លោករដ្ឋមន្រ្តីការបរទេសសហរដ្ឋអាមេរិក John Kerry មានប្រសាសន៍ថា សហរដ្ឋ អាមេរិកស្ទើរតែផ្អាកការចរចាជាមួយរុស្ស៊ីពីបញ្ហាប្រទេសស៊ីរីពីព្រោះតែការទម្លាក់គ្រាប់បែកបន្តធ្វើឡើងដោយរដ្ឋាភិបាលទីក្រុងមូស្គូលើទីក្រុង Aleppo នៃប្រទេសស៊ីរី។
ប៉ុន្មានម៉ោងបន្ទាប់ពីរុស្ស៊ីបានប្រកាសបន្តការវាយប្រហារតាមអាកាសរបស់ខ្លួននៅក្នុងទីក្រុង Aleppo លោករដ្ឋមន្រ្តីការបរទេសអាមេរិកាំង John Kerry បានមានប្រសាសន៍កាលពីថ្ងៃព្រហស្បត៍ថា «ការទាក់ទងទ្វេភាគីជាមួយរុស្ស៊ីអំពីបញ្ហាស៊ីរីជាការមិនសម ហេតុសមផលក្នុងករណីនៃការទម្លាក់គ្រាប់បែកកើតមានឡើងនោះ»។
រុស្ស៊ី កំពុងគាំទ្រយុទ្ធនាការដ៏ធំទូលាយមួយដែលបានចាប់ផ្តើមឡើងដោយកងកម្លាំងដែលស្មោះត្រង់នឹងប្រធានាធិបតីស៊ីរី Bashar al-Assad ដើម្បីដណ្តើមយកផ្នែកខាងកើតនៃទីក្រុង Aleppoដែលកាន់កាប់ដោយពួកឧទ្ទាមមកវិញ។
អង្គការសហប្រជាជាតិ បានពណ៌នាស្ថានភាពរបស់ក្រុង Aleppo ថាជាស្ថានភាពប្រកបដោយគ្រោះថ្នាក់ ដោយមន្រ្តីម្នាក់បាននិយាយថា «ការជម្លៀសអ្នកជំងឺចាំបាច់ធ្វើជាបន្ទាន់»។ លោក និយាយទៀតថា ប្រហែលមនុស្សរាប់រយនាក់ ត្រូវការយកចេញពីទីក្រុងដែលខ្ទេចខ្ទីដោយសង្គ្រាមដែលជាទីក្រុងដ៏ធំបង្អស់របស់ស៊ីរីដែលនៅទីនោះមនុស្សប្រហែល២សែន៥ម៉ឺននាក់រស់នៅក្នុងតំបន់ដែលស្ថិតនៅក្រោមការវាយប្រហារ។
លោក Ramzy Ezzeldin Ramzy បេសជនរងរបស់អង្គការសហប្រជាជាតិ បាននិយាយថា ឃ្លាំងស្បៀងអាហារក្នុងទីក្រុង កំពុងតែនៅតិចទៅៗដោយហាងលក់នំជាច្រើនបានបិទទ្វារហើយរបបអាហារនៅសល់តែ១ម៉ឺន៤ពាន់ប៉ុណ្ណោះ៕
