បាតុករបាននាំគ្នាតវ៉ានៅតាមដងផ្លូវមួយចំនួនតាមបណ្ដាទីក្រុងក្នុងសហរដ្ឋអាមេរិកដើម្បីទាមទារឲ្យមានការយកចិត្តទុកដាក់លើភាពអយុត្តិធម៌ជាតិសាសន៍។
បាតុកម្មនៅក្នុងទីក្រុង Portland រដ្ឋ Oregon បន្តធ្វើឡើងអស់រយៈពេលពីរខែមកហើយ ចាប់តាំងពីការស្លាប់របស់លោក George Floyd កាលពីថ្ងៃទី ២៥ ខែឧសភាមក។ លោក Floyd គឺជាបុរសស្បែកខ្មៅ ដែលបានស្លាប់ក្រោមសមត្ថកិច្ចប៉ូលិស ក្នុងទីក្រុង Minneapolis រដ្ឋ Minnesota។
រដ្ឋបាលរបស់លោកប្រធានាធិបតី Donald Trump បានបញ្ជូនកងកម្លាំងប៉ូលិសសហព័ន្ធទៅកាន់ទីក្រុង Portland ដើម្បីបង្ក្រាបបាតុករ ដែលធ្វើឲ្យបាតុកម្មកាន់តែមានសន្ទុះខ្លាំងឡើង។ បាតុករឥឡូវនេះកំពុងតែតវ៉ាប្រឆាំងនឹងវត្តមានកងកម្លាំងប៉ូលិសសហព័ន្ធនៅក្នុងទីក្រុងនេះ។
នៅក្នុងទីក្រុង Seattle រដ្ឋវ៉ាស៊ីនតោន ប៉ូលិសប្រើគ្រាប់បែកផ្សែងនិងឧស្ម័នបង្ហូរទឹកភ្នែកទៅលើហ្វូងបាតុករ និងបានចាប់ខ្លួនបាតុករចំនួន ៤៥ នាក់ កាលពីថ្ងៃសៅរ៍ បន្ទាប់ពីបាតុកម្មនៅក្នុងទីក្រុងនេះក្លាយទៅជាហិង្សា។ ប៉ូលិសបាននិយាយថា ប៉ូលិសជាង ២០ នាក់បានរងរបួស។
កាលពីយប់ថ្ងៃសៅរ៍នេះដែរ នៅក្នុងទីក្រុង Austin រដ្ឋ Texas បុរសម្នាក់បានស្លាប់ នៅពេលដែលមានជនម្នាក់បានបាញ់ទៅលើក្រុមបាតុករដែលតវ៉ាក្នុងបាតុកម្ម «ជីវិតពលរដ្ឋស្បែកខ្មៅមានតម្លៃ»។
គណនីប្រព័ន្ធផ្សព្វផ្សាយនានាបានឲ្យដឹងថា បុរសម្នាក់នោះប្រហែលជាបានដើរទៅជិតរថយន្តមួយគ្រឿងដោយមានកាំភ្លើងក្នុងដៃ មុនពេលដែលលោកត្រូវបានគេបាញ់។
អភិបាលក្រុង Austin លោក Steve Adler បានថ្លែងក្នុងសេចក្ដីថ្លែងការណ៍មួយថា៖ «អ្វីដែលខ្ញុំដឹងគឺថា មនុស្សម្នាក់បានស្លាប់ ពេលកំពុងតវ៉ា។ វាគឺជារឿងដ៏រន្ធត់មួយ»។ លោកថ្លែងថា លោក«មានការតក់ស្លុត និងភ្ញាក់ផ្អើលយ៉ាងខ្លាំង»។
នៅទីក្រុង Louisville រដ្ឋ Kentucky បាតុករប្រដាប់ដោយអាវុធមួយក្រុមបានស្នើឲ្យមានការស្រាវជ្រាវរកយុត្តិធម៌សម្រាប់អ្នកស្រី Breonna Taylor ដែលជាស្ត្រីស្បែកខ្មៅម្នាក់។
អ្នកស្រី Breonna Taylor បានស្លាប់នៅក្នុងទីក្រុងនេះ នៅពេលដែលប៉ូលិសបានចូលទៅក្នុងផ្ទះរបស់អ្នកស្រីដោយមិនបានជូនដំណឹងជាមុន ដោយប្រើដីកាឆែកឆេរដែលមិនតម្រូវឲ្យគោះទ្វារជាមុន ហើយប៉ូលិសក៏បានបាញ់អ្នកស្រី។ មិត្តប្រុសរបស់អ្នកស្រីបានបាញ់ទៅលើប៉ូលិសមុន ដោយគិតថា ប៉ូលិសទាំងនោះគឺជាអ្នកលួចចូលផ្ទះដោយគ្មានការអនុញ្ញាត។
ប៉ូលិសម្នាក់ត្រូវបានដេញចេញពីតំណែងនៅក្នុងហេតុការណ៍នោះ ប៉ុន្តែនៅមិនទាន់មានការចោទប្រកាន់អ្វីលើប៉ូលិសផ្សេងទៀតនោះទេ។
មេដឹកនាំក្រុម NFAC ដែលជាក្រុមសកម្មប្រយុទ្ធស្បែកខ្មៅប្រដាប់ដោយអាវុធដែលមានការពាក់ព័ន្ធនៅក្នុងការតវ៉ាទាំងនោះ និយាយថា លោកចង់ឲ្យប៉ូលិសស៊ើបអង្កេតទៅលើករណីស្លាប់របស់អ្នកស្រី Taylor ឲ្យមានតម្លាភាពជាងនេះ។
ប៉ូលិសនិយាយថា សមាជិក ៣ នាក់នៃក្រុម NFAC បានរងរបួសកាលពីថ្ងៃសៅរ៍ នៅពេលដែលអាវុធមួយរបស់ក្រុមនេះបានរាកៃដោយចៃដន្យ៕
