ពួកសភាតំណាងរាស្ត្រសហរដ្ឋអាមេរិកមានគម្រោងបោះឆ្នោតនៅថ្ងៃពុធនេះស្តីពីវិធានការដើម្បីរក្សាក្រុមគ្រួសារឲ្យនៅជុំគ្នានៅពេលដែលពួកគេត្រូវបានចាប់ខ្លួននៅពេលដែលចូលក្នុងសហរដ្ឋអាមេរិកខុសច្បាប់នៅតាមបណ្តោយព្រំដែនជាមួយប្រទេសម៉ិកស៊ិក ក៏ប៉ុន្តែជោគវាសនារបស់ពួកគេនៅមានភាពមិនប្រាកដប្រជា។
ពួកគណបក្សសាធារណរដ្ឋដែលមានសំឡេងភាគច្រើននៅក្នុងសភាតំណាងរាស្ត្រមិនអាចឈោងដល់ការមូលមតិគ្នា ក៏ប៉ុន្តែបានបោះបង់ចោលការប៉ុនប៉ងដើម្បីផ្លាស់ប្តូរគោលនយោបាយជនអន្តោប្រវេសន៍សហរដ្ឋអាមេរិក។
ក៏ប៉ុន្តែ ពួកគណបក្សសាធារណរដ្ឋកំពុងធ្វើការលើសេចក្តីព្រាងច្បាប់ដែលមានទំហំតូចជាងមុនដើម្បីឲ្យក្លាយទៅជាច្បាប់បន្ទាប់ពីការសម្រេចរបស់ប្រធានាធិបតីត្រាំកាលពីសប្តាហ៍មុនដើម្បីបញ្ចប់ការបំបែកកូនក្មេងចេញពីឪពុកម្តាយរបស់ខ្លួនខណៈដែលពួកគេរង់ចាំសវនាការតុលាការស្តីពីការដាក់ពាក្យសុំសិទ្ធិជ្រកកោននៅក្នុងសហរដ្ឋអាមេរិក។
លោក Paul Ryan ប្រធានសភាតំណារាស្ត្របាននិយាយថា «យើងបានធ្វើការបញ្ជាក់យ៉ាងច្បាស់ថា យើងចង់រក្សាក្រុមគ្រួសារឲ្យនៅជុំគ្នាហើយយើងចង់ការពារព្រំដែននិងពង្រឹងច្បាប់របស់យើង។យើងអាចកិច្ចការទាំងអស់នេះហើយនេះជាច្បាប់ដែលយើងកំពុងគាំទ្រនិងកំពុងស្នើ»។
ប្រធានាធិបតីត្រាំបានប្រាប់សមាជិកសភានៅសេតវិមានថា លោកចង់បានថវិកាកាន់តែច្រើនឡើងសម្រាប់របងនៅតាមបណ្តោយព្រំដែនជាមួយប្រទេសម៉ិកស៊ិកដែលលើសពីចំនួន១ពាន់៦រយលានដុល្លារដើម្បីយើងអាចបញ្ចប់របងនោះឲ្យបានឆាប់រហ័សដើម្បីទប់ការហូរចូលជនចំណាកស្រុកខុសច្បាប់៕
