លោកនាយករដ្ឋមន្រ្តី ហ៊ុន សែន និងរដ្ឋាភិបាលកម្ពុជា នៅសប្តាហ៍នេះ បានចូលរួមរំលែកទុក្ខពលរដ្ឋឥណ្ឌូនេស៊ី ដែលរងការវាយប្រហារដោយគ្រោះធម្មជាតិរញ្ជួយដី និងរលកយក្សស៊ូណាមិ ដែលបានសម្លាប់ពលរដ្ឋនៃប្រទេសដែនកោះនេះ ជាងមួយពាន់នាក់។
ក្នុងលិខិតរំលែកទុក្ខ ផ្ញើទៅលោក ចូកូ វីដូដូ ប្រធានាធិបតីឥណ្ឌូនេស៊ីនៅថ្ងៃអង្គារនេះ លោក ហ៊ុន សែន បានសរសេរតាមន័យដើមថា៖
«ខ្ញុំមានសេចក្តីរន្ធត់យ៉ាងខ្លាំង ដោយបានទទួលដំណឹងអំពីការបាត់បង់ជីវិតប្រជាជនជាច្រើន ហើយរាប់រយពាន់នាក់ផ្សេងទៀតក៏បានបាត់ខ្លួន និងរងរបួស ក្នុងគ្រោះរញ្ជួយផែនដី និងរលកយក្សស៊ូណាមិ (Tsunami) ដែលបានបង្កការបំផ្លិចបំផ្លាញដ៏ធំ នៅទីក្រុងប៉ាលូ (Palu) កោះស៊ូឡាវេស៊ី (Sulawesi) នាចុងសប្តាហ៍នេះ»។
កាលពីថ្ងៃទី២៨ ខែកញ្ញា គ្រោះរញ្ជួយដី និងរលកយក្សស៊ូណាមិ បានកើតឡើងក្នុងទីក្រុងប៉ាលូ និងដុងខាឡា ភាគកណ្តាលនៃខេត្ត ស៊ូវ៉េស៊ី ប្រទេសឥណ្ឌូនេស៊ី។ គ្រោះធម្មជាតិដ៏ប្រល័យនេះ បានបណ្តាលឲ្យមានអ្នកបាត់បង់ជីវិតកើនឡើងរហូតដល់ជាង ១,២០០នាក់ និងរាប់ពាន់នាក់ផ្សេងទៀតរងរបួសគិតត្រឹមថ្ងៃអង្គារនេះ។ ខណៈអាជ្ញាធរឥណ្ឌូនេស៊ី កំពុងជួយសង្គ្រោះជនរងគ្រោះ និងអ្នកបាត់ខ្លួនក្នុងគ្រោះធម្មជាតិនេះ រដ្ឋាភិបាលនៃប្រទេសឥណ្ឌូនេស៊ីក៏បានអំពាវនាវសុំជំនួយពីអន្តរជាតិផងដែរ។
រដ្ឋាភិបាលកម្ពុជានាសប្តាហ៍នេះក៏បានចូលរួមចំណែកផ្តល់ជំនួយជាថវិកាចំនួន២០ម៉ឺនដុល្លារសហរដ្ឋអាមេរិក ទៅឱ្យរដ្ឋាភិបាលប្រទេសឥណ្ឌូនេស៊ី សម្រាប់ជួយដល់ជនរងគ្រោះរញ្ជូយដី និងរលកស៊ូណាមិ។ នេះបើយោងតាមសេចក្តីប្រកាសព័ត៌មាន របស់ក្រសួងការបរទេសកម្ពុជា ដែលចេញផ្សាយកាលពីថ្ងៃចន្ទ។
សេចក្តីប្រកាសព័ត៌មាននោះបញ្ជាក់ក្នុងន័យដើមថា៖
«ដើម្បីបង្ហាញនូវសាមគ្គីភាពជាមួយរដ្ឋាភិបាល និងប្រជាជនឥណ្ឌូនេស៊ី ក្នុងគ្រាលំបាកនេះ រាជរដ្ឋាភិបាលកម្ពុជា ដែលមានសម្តេចតេជោ ហ៊ុន សែន ជានាយករដ្ឋមន្ត្រី បានសម្រេចចូលរួមចំណែកនូវទឹកប្រាក់ចំនួន ២០០,០០០ ដុល្លារអាមេរិក (ម្ភៃម៉ឺនដុល្លារអាមេរិក) ជាជំនួយមនុស្សធម៌ សម្រាប់រំលែកទុក្ខ និងជួយដល់ជនរងគ្រោះ ដោយសារមហន្តរាយពីគ្រោះធម្មជាតិរញ្ជូយដី និងរលកស៊ូណាមិ ដ៏សោកនាដកម្មនេះ»។
