ក្រសួងការបរទេសអាមេរិកនិយាយថា ខ្លួនកំពុងតែត្រៀមជួយដល់ប្រទេសឥណ្ឌូនេស៊ីទៅលើប្រតិបត្តិការស្តារឡើងវិញពីគ្រោះរញ្ជួយដី និងរលកយក្ស ស៊ូណាមី ដែលបានសម្លាប់មនុស្សអស់ជាង១២០០នាក់ នៅកណ្តាលកោះ Sulawesi។
នៅក្នុងសេចក្តីថ្លែងការណ៍មួយកាលពីថ្ងៃអង្គារ សហរដ្ឋអាមេរិកនិយាយថា ខ្លួននឹងផ្តល់ជំនួយបឋម និងបន្តធ្វើការជាមួយនឹងរដ្ឋាភិបាលឥណ្ឌូនេស៊ី និងស្ថានទូតអាមេរិកនៅទីនោះ ដើម្បីកំណត់នូវប្រតិបត្តិការដ៏ល្អបំផុតដើម្បីឆ្លើយតបទៅនឹងគ្រោះទុរភិក្សនេះ។
ក្រសួងការបរទេសអាមេរិកបានឲ្យដឹងកាលពីថ្ងៃចន្ទថា សហរដ្ឋអាមេរិកបានបញ្ចេញជំនួយបឋមចំនួន ១សែនដុល្លារ តាមរយៈទីភ្នាក់ងារអភិវឌ្ឍន៍អន្តរជាតិរបស់អាមេរិក សម្រាប់ជំនួយគ្រោះទុរភិក្សហើយ។ ក្រសួងនេះក៏បានបន្ថែមទៀតថា ខ្លួនកំពុងធ្វើការយ៉ាងជិតស្និទ្ធជាមួយនឹងទីភ្នាក់ងារ USAID និងក្រសួងការពារប្រទេសរបស់អាមេរិក ដើម្បីកំណត់ថាតើខ្លួនអាចជួយអ្វីបានទៀត។
ពលរដ្ឋអាមេរិកាំងនៅក្នុងតំបន់រងគ្រោះក្នុងប្រទេសឥណ្ឌូនេស៊ី ដែលមានសុវត្ថិភាព ត្រូវបានជំរុញឲ្យទាក់ទងទៅក្រុមគ្រួសាររបស់ពួកគេ ឬបង្ហាញថា ពួកគេមានសុវត្ថិភាពនៅលើបណ្តាញសង្គម។ សម្រាប់អ្នកដែលត្រូវការជំនួយបន្ទាន់ត្រូវបានជំរុញឲ្យទូរសព្ទទៅអាជ្ញាធរក្នុងស្រុក៕
