ស.រ.អា.រំឭកខួបឆ្នាំទី១៥នៃការវាយប្រហារភេរវកម្ម កាលពីថ្ងៃទី១១ខែកញ្ញាឆ្នាំ២០០១ ដែលនៅពេលនោះពួកភេរវជនអាល់កៃដា (al-Qaida) បានប្លន់យន្តហោះបួនគ្រឿងហើយបានបើកយន្តហោះទាំងនេះបុកទម្លាយមជ្ឈមណ្ឌលពាណិជ្ជកម្មពិភពលោកនៅក្នុងបូរីញូវយ៉ក និងក្រសួងការពារប្រទេសស.រ.អា.នៅពេលដែលយន្តហោះមួយគ្រឿងទៀតបានធ្លាក់នៅក្នុងតំបន់ជនបទនៃរដ្ឋPennsylvania។
លោកប្រធានាធិបតី បារ៉ាក់ អូបាម៉ា បានឋិតនៅស្ងៀមស្ងាត់ស្មឹងស្មាធិមួយរយៈនៅក្នុងសេតវិមានកាលពីថ្ងៃអាទិត្យ នៅម៉ោង៨និង៤៦នាទីព្រឹក ជាម៉ោងដែលយន្តហោះទីមួយក្នុងបណ្តាយន្តហោះត្រូវប្លន់ទាំងបួនគ្រឿងបានបើកបុកទម្លាយមជ្ឈមណ្ឌលពាណិជ្ជកម្មពិភពលោក នៅមុនពេលលោកថ្លែងសុន្ទរកថាមួយនៅក្នុងពិធីមួយនៅឯក្រសួងការពារប្រទេសអាមេរិកដែលជាទីបញ្ជាការធំរបស់កងយោធាស.រ.អា. ដោយលោកបានផ្តល់កិត្តិយសដល់ពួកជនដែលបានបាត់បង់ជីវិតក្នុងការវាយប្រហារទាំងនោះ។
លោក អូបាម៉ា បានមានប្រសាសន៍ថា៖ «យើងនឹកឃើញ ហើយយើងនឹងមិនភ្លេចដាច់ខាតនូវជីវិតដ៏ល្អហ្មត់ហ្មងជិត៣ពាន់ដែលបានត្រូវយកពីយើងដោយឃោរឃៅ។ យើងចង់ដឹងថា ប្រសិនបើពួកគេនៅរស់តើជីវិតពួកគេមានភាពបែបណា តើការប៉ងប្រាថ្នារបស់ពួកគេមានទ្រង់ទ្រាយបែបណា»។
លោកប្រធានាធិបតីបានប្តេជ្ញាថា ពួកភេរវជន «នឹងមិនអាចយកជ័យជម្នះលើប្រទេសជាតិមួយដ៏ឆ្នើមនិងខ្លាំងដូចប្រទេសអាមេរិកបានទេ» ដោយលោកបានសរសើរពូជសាសន៍ផ្សេងៗគ្នានៃប្រជារាស្ត្ររបស់ប្រទេសដែលមានមនុស្សមានពូជសាសន៍និងសាសនាទាំងអស់ថាជា «កម្លាំងមួយក្នុងបណ្តាកម្លាំងធំបំផុតរបស់យើង»។
លោក អូបាម៉ា បានរំឭកដល់ការវាយប្រហារកាលពីថ្ងៃទី១១ខែកញ្ញាឆ្នាំ២០០១ជាលើកចុងក្រោយក្នុងឋានៈលោកជាប្រធានាធិបតីនៃប្រទេសអាមេរិកនៅមុនពេលលោកចាកចេញពីតំណែងក្នុងខែមករា។ លោកបានមានប្រសាសន៍ថា៖ «នេះជាប្រទេសអាមេរិកដែលបានត្រូវវាយប្រហារកាលពីព្រឹកនោះ ក្នុងខែកញ្ញា។ នេះជាប្រទេសអាមេរិកដែលយើងត្រូវតែមានស្វាមីភ័ក្តិ»។
ពួកជនរងគ្រោះដែលបានបាត់បង់ជីវិតនៅក្នុងការវាយប្រហារលើមជ្ឈមណ្ឌលពាណិជ្ជកម្មពិភពលោកបានត្រូវរំឭកនៅក្នុងបូរីញូវយ៉ក ដែលនៅទីនោះបេក្ខជនទាំងពីរនាក់នៃការបោះឆ្នោតប្រធានាធិបតីក្នុងឆ្នាំ២០១៦នេះ គឺលោកស្រី Hillary Clinton ខាងគណបក្សប្រជាធិបតេយ្យនិងលោក Donald Trump ខាងគណបក្សសាធារណរដ្ឋបានសម្តែងការគោរពនៅ Ground Zero ដែលជាកន្លែងរងការវាយប្រហារនោះដោយលោកស្រីនិងលោកបានផ្អាកការឃោសនាបោះឆ្នោតកាលពីថ្ងៃអាទិត្យ៕
