តួលេខអ្នកស្លាប់នៅក្នុងគ្រោះរញ្ជួយផែនដីនិងរលកយក្ស ស៊ូណាមី ក្នុងប្រទេស ឥណ្ឌូណេស៊ី បានកើនឡើងទ្វេដង រហូតដល់៨៣២នាក់ និងមានអ្នករងរបួសចំនួន៥៤០នាក់។ នេះបើយោងតាមក្រុមមន្ត្រីឥណ្ឌូណេស៊ី។
អាជ្ញាធរនិយាយថា តួលេខអ្នកស្លាប់នឹងអាចកើនឡើងបន្ថែមទៀត។
អ្នកនាំពាក្យទីភ្នាក់ងារគ្រោះមហន្តរាយធម្មជាតិដែលបានប្រកាសតួលេខអ្នកស្លាប់ចំនួន៤២០នាក់កាលពីមុននេះ លោក Sutopo Purwo Nugroho បាននិយាយថា «តួលេខអ្នកស្លាប់នឹងបន្តកើនឡើងទៀត»។
យោងតាមបណ្តាញសារព័ត៌មាន French Press Agency បានឲ្យដឹងថា លោក Nugroho បាននិយាយបន្ថែមថា «ថ្ងៃនេះ យើងនឹងចាប់ផ្តើមកប់សាកសពរបស់ជនរងគ្រោះ ដើម្បីចៀសវាងកុំឲ្យមានជំងឺឆ្លងរីករាលដាល»។
ប្រធានាធិបតីឥណ្ឌូណេស៊ី លោក Joko Widodo បានទៅដល់ទីក្រុង Palu កាលពីថ្ងៃអាទិត្យ ដែលក្រុងនេះគឺជាក្រុងមួយក្នុងចំណោមក្រុងដទៃទៀតដែលត្រូវបំផ្លិចបំផ្លាញដោយគ្រោះរញ្ជួយដីនិងរលកយក្ស ស៊ូណាមី ដើម្បីសង្កេតមើលការបំផ្លិចបំផ្លាញដោយខ្លួនឯងផ្ទាល់។
លោកបានលើកឡើងថា កងកម្លាំងត្រូវបានដាក់ពង្រាយនៅទីនោះ និងបានស្នើឲ្យពួកគេ «ត្រៀមខ្លួនរួចជាស្រេចដើម្បីបំពេញភារកិច្ចទាំងថ្ងៃទាំងយប់»។
ប្រជាជនជិត១៧០០០នាក់បានស្នាក់នៅបណ្តោះអាសន្នក្នុងទីជម្រកចំនួន២៤។ នេះបើយោងតាមទីភ្នាក់ងារជួយសង្គ្រោះគ្រោះធម្មជាតិជាតិ។
មនុស្សមួយចំនួនបានកប់នៅក្នុងគំនរបាក់បែកក្នុងទីក្រុង Palu ដែលរងការបំផ្លិចបំផ្លាញយ៉ាងធ្ងន់ធ្ងរនេះ ហើយគេនៅឮសូរសំឡេងពួកគេស្រែកយំដង្ហើយឲ្យជួយ។ នេះបើយោងតាមលោក Muhammad Syaugi ប្រធានទីភ្នាក់ងារស្វែងរកនិងជួយសង្គ្រោះឥណ្ឌូណេស៊ី៕
