កិច្ចប្រឹងប្រែងរបស់កូរ៉េខាងជើងដើម្បីបង្កើននិងពង្រីកទីតាំងផលិតកាំជ្រួចមីស៊ីលវង់ប្រតិបត្តិការឆ្ងាយបានធ្វើឡើងដោយគ្មានការភ្ញាក់ផ្អើលពីក្រុមមន្រ្តីស៊ើបការសម្ងាត់សហរដ្ឋអាមេរិក ជាអ្នកដែលតាមដានយ៉ាងប្រុងប្រយ័ត្នទៅលើការសន្យារបស់រដ្ឋាភិបាលក្រុងព្យុងយ៉ាងក្នុងការធ្វើមិនឲ្យមាននុយក្លេអ៊ែរនៅលើឧបទ្វីបកូរ៉េទាំងមូល។ រូបភាពថ្មីៗដែលប្រព័ន្ធផ្កាយរណបចាប់បានហាក់បានបង្ហាញពីអ្វីដែលជាការពង្រីកទីតាំងផលិតកាំជ្រួចមីស៊ីល Yeongjeo-dong ដែលស្ថិតនៅក្នុងតំបន់ភ្នំក្នុងប្រទេសកូរ៉េខាងជើង ព្រមទាំងការសាងសង់ទីតាំងថ្មីឈ្មោះ Hoejung-ri ដែលស្ថិតនៅចម្ងាយ១១គីឡូម៉ែត្រពីទីតាំងផលិតកាំជ្រួចមីស៊ីល Yeongjeo-dong ។
មន្រ្តីស៊ើបការសម្ងាត់អាមេរិកម្នាក់បានប្រាប់ VOA នៅពេលសួរអំពីរូបភាពទាំងនោះថា«ការវិភាគរបស់យើងគ្មានការផ្លាស់ប្តូរនោះទេ។ កូរ៉េខាងជើងមានការងារជាច្រើនដែលត្រូវធ្វើ។ លុះត្រាតែគម្រោងនេះត្រូវបានដាក់ចេញពេញលេញ ហើយពួកគេបញ្ចប់ការងាររបស់ពួកគេ បើមិនដូច្នោះទេយើងនៅតែមានការសង្ស័យលើរឿងនេះ»។
រូបភាពនានាដែលបណ្តាញសារព័ត៌មាន CNN ទទួលបានបង្ហាញថាកូរ៉េខាងជើងបានចាប់ផ្តើមសាងសង់ទីតាំងក្រោមដីកាលពីឆ្នាំ២០១៧ ហើយសំណង់នោះនៅកំពុងបន្តសាងសង់នៅឡើយបើគិតត្រឹមខែសីហាឆ្នាំនេះ។
ក្រុមអ្នកសា្រវជ្រាវនៅឯវិទ្យាស្ថានសិក្សាអន្តរជាតិ Middlebury ដែលបានវិភាគទៅលើរូបភាពនានាដែលចាប់បានដោយផ្កាយរណបបាននិយាយថា នេះជាលើកទីមួយហើយដែលទីតាំងផលិតកាំជ្រួចមីស៊ីល Hoejung-ri ត្រូវបានកំណត់ជាសាធារណៈ និងបានពណ៌នាអំពីការងារដែលបានធ្វើនៅទីនោះថាជាការងារសំខាន់»។
ក្រុមអ្នកសា្រវជ្រាវបាននិយាយថា ផ្អែកតាមការងារដែលត្រូវបានធ្វើ និងទីតាំងរបស់រោងចក្រផលិតកាំជ្រួចមីស៊ីលនេះ ធ្វើឲ្យគេសង្ស័យថារោងចក្រនេះអាចផលិតកាំជ្រួចមីស៊ីលវង់ប្រតិបត្តិការឆ្ងាយទំនើបបំផុតរបស់កូរ៉េខាងជើងដែលមានសមត្ថភាពអាចបំពាក់ក្បាលគ្រាប់នុយក្លេអ៊ែរបាញ់ដល់សហរដ្ឋអាមេរិក៕
