្រពីភាគីអាមេរិកដល់កោះតៃវ៉ាន់ ក្នុងការបន្តរក្សាទំនាក់ទំនងរវាងរដ្ឋាភិបាលទាំង២ប្រកបដោយភាពរុងរឿង សន្តិភាពនិងស្ថិរភាព។
កាលពីថ្ងៃសៅរ៍ រដ្ឋាភិបាលទីក្រុង Washington បានអបអរសាទរលោកស្រី Tsai ចំពោះជ័យជម្នះនៃលទ្ធផលឆ្នោតរបស់លោកស្រី៕
