ភាពអស់សង្ឃឹមនិងភាពសោកសៅរបស់ជនរងគ្រោះកំពុងតែកើនឡើងនៅកោះ Sulawesi ភាគកណ្តាលឥណ្ឌូណេស៊ីជាទីដែលមនុស្សជាង១២០០នាក់ត្រូវបានសម្លាប់ដោយគ្រោះរញ្ជួយដីនិងរលកយក្សស៊ូណាមិ។
របាយការណ៍ពីកន្លែងកើតហេតុបានឲ្យដឹងថាប្រជាជនរស់នៅក្រុង Palu ដែលជាទីក្រុងរងគ្រោះខ្លាំងបំផុតដោយសារគ្រោះមហន្តរាយនេះកំពុងប្រឈមនឹងអំពើលួចប្លន់នៅតាមហាងនានាដោយសារតែខ្វះអាហារនិងទឹកស្អាត ការខឹងសម្បារកាន់តែខ្លាំងឡើងដោយសារភាពយឺតយ៉ាវនៃចំណាត់ការរបស់រដ្ឋាភិបាលក្នុងការផ្តល់ជំនួយសង្គ្រោះបន្ទាន់ ខណៈក្រុមជួយសង្គ្រោះកំពុងបន្តជីកកកាយគំនរថ្មបាក់បែកនៅទូទាំងទីក្រុង Palu ដើម្បីស្វែងរកអ្នកនៅរស់រានមានជីវិត។ ប៉ុន្តែកិច្ចប្រឹងប្រែងរបស់ពួកគេត្រូវបានរារាំងដោយសារកង្វះគ្រឿងចក្រធន់ធ្ងន់។
យ៉ាងហោចណាស់មានមនុស្ស៥០នាក់ត្រូវបានគេជឿថាកំពុងជាប់នៅក្នុងសណ្ឋាគារ Roa Roa ដែលបានរងការបែកបាក់។
ទីភ្នាក់ងារជាតិគ្រប់គ្រងគ្រោះមហន្តរាយរបស់ឥណ្ឌូណេស៊ីកាលពីថ្ងៃអង្គារបានប្រកាសថា ចំនួនមនុស្សស្លាប់ដោយសារគ្រោះរញ្ជួយដីដែលមានកម្លាំង៧,៥ និងរលកយក្សស៊ូណាមិកាលពីថ្ងៃសុក្រសប្តាហ៍មុន ឥឡូវនេះបានកើតដល់១២៣៤នាក់។ ផ្ទះនិងអាគារជាច្រើនក្នុងទីក្រុង Palu ត្រូវបានបំផ្លិចបំផ្លាញគ្មានសល់ ដែលធ្វើឲ្យមនុស្សប្រមាណ៥ម៉ឺននាក់បាត់បង់លំនៅដ្ឋាន។ រលកយក្សស៊ូណាមិក៏បានបំផ្លាញផ្លូវនិងស្ពាន ព្រលានយន្តហោះនៅលើកោះ Sulawesi ផងដែរ។ ការណ៍នេះបានបង្កឲ្យមានភាពយឺតយ៉ាវក្នុងការផ្តល់ជំនួយទៅដល់ជនរងគ្រោះ។ កាលពីថ្ងៃចន្ទប្រជាពលរដ្ឋប្រហែល៣០០០នាក់បានប្រមូលផ្តុំគ្នានៅឯព្រលានយន្តហោះដោយសង្ឃឹមថានឹងអាចរកបានយន្តហោះដឹកទំនិញរបស់ទាហាន ឬយន្តហោះឯកជនណាដើម្បីអាចយកពួកគេចេញពីកោះនេះបាន៕
