ក្រសួងយុត្តិធម៌សហរដ្ឋអាមេរិកបានបញ្ជាក់កាលពីយប់ថ្ងៃអង្គារថា ខ្លួនមានភ័ស្តុតាងដែលទំនងជាបង្ហាញអំពីកិច្ចប្រឹងប្រែងនៅក្នុងការរារាំងការស៊ើបអង្កេតរបស់រដ្ឋាភិបាលលើឯកសារសម្ងាត់ដែលរក្សាទុកនៅឯភូមិគ្រឹះរបស់អតីតប្រធានាធិបតីអាមេរិកលោក Donald Trump នៅរដ្ឋ Florida។
ឯកសារមួយដែលបានដាក់ជូនតុលាការបានយោងលើសេចក្ដីប្រកាសរបស់អ្នកតំណាងរបស់លោក Trump កាលពីខែមិថុនា ដែលបាននិយាយថាឯកសារសម្ងាត់ទាំងអស់ត្រូវបានប្រគល់ជូនរដ្ឋាភិបាល។ ឯកសារដាក់ជូនតុលាការនោះក៏បានយោងផងដែរលើសេចក្ដីថ្លែងការណ៍របស់មេធាវីមួយរូបរបស់លោក Trump ដែលថាឯកសារដែលនៅសេសសល់ទាំងអស់របស់សេតវិមានត្រូវបានរក្សាទុកនៅក្នុងបន្ទប់ផ្ទុកឯកសារតែមួយប៉ុណ្ណោះ។
ក្រសួងយុត្តិធម៌បានបញ្ជាក់ថា មេធាវីរូបនោះបានរារាំងមន្ត្រីរដ្ឋាភិបាលមិនឱ្យមើលខាងក្នុងប្រអប់នានានៅក្នុងបន្ទប់ផ្ទុកឯកសារនោះ។ មន្ត្រីរដ្ឋាភិបាលមានបំណងមើលក្នុងប្រអប់ទាំងនោះដើម្បីបញ្ជាក់ឱ្យបានពិតប្រាកដថាពិតជាគ្មានឯកសារសម្ងាត់ផ្សេងទៀតនៅក្នុងនោះ។
ពីរខែក្រោយមក ទីភ្នាក់ងារសហព័ន្ធស៊ើបអង្កេត (FBI) បានអនុវត្តដីកាឆែកឆេរនៅឯភូមិគ្រឹះរបស់លោក Trump ដោយបានរឹបអូសប្រអប់ចំនួន ៣៣ ដែលផ្ទុកឯកសារសម្ងាត់ជាង ១០០ ឯកសារ ដែលក្នុងនោះឯកសារខ្លះគឺជាឯកសារសម្ងាត់កម្រិតខ្ពស់បំផុត។
ក្រសួងយុត្តិធម៌ថា ភ្នាក់ងារ FBI បានរកឃើញឯកសារសម្ងាត់ខ្លះនៅក្នុងថតតុក្នុងការិយាល័យរបស់លោក Trump នៅឯភូមិគ្រឹះរបស់លោកក្នុងអំឡុងពេលឆែកឆេរកាលពីដើមខែសីហានេះ។
នៅក្រោមច្បាប់របស់សហរដ្ឋអាមេរិក ឯកសាររបស់ប្រធានាធិបតីគឺជាទ្រព្យសម្បត្តិរបស់រដ្ឋាភិបាល ហើយត្រូវតែប្រគល់ជូនប័ណ្ណសារដ្ឋានជាតិនៅចុងបញ្ចប់នៃអាណត្តិរបស់ប្រធានាធិបតី។ លោក Trump បានបញ្ចប់អាណត្តិជាប្រធានាធិបតីកាលពីខែមករា ឆ្នាំ ២០២១។
កន្លងមក លោក Trump បានរិះគន់ការឆែកឆេរភូមិគ្រឹះរបស់លោកកាលពីខែសីហាថាជាការឆែកឆេរដែលមិនធ្លាប់មានពីមុនមកនិងមិនចាំបាច់ ដោយលោកបាននិយាយថាលោកបានសហការជាមួយនឹងទីភ្នាក់ងារនានារបស់រដ្ឋាភិបាលសហព័ន្ធ។ មេធាវីរបស់លោកបានស្នើចៅក្រមសហព័ន្ធឱ្យតែងតាំងអ្នកជំនាញពិសេសមួយរូបឱ្យត្រួតពិនិត្យឡើងវិញថាតើក្នុងចំណោមឯកសារដែលបានរឹបអូសទាំងនោះ មានឯកសារណាខ្លះដែលជាឯកសារបុព្វសិទ្ធិរបស់ប្រធានាធិបតី។
ក្រសួងយុត្តិធម៌បានលើកឡើងនៅក្នុងឯកសារដាក់ជូនតុលាការកាលពីថ្ងៃអង្គារថា អាជ្ញាធរបានទុកពេលជាច្រើនឱ្យលោក Trump នៅក្នុងការធ្វើតាមសំណើដែលស្នើឱ្យលោកប្រគល់ឯកសារទាំងនោះជូនរដ្ឋាភិបាល និងថាក្រុមការងារពិសេសនៃក្រសួងយុត្តិធម៌បានបញ្ចប់រួចរាល់នូវកិច្ចការនៃការដកចេញនូវឯកសារណាដែលជាឯកសារបុព្វសិទ្ធិរបស់ប្រធានាធិបតី។
ចៅក្រមគ្រោងនឹងពិចារណាលើសំណើរបស់លោក Trump បន្ថែមទៀតនៅក្នុងសវនាការនៅថ្ងៃព្រហស្បតិ៍ស្អែក៕
ព័ត៌មានខ្លះនៅក្នុងសេចក្ដីរាយការណ៍នេះត្រូវបានដកស្រង់មកពីទីភ្នាក់ងារព័ត៌មាន Associated Press និងទីភ្នាក់ងារព័ត៌មាន Reuters។
ក្រសួងយុត្តិធម៌អាមេរិកថាមានភ័ស្តុតាងនៃការរារាំងការស៊ើបអង្កេតរឿងឯកសារសម្ងាត់ដែលរឹបអូសពីភូមិគ្រឹះលោក Trump
