បុរសម្នាក់អាយុ១៨ឆ្នាំត្រូវបានចោទប្រកាន់ថាបានប៉ុនប៉ងប្រព្រឹត្តភេរវកម្មនៅ អាគាររដ្ឋាភិបាលក្នុងរដ្ឋ Arizona នាប៉ែកនិរតីនៃស.រ.អា.។
ការិយាល័យ FBI និងការិយាល័យរដ្ឋមន្ត្រីយុត្តិធម៌នៃរដ្ឋ Arizona បាននិយាយថា ឈ្មោះ Mahin Khan អាយុ១៨ឆ្នាំ បានត្រូវចាប់ខ្លួននៅក្រោយការស៊ើបអង្កេតមួយដោយកងកម្លាំងចំពោះកិច្ចរួមប្រឆាំងនឹងភេរវកម្មនៃការិយាល័យ FBI។
ឈ្មោះ Khan ត្រូវបានជាប់សង្ស័យថា បានគ្រោងធ្វើការវាយប្រហារលើអាគាររដ្ឋាភិបាលក្នុងក្រុង Phoenix និងក្រុង Tucson ផងដែរ។
ពួកមន្ត្រីបាននិយាយថា ផែនការវាយប្រហាររបស់ឈ្មោះ Khan នេះ គ្មានទាក់ទិនជាមួយបុណ្យឯករាជ្យនៅថ្ងៃទី៤ខែកក្កដាឬការប្រារព្ធនានាទាក់ទិននឹងបុណ្យឯករាជ្យទេ។
ពួកមន្ត្រីទាំងនេះបាននិយាយបន្ថែមថា គ្មានជនជាប់សង្ស័យទៀតទេ ហើយក៏គ្មានការគំរាមកំហែងដល់សាធារណជនដោយសារផែនការនេះរបស់ Khan នៅពេលបច្ចុប្បន្នឡើយ។
ឈ្មោះ Khan បានចេញបង្ហាញខ្លួនក្នុងតុលាការកាលពីថ្ងៃសៅរ៍ពីបទចោទប្រកាន់ពីរទាក់ទិននឹងការប្រព្រឹត្តភេរវកម្ម។
ឯកសារនៅតុលាការរបស់ Khan ត្រូវបានបិទជិតហើយគ្មានសេចក្តីលម្អិតបន្ថែមនៅពេលនេះទេ៕
