សហរដ្ឋអាមេរិកនឹងដាក់ការរឹតត្បិតផ្នែកទិដ្ឋាការលើបុគ្គលិកមួយចំនួនរបស់ក្រុមហ៊ុនបច្ចេកវិទ្យាចិន រួមមានក្រុមហ៊ុន Huawei ដែលផ្តល់ការគាំទ្រខាងសម្ភារៈដល់របបដែលទាក់ទិនក្នុងការរំលោភសិទ្ធិមនុស្សនិងការរំលោភធ្វើបាបផ្សេងៗទៀតទូទាំងសាកលលោក។
កាលពីថ្ងៃពុធ លោក Mike Pompeo រដ្ឋមន្ត្រីការបរទេសសហរដ្ឋអាមេរិក បាននិយាយថា ក្រុមហ៊ុនទូរគមនាគមន៍នៅជុំវិញពិភពលោកក៏ត្រូវតែពិចារណាខ្លួនឯងអំពីការប្រកាសថា ប្រសិនបើពួកគេធ្វើពាណិជ្ជកម្មជាមួយក្រុមហ៊ុន Huawei គឺ «ពួកគេកំពុងធ្វើពាណិជ្ជកម្មជាមួយអ្នករំលោភសិទ្ធិមនុស្ស»។
ការប្រកាសនេះត្រូវបានគេមើលឃើញថា ជាចំណាត់ការថ្មីៗបំផុតដើម្បីដាក់ទណ្ឌកម្មការចោទប្រកាន់ពីការរំលោភសិទ្ធិមនុស្សរបស់គណបក្សកុម្មុយនិស្តចិនប្រឆាំងនឹងជនជាតិភាគតិចកាន់សាសនាឥស្លាមនៅក្នុងប្រទេសចិន។
លោករដ្ឋមន្ត្រីការបរទេសអាមេរិក Pompeo បាននិយាយនៅក្នុងសេចក្តីថ្លែងការណ៍ដាច់ដោយឡែកមួយថា «ក្រុមហ៊ុននានាដែលរងផលប៉ះពាល់ដោយចំណាត់ការនៅថ្ងៃនេះ រួមមានក្រុមហ៊ុន Huawei ជាអាវុធនៃ ការលួចស៊ើបការណ៍របស់គណបក្សកុម្មុយនិស្តចិនដែលពិនិត្យចាប់ពិរុទ្ធពួកប្រឆាំងនិងជួយប្រមូលផ្តុំមនុស្សដ៏ច្រើននៅក្នុងជំរំនៅខេត្តស៊ីនជាង។ តាមការពិត បុគ្គលិករបស់ក្រុមហ៊ុន Huawei បានផ្តល់ការជួយឧបត្ថម្ភខាងសម្ភារៈដល់របបគណបក្សកុម្មុយនិស្តចិនដែលបានប្រព្រឹត្តការរំលោភសិទ្ធិមនុស្ស»។
ក្រសួងការបរទេសសហរដ្ឋអាមេរិកមិនបានផ្តល់ឈ្មោះពិតប្រាកដរបស់បុគ្គលិកក្រុម ហ៊ុនបច្ចេកវិទ្យារបស់ចិនដែលរងផលប៉ះពាល់ដោយការរឹតត្បិតទិដ្ឋាការនោះទេ។
ចំណាត់ការរបស់សហរដ្ឋអាមេរិកក៏បានកើតមានឡើងមួយថ្ងៃ បន្ទាប់ពីរដ្ឋាភិបាលចក្រភពអង់គ្លេសបានប្រកាសថា ខ្លួននឹងហាមឃាត់ក្រុមហ៊ុន Huawei មិនឲ្យមានតួនាទីសំខាន់ក្នុងការអភិវឌ្ឍបណ្តាញទូស័ព្ទ 5G ជំនាន់ថ្មីនៅក្នុងចក្រភពអង់គ្លេស។
រដ្ឋាភិបាលក្រុងវ៉ាស៊ីនតោន បាននិយាយថា ក្រុមហ៊ុន Huawei អាចផ្តល់ឲ្យគណបក្សកុម្មុយនិស្តចិនតាម«ទ្វារក្រោយ»ដើម្បីធ្វើចារកម្ម។ ការអះអាងនេះបានត្រូវក្រុមហ៊ុន Huawei ច្រានចោល៕
