ប្រធានាធិបតីជាប់ឆ្នោតសហរដ្ឋអាមេរិកលោក Donald Trump បានបញ្ចប់ដំណើរទស្សនកិច្ចថ្លែងអំណរគុណរបស់លោក ដោយការថ្លែងរបស់លោកនៅក្នុងទីក្រុង រដ្ឋ Alabama ដែលជាទីកន្លែងដែលលោកបានរៀបចំការជួបជុំគ្នាដ៏ធំបំផុតនៅក្នុងយុទ្ធនាការឃោសនាបោះឆ្នោតកន្លងមក។
លោក Trump និយាយថា លោកធ្លាប់ត្រូវគេប្រាប់ថា ពេលលោកក្លាយជាប្រធានាធិបតី លោកគួរតែឈប់រៀបចំការជួបជុំដូច្នេះ។ ប៉ុន្តែ លោកបានឆ្លើយថា លោកនឹងបន្តធ្វើដូច្នេះទៀត ដោយហេតុថា ការជួបជុំដូច្នេះអាចឲ្យលោកផ្ញើសារដោយផ្ទាល់ដល់អ្នកគាំទ្រលោក ដោយមិនចាំបាច់ឆ្លងកាត់តាមប្រព័ន្ធផ្សព្វផ្សាយនានា។
កាលពីថ្ងៃសៅរ៍ម្សិលមិញ លោក Jeff Sessions សមាជិកព្រឹទ្ធសភាប្រចាំរដ្ឋ Alabama មកពីគណបក្សសាធារណរដ្ឋ បានចូលរួមនៅក្នុងការជួបជុំជាមួយអ្នកគាំទ្រជាមួយនឹងលោក Trump។ លោក Jeff Sessions ត្រូវបានលោក Trump ជ្រើសរើសឲ្យកាន់តំណែងជាអគ្គមេធាវីសហរដ្ឋអាមេរិក។
កាលពីល្ងាចថ្ងៃសៅរ៍ម្សិលមិញ លោក Trump បានរិះគន់ប្រទេសចិនតាមប្រព័ន្ធ Twitter ថាបានលួចយកឧបករណ៍ដ្រូនដែលប្រើសម្រាប់ធ្វើការស្រាវជ្រាវ ពីទឹកនៅក្នុងសមុទ្រចិនខាងត្បូង។
លោក Trump បានសរសេរយ៉ាងដូច្នេះថា៖ «យើងចង់ប្រាប់រដ្ឋាភិបាលចិនថា យើងមិនចង់បានឧបករណ៍ដ្រូននោះត្រឡប់មកវិញទេ»។ លោកបានសរសេរដូច្នេះ បន្ទាប់ពីយោធាសហរដ្ឋអាមេរិកនិងប្រទេសចិន បានឈានដល់ការយល់ស្របគ្នាក្នុងការបញ្ជូនឧបករណ៍ដ្រូននោះមកឲ្យទាហានជើងទឹករបស់សហរដ្ឋអាមេរិកវិញ។
បន្ទាប់ពីការជួបជុំរបស់លោកនៅក្នុងរដ្ឋ Alabama លោក Trump នឹងធ្វើដំណើរទៅកាន់រដ្ឋ Florida ដើម្បីជួបជុំជាមួយនឹងក្រុមគ្រួសារលោកអបអរពិធីបុណ្យ Christmas។ ជំនួយការលោក Trump បានបញ្ជាក់ថា លោក Trump នឹងចំណាយពេលក្នុងសប្ដាហ៍ក្រោយនេះនៅក្រុង Palm Beach ដើម្បីរៀបចំការប្រជុំ ក៏ដូចជាសម្រាកលំហែកាយជាមួយក្រុមគ្រួសាររបស់លោក៕
