ក្រុមរដ្ឋអាជ្ញាសហរដ្ឋអាមេរិកនិយាយថា ស្ថានកុងស៊ុលប្រទេសចិននៅក្នុងទីក្រុងសាន់ហ្វ្រាន់ស៊ីស្កូ រដ្ឋកាលីហ្វ័រញ៉ា កំពុងឲ្យអ្នកវិទ្យាសាស្ត្រចិនម្នាក់ដែលបានលាក់ពីទំនាក់ទំនងខ្លួនជាមួយយោធាចិន លាក់ខ្លួននៅក្នុងបរិវេណស្ថានកុងស៊ុលរបស់ខ្លួន។
ក្រុមរដ្ឋអាជ្ញាបានចោទប្រកាន់អ្នកស្រី Tang Juan អ្នកស្រាវជ្រាវម្នាក់នៅសាកលវិទ្យាល័យកាលីហ្វ័រញ៉ានៅ Davis អំពីការក្លែងបន្លំទិដ្ឋាការកាលពីថ្ងៃទី២៦ ខែមិថុនា។ យោងតាមឯកសារតុលាការ នៅក្នុងពាក្យដាក់សុំទិដ្ឋាការ អ្នកស្រី Tang អះអាងថា អ្នកស្រីមិនមានទំនាក់ទំនងជាមួយកងទ័ពរំដោះប្រជាជនចិនទេ។ ប៉ុន្តែភ្នាក់ងារនៃការិយាល័យស៊ើបអង្កេតសហព័ន្ធFBI ក្រោយមកបានរកឃើញរូបថតអ្នកស្រីក្នុងសម្លៀកបំពាក់យោធាពេលឆែកឆេរផ្ទះរបស់អ្នកស្រី ហើយបានរកឃើញព័ត៌មានថាអ្នកស្រីធ្លាប់បានធ្វើការជាអ្នកស្រាវជ្រាវនៅសាកលវិទ្យាល័យវេជ្ជសាស្ត្រយោធារបស់កងទ័ពអាកាសចិន។
នៅក្នុងឯកសារតុលាការនេះ អ្នកស្រី Tang បានបដិសេធការចោទទាំងនេះនៅពេលអ្នកស្រីត្រូវភ្នាក់ងារFBI សាកសួរកាលពីថ្ងៃទី២០ ខែមិថុនា ហើយក្រោយពីនោះអ្នកស្រីបានស្វះស្វែងរកការជ្រកកោណនៅស្ថានកុងស៊ុលចិននៅក្រុងសាន់ហ្រាន់ស៊ីនស្កូ។
ការចោទរបស់រដ្ឋអាជ្ញានេះត្រូវបានរាយការណ៍ដំបូងដោយគេហទំព័រព័ត៌មានអាមេរិក Axios កាលពីថ្ងៃពុធ គឺតែប៉ុន្មានម៉ោងប៉ុណ្ណោះក្រោយពីក្រសួងការបរទេសសហរដ្ឋអាមេរិកបានបញ្ជាឲ្យស្ថានកុងស៊ុលចិននៅទីក្រុង Houston រដ្ឋ Texas បិទដោយសារការចោទថាបានរួមចំណែកលួចកម្មសិទ្ធិបញ្ញាអាមេរិក។
រដ្ឋអាជ្ញាអាមេរិកចោទថាអ្នកស្រីTang ជាផ្នែកនៃកម្មវិធីរបស់យោធាចិនដើម្បីបញ្ជូនអ្នកវិទ្យាសាស្ត្រទៅសហរដ្ឋអាមេរិកក្នុងបំណងលួចកម្មសិទ្ធិបញ្ញានៅតាមសាលវិទ្យាល័យនិងវិទ្យាស្ថានស្រាវជ្រាវរបស់អាមេរិក៕
