អ្នកជំនាញខាងកិច្ចការកូរ៉េខាងជើងបានព្រមានប្រឆាំងនឹងកិច្ចប្រជុំមួយទៀត ដែលគ្រោងនឹងធ្វើឡើងរវាងប្រធានាធិបតីអាមេរិកលោក Donald Trump និងមេដឹកនាំកូរ៉េខាងជើងលោក Kim Jong Un ដោយលើកឡើងពីដំណើរវិវត្តយឺតយ៉ាវនៃការលុបបំបាត់នុយក្លេអ៊ែរ តាំងពីកិច្ចប្រជុំលើកដំបូងរវាងលោកទាំងពីរនៅក្នុងប្រទេសសិង្ហបុរីកាលពីខែមិថុនាមក។
បន្ទាប់ពីបានជួបប្រជុំជាមួយនឹងមេដឹកនាំប្រទេសកូរ៉េខាងត្បូង និងមេដឹកនាំចិននៅក្នុងកិច្ចប្រជុំ G20 កាលពីចុងសប្ដាហ៍កន្លងមកនេះមក លោក Trump បានបង្ហាញពីឆន្ទៈនៅក្នុងការរៀបចំជំនួបលើកទី ២ របស់លោកជាមួយនឹងមេដឹកនាំកូរ៉េខាងជើងលោក Kim Jong Un។
នៅពេលធ្វើដំណើរមកកាន់សហរដ្ឋអាមេរិកវិញពីកិច្ចប្រជុំក្នុងប្រទេសអាហ្សង់ទីននេះ លោក Trump បាននិយាយថា ជំនួបលើកទី ២ របស់លោកជាមួយនឹងលោក Kim Jong Un អាចធ្វើឡើងនៅខែមករា ឬក៏ខែកុម្ភៈ ឆ្នាំក្រោយ ហើយទីតាំង ៣ កន្លែងត្រូវបានពិភាក្សាសម្រាប់ជំនួបនេះ។
អតីតមន្ត្រីអាមេរិក និងអ្នកវិភាគមួយចំនួន ដែលផ្ដោតលើកិច្ចការកូរ៉េខាងជើង បានអះអាងថា ការពិភាក្សាកម្រិតការងាររវាងរដ្ឋាភិបាលក្រុងវ៉ាស៊ីនតោន និងរដ្ឋាភិបាលក្រុងព្យុងយ៉ាងគួរធ្វើឡើងមុនពេលលោក Trump ជួបជាមួយនឹងលោក Kim Jong Un។ អតីតមន្ត្រីអាមេរិក និងអ្នកវិភាគទាំងនោះសង្កត់ធ្ងន់ថា ដំណើរវិវត្តនៃការលុបបំបាត់នុយក្លេអ៊ែរអាចចាប់ផ្ដើមពីការចរចាកម្រិតការងារ។
លោក Christopher Hill ដែលជាអ្នកចរចាចម្បងជាមួយនឹងកូរ៉េខាងជើងក្នុងរដ្ឋបាលអតីតប្រធានាធិបតី George W. Bush និយាយថា៖ «ខ្ញុំមិនយល់ថា ពួកគេនឹងពិភាក្សាអំពីអ្វីនោះទេ។ ប៉ុន្តែ ខ្ញុំគិតថា អ្វីដែលលោក Trump ព្យាយាមប្រាប់សារព័ត៌មាន និងអ្នកដទៃគឺថា មានការវិវត្តទៅមុខ ទោះបីជាខ្ញុំគិតថា អ្នកដទៃទៀតមិនឃើញការវិវត្តណាមួយក៏ដោយ។ ដូច្នេះ ខ្ញុំមិនយកចិត្តទុកដាក់ខ្លាំងក្លាលើអ្វីដែលលោក Trump បាននិយាយនោះទេ»។
លោក Bruce Klingner អតីតប្រធានផ្នែកកិច្ចការកូរ៉េនៃទីភ្នាក់ងារ CIA និងបច្ចុប្បន្នជាអ្នកស្រាវជ្រាវជាន់ខ្ពស់នៃអង្គការ Heritage Foundation និយាយដូច្នេះថា៖ «ការរៀបចំជំនួបលើកទី ២ ដោយគ្មានការវិវត្តពិតប្រាកដនៃការព្រមព្រៀងដ៏ទូលំទូលាយអំពីការលុបបំបាត់នុយក្លេអ៊ែររបស់កូរ៉េខាងជើង គឺពិតជារឿងខុសឆ្គងមួយ»៕
