រដ្ឋបាលរបស់ប្រធានាធិបតីអាមេរិកលោក Donald Trump បានដាក់ទណ្ឌកម្មលើក្រុមហ៊ុនបច្ចេកវិទ្យាមួយរបស់រដ្ឋាភិបាលចិន ដោយចោទប្រកាន់ក្រុមហ៊ុននោះថាបានលួចបច្ចេកវិទ្យារបស់សហរដ្ឋអាមេរិក។
ទណ្ឌកម្មថ្មីនេះគឺកាត់ផ្ដាច់ការផ្គត់ផ្គង់ទៅឲ្យក្រុមហ៊ុន China's Fujian Jinhua Integrated Circuit ដែលជាក្រុមហ៊ុនផលិត semiconductor ដែលជាធាតុផ្សំអេឡិចត្រូនិក។
លោក Wilbur Ross រដ្ឋមន្ត្រីក្រសួងពាណិជ្ជកម្មសហរដ្ឋអាមេរិក បាននិយាយកាលពីថ្ងៃចន្ទម្សិលមិញថា៖ «នៅពេលណាដែលក្រុមហ៊ុនបរទេសមួយប្រឡូកនៅក្នុងសកម្មភាពដែលផ្ទុយនឹងផលប្រយោជន៍សន្តិសុខជាតិរបស់សហរដ្ឋអាមេរិក យើងនឹងចាត់វិធានការខ្លាំងក្លាដើម្បីការពារសន្តិសុខជាតិយើង។ ការបញ្ចូលក្រុមហ៊ុន Jinhua នេះ ទៅក្នុងបញ្ជីអង្គភាពបរទេសដែលត្រូវបានហាមឃាត់ នឹងដាក់កំហិតដល់ក្រុមហ៊ុននេះមិនឲ្យមានលទ្ធភាពគំរាមកំហែងដល់ខ្សែសង្វាក់ផ្គត់ផ្គង់សម្រាប់ផ្នែកសំខាន់ៗនានានៅក្នុងប្រព័ន្ធយោធារបស់យើង»។
ក្រុមហ៊ុនអាមេរិកណាដែលចង់ធ្វើពាណិជ្ជកម្មជាមួយនឹងក្រុមហ៊ុនដែលមានឈ្មោះនៅក្នុងបញ្ជីអង្គភាពបរទេសដែលត្រូវបានហាមឃាត់នេះ ចាំបាច់តម្រូវឲ្យមានប័ណ្ណអនុញ្ញាតពីមន្ត្រីអាមេរិក។
សេតវិមានមានការព្រួយបារម្ភថា ប្រទេសចិនអាចបញ្ចេញលក់បន្ទះ Chip កុំព្យូទ័រដែលមានតម្លៃថោកនៅពាសពេញទីផ្សារសាកលលោក និងធ្វើឲ្យក្រុមហ៊ុនអាមេរិកាំងដែលផ្គត់ផ្គង់ដល់ផ្នែកយោធា និងផ្នែកផ្សេងៗទៀតគ្មានទីផ្សារ។
កន្លងមក សហរដ្ឋអាមេរិកស្ទើរតែធ្វើឲ្យក្រុមហ៊ុនទូរគមនាគមន៍ ZTE របស់ចិន គ្មានទីផ្សារ នៅពេលដែលសហរដ្ឋអាមេរិកដាក់ទណ្ឌកម្មលើក្រុមហ៊ុននេះ ដោយសារតែក្រុមហ៊ុននេះលក់ទំនិញដែលមានគ្រឿងផលិតនៅសហរដ្ឋអាមេរិកទៅឲ្យប្រទេសអ៊ីរ៉ង់ និងកូរ៉េខាងជើង៕