កាលពីថ្ងៃចន្ទ ស្ថានឯកអគ្គរាជទូតខ្មែរ ប្រចាំសាធារណៈរដ្ឋឥណ្ឌូនេស៊ី ប្រាប់ឲ្យប្រជាពលរដ្ឋកម្ពុជាដែលកំពុងមានវត្តមាននៅប្រទេសឥណ្ឌូនេស៊ី ឱ្យផ្អាកការធ្វើដំណើរទៅកាន់តំបន់ភាគកណ្តាលនៃខេត្ត ស៊ូឡាវ៉េស៊ី ដែលទើបរងគ្រោះដោយរញ្ជួយដី និងរលកយក្សស៊ូណាមិ។ នេះបើយោងទៅតាមសេចក្តីជូនដំណឹងចេញផ្សាយជាប្រញាប់កាលពីថ្ងៃ១ ខែតុលា ឆ្នាំ២០១៨។
ស្ថានឯកអគ្គរាជទូតកម្ពុជាប្រចាំប្រទេសឥណ្ឌូនេស៊ី បានជម្រាបជូនប្រជាពលរដ្ឋកម្ពុជា ដែលកំពុងមានវត្តមាននៅប្រទេសឥណ្ឌូនេស៊ីថា កាលពីថ្ងៃទី២៨ ខែកញ្ញា ឆ្នាំ២០១៨ មានគ្រោះធម្មជាតិរញ្ជួយដី និងរលកស៊ូណាមិ នៅទីក្រុងប៉ាលូ និងដុងខាឡា ភាគកណ្តាលនៃខេត្ត ស៊ូវ៉េស៊ី ប្រទេសឥណ្ឌូនេស៊ី។
ស្ថានឯកអគ្គរាជទូតកម្ពុជាប្រចាំសាធារណរដ្ឋឥណ្ឌូនេស៊ី បញ្ជាក់ក្នុងសេចក្តីជូនដំណឹងដដែលនោះតាមន័យដើមថា៖
«យោងលើស្ថានភាពខាងលើ ស្ថានទូតសូមបងប្អូនជនរួមជាតិ បើគ្មានភារកិច្ចចាំបាច់ សូមផ្អាកការធ្វើដំណើរទៅកាន់តំបន់ខាងលើនេះ រហូតដល់ស្ថានភាពបានប្រសើរឡើង។ ក្នុងករណីចាំបាច់ ឬមានសាច់ញាតិបាត់ខ្លួនក្នុងគ្រោះមហន្តរាយខាងលើនេះ សូមទាក់ទងមកស្ថានទូតតាមលេខទូរស័ព្ទៈ +៦២ ២១ ៧៨១ ២៥២៣, ០៨២១ ១២៣ ៦៨៦៣៩, ០៨១២ ៨២៥ ៦៦៦ ៥៨ និង ០៨១៣ ១៧៥ ៦៥ ៤៨៦»។
VOA មិនអាចទាក់ទងសុំការអត្ថាធិប្បាយពីលោក កេត សោផាន់ អ្នកនាំពាក្យក្រសួងការបរទេសកម្ពុជាបានទេ រហូតដល់ល្ងាចថ្ងៃអង្គារនេះ។
អ្នកស្រី សុក ផុនដានី ទីប្រឹក្សាស្ថានទូតកម្ពុជាប្រចាំប្រទេសឥណ្ឌូនេស៊ី ប្រាប់ VOA តាមរយៈសារអេឡិចត្រូនិច ឬអ៊ីមែលនាល្ងាចថ្ងៃអង្គារនេះថា បច្ចុប្បន្នមានពលរដ្ឋខ្មែរ និងនិស្សិត ប្រមាណជា៦០ នាក់ កំពុងរស់នៅ ធ្វើការ និងសិក្សានៅប្រទេសឥណ្ឌូនេស៊ី។ អ្នកស្រីបន្ថែមថា រហូតមកដល់ពេលនេះមិនមាននិស្សិត ឬពលរដ្ឋខ្មែរណាម្នាក់ទៅបំពេញធុរកិច្ច ឬសិក្សានៅតំបន់មានគ្រោះថ្នាក់នោះទេ ហើយថា ក៏មិនមានព័ត៌មានអំពីពលរដ្ឋខ្មែរគ្រោងធ្វើដំណើរទៅតំបន់ខាងលើនេះដែរ។
អ្នកស្រីបញ្ជាក់តាមន័យដើមថា៖ «ខ្ញុំមានការបារម្ភអំពីទេសចរកម្ពុជា អាចធ្វើដំណើររយៈពេលខ្លីទៅកំសាន្តនៅតំបន់នេះដោយស្ថានទូតពុំបានដឹង ព្រោះពលរដ្ឋយើងធ្វើដំណើរចេញចូលប្រទេសនេះ រយៈពេលខ្លីពុំមានទម្លាប់ជូនដំណឹងដល់ស្ថានទូតទេ ហេតុនេះបានជាយើងបារម្ភ ប៉ុន្តែរហូតមកទល់ពេលនេះ ពុំមានព័ត៌មានអំពីពលរដ្ឋយើងមានគ្រោះថ្នាក់ទេ។ ស្ថានទូតបានធ្វើទំនាក់ទំនងជិតស្និទ្ធជាមួយអាជ្ញាធរឥណ្ឌូនេស៊ី ដើម្បីត្រៀមអន្តរាគមន៍ក្នុងករណីមានពលរដ្ឋខ្មែរជួបគ្រោះថ្នាក់ក្នុងគ្រោះធម្មជាតិខាងលើ»៕
