អាមេរិក​បោះ​ជំហាន​រឹបអូស​ទ្រព្យសម្បត្តិ​ដែល​ត្រូវ​បាន​ទិញ​ដោយ​ប្រើ​ថវិកា​ដែល​លួច​ពី​មូលនិធិ​រដ្ឋ​នៅ​ម៉ាឡេស៊ី

សហរដ្ឋ​អាមេរិក​កំពុង​តែ​ព្យាយាម​រឹបអូស​អចលនទ្រព្យ ស្នាដៃ​សិល្បៈ និង​គ្រឿង​អលង្ការ ដែល​មាន​ទឹក​ប្រាក់​ជាង​១​ពាន់​លាន​ដុល្លារ ដែល​អាជ្ញាធរ​ចោទ​ប្រកាន់​ថា ត្រូវ​បាន​គេ​ទិញ​ដោយ​ប្រើប្រាស់​ថវិកា​ដែល​ត្រូវ​បាន​គេ​លួច​ពី​មូលនិធិ​រដ្ឋ​របស់​ម៉ាឡេស៊ី។

ក្រសួង​យុត្តិធម៌​អាមេរិក​បាន​ដាក់​ពាក្យ​បណ្តឹង​នៅ​ក្នុង​ទីក្រុង Los Angeles ដោយ​អះអាង​ថា ក្រុម​មន្ត្រី​ដែល​ជិតស្និទ្ធ​នឹង​នាយក​រដ្ឋ​មន្ត្រី Najib Razak បាន​ផ្ទេរ​ប្រាក់​ជាង​៣​ពាន់​៥០០​លាន​ដុល្លារ​ពី​មូលនិធិ​រដ្ឋចាប់​ពី​ឆ្នាំ២០០៩​ដល់​ឆ្នាំ​២០១៣ ដោយ​ប្រើប្រាស់​ប្រាក់​ដែល​គ្រោង​នឹង​ប្រើ​សម្រាប់​គម្រោង​អភិវឌ្ឍ​សេដ្ឋកិច្ច​នៅ​ក្នុង​ប្រទេស​អាស៊ីអាគ្នេយ៍​មួយ​នេះ ដើម្បី​ទិញ​ទ្រព្យសម្បតិ្ត​នៅ​អាមេរិក​ និង​បង់​ថ្លៃ​រៀបចំ​ពិធី​ជប់លៀង​ដែល​ខ្ជះខ្ជាយ លេង​ល្បែង និង​សម្រាប់​កម្សាន្ត។ ​

ពាក្យបណ្តឹងនេះមិនបានដាក់ឈ្មោះលោក Najib ដែលផ្តោតទៅលើការកើនឡើងការមិនពេញចិត្ត ក្នុងអំឡុងពេលដែលមានការស៊ើបអង្កេតនៅក្នុងប្រទេសម៉ាឡេស៊ី និងនៅកន្លែងដទៃទៀត ជុំវិញមូលនិធិដែលលោកត្រួតត្រា ដែលត្រូវបានគេហៅថា 1Malaysia Development Berhad ឬ 1MBD។

ប៉ុន្តែ​ពាក្យ​បណ្តឹង​នោះ​បាន​ដាក់​ឈ្មោះ​កូន​ចុង​របស់​លោក Najib ឈ្មោះ Riza Aziz ដែល​ជា​ផលិតករ​ខ្សែ​ភាពយន្ត​ហូលីវូដ ថា​ជា​បុគ្គល​ដែល​មាន​ជាប់​ពាក់ព័ន្ធ។ ហិរញ្ញិក​ម៉ាឡេស៊ី​ឈ្មោះ Jho Low និង​មន្ត្រី​រដ្ឋាភិបាល​នៅ Abu Dhabi ដែល​មាន​ឈ្មោះ​ថា Khadem al-Qubaisi និង Mohamed Ahmed Badawy al-Husseiny ក៏​ត្រូវ​បាន​ដាក់​ឈ្មោះ​នៅ​ក្នុង​ពាក្យ​បណ្តឹង​នោះ​ផង​ដែរ។

សហរដ្ឋ​អាមេរិក​ចោទប្រកាន់​ថា ប្រាក់​មួយ​ចំនួន​នៃ​ប្រាក់​មិន​ត្រឹមត្រូវ​ទាំង​នេះ​ត្រូវ​បាន​Aziz ប្រើប្រាស់​ដើម្បី​ឧបត្ថម្ភ​ដល់​ការ​ផលិត​ខ្សែ​ភាពយន្ត​អាមេរិក​ដ៏​ល្បី​ល្បាញ​មួយ​កាល​ពី​ឆ្នាំ​២០១៣ ដែល​មាន​ចំណង​ជើង​ថា "The Wolf of Wall Street," ដែល​ជា​រឿង​ប្រឌិត​មួយ​ដែល​និយាយ​ពី​ជីវិត​ពិត​របស់​ពួក​អ្នក​បោកប្រាស់​នៅ Wall Street។ ​

បុគ្គល​ដែល​មាន​រាយ​នាម​នៅ​ក្នុង​ពាក្យ​បណ្តឹង​នោះ​នៅ​មិន​ទាន់​ត្រូវ​បាន​ចោទប្រកាន់​ពី​បទ​ឧក្រិដ្ឋ​នៅ​ឡើយ​ទេ ប៉ុន្តែ​គេ​នៅ​អាច​ចោទប្រកាន់​បុគ្គល​ទាំង​នោះ​ពី​បទ​ឧក្រិដ្ឋ​បាន៕