កាលពីថ្ងៃព្រហស្បតិ៍មន្ត្រីសុខាភិបាលស.រ.អ.បាននិយាយថាពួកគេបានរកឃើញករណីទីមួយនៃការឆ្លងមេរោគវីរុស Coronaពីមនុស្សទៅមនុស្សនៅក្នុងស.រ.អ.។
លោក Robert Redfield នៃមជ្ឈមណ្ឌលស.រ.អ.ខាងការត្រួតត្រានិងការបញ្ចៀសកុំឱ្យមានជំងឺដែលភាសាអង់គ្លេសហៅថា U.S. Centers for Disease Control and Prevention ហៅកាត់ថា CDCបាននិយាយថាបុរសម្នាក់ដែលមានផ្ទុកមេរោគនេះមានការប៉ះពាល់ជិតស្និទ្ធជាមួយប្រពន្ធលោកដែលបានធ្វើដំណើរទៅកាន់ក្រុង Wuhanប្រទេសចិនដែលជាតំបន់នៃការរាតត្បាតជំងឺនេះដែលបានបណ្តាលឱ្យមនុស្ស១៧០ស្លាប់។
លោក Redfield បានថ្លែងថាប្តីប្រពន្ធគូនេះជាអ្នកស្រុកក្រុង Chicago ក្នុងតំបន់ពាក់កណ្តាលខាងលិចស.រ.អ.។ បុរសនេះមិនបានធ្វើដំណើរទៅកាន់ប្រទេសចិនជាមួយប្រពន្ធលោកទេ។ នេះជាករណីទី៦នៃការផ្ទុកមេរោគកូរ៉ូណានៅក្នុងស.រ.អ.ដោយករណី៥ក្នុងបណ្តាករណីទាំងនេះមានទាក់ទិននឹងមនុស្សដែលបានវិលត្រឡប់មកកាន់ស.រ.អ.វិញក្រោយធ្វើដំណើរទៅកាន់ប្រទេសចិន។
បើតាមកាសែត Washington Post ថាកាលពីព្រឹកថ្ងៃព្រហស្បតិ៍ស.រ.អ.បានប្រកាសអំពីការបញ្ជូនយន្តហោះជើងហោះថ្មីៗទៅជម្លៀសជនជាតិអាមេរិកាំងដែលកំពុងឋិតនៅក្នុងក្រុងនេះនៅឡើយ។
ប្រធាននៃអង្គការសុខភាពពិភពលោកបាននិយាយថាលោកនឹងសម្រេចនៅថ្ងៃព្រហស្បតិ៍អំពីថាតើនឹងប្រកាសការរាតត្បាតនៃមេរោគវីរុសកូរ៉ូណាជាភាពអាសន្នសុខភាពសាកលឬទេ៕
