ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

រដ្ឋមន្ត្រី​ក្រសួង​យុត្តិធម៌​អាមេរិក​ថា ឪពុក​ម្ដាយ និង​កូន​ពួកគេ​ដែល​ចូល​មក​ក្នុង​សហរដ្ឋ​អាមេរិក​ខុស​ច្បាប់​នឹង​ត្រូវ​បំបែក​ចេញ​ពី​គ្នា


លោក​រដ្ឋមន្ត្រី​យុត្តិធម៌ Jeff Sessions ថ្លែង​នៅ​ក្នុង​សន្និសីទ​កាសែត​មួយ​នៅ​ក្បែរ​ព្រំដែន​ជាមួយ​នឹង​ក្រុង Tijuana ប្រទេស​ម៉ិកស៊ិក កាលពី​ថ្ងៃទី៧ ខែឧសភា ឆ្នាំ២០១៨។
លោក​រដ្ឋមន្ត្រី​យុត្តិធម៌ Jeff Sessions ថ្លែង​នៅ​ក្នុង​សន្និសីទ​កាសែត​មួយ​នៅ​ក្បែរ​ព្រំដែន​ជាមួយ​នឹង​ក្រុង Tijuana ប្រទេស​ម៉ិកស៊ិក កាលពី​ថ្ងៃទី៧ ខែឧសភា ឆ្នាំ២០១៨។

រដ្ឋាភិបាល​សហរដ្ឋ​អាមេរិក​នឹង​បង្កើន​ការ​ជំនុំជម្រះ​ព្រហ្មទណ្ឌ​លើ​ឪពុក​ម្ដាយ​ណា​ដែល​ចូល​មក​ក្នុង​សហរដ្ឋ​អាមេរិក​ដោយ​ខុស​ច្បាប់ និង​ផ្ដាច់​អ្នក​ទាំង​នោះ​ចេញ​ពី​កូនៗ​របស់​ពួកគេ ដើម្បី​ព្យាយាម​ធ្វើ​យ៉ាង​ណា​កុំ​ឲ្យ​មាន​ការ​ឆ្លង​ដែន​ចូល​មក​ក្នុង​សហរដ្ឋ​អាមេរិក​កាន់តែ​ច្រើន។

រដ្ឋមន្ត្រី​ក្រសួង​យុត្តិធម៌​សហរដ្ឋ​អាមេរិក​លោក Jeff Sessions បាន​និយាយ​កាល​ពី​ថ្ងៃ​ចន្ទ​ម្សិលមិញ​នៅ​ក្នុង​សន្និសីទ​ស្ដី​ពី​ការ​អនុវត្ត​ច្បាប់​នៅ​ក្នុង​ទីក្រុង Scottsdale រដ្ឋ Arizona ថា៖ «ប្រសិនបើ​អ្នក​នាំ​កូន​របស់​អ្នក​ចូល​មក​ក្នុង​សហរដ្ឋ​អាមេរិក​ដោយ​ខុស​ច្បាប់ យើង​នឹង​កាត់​ទោស​អ្នក ហើយ​កូន​របស់​អ្នក​នឹង​ត្រូវ​បំបែក​ចេញ​ពី​អ្នក ដូច​ដែល​ច្បាប់​បាន​ចែង។ ប្រសិនបើ​អ្នក​មិន​ចង់​ដូច្នេះ​ទេ អ្នក​មិន​ត្រូវ​នាំ​កូន​របស់​អ្នក​ឆ្លង​ព្រំដែន​ដោយ​ខុស​ច្បាប់​ចូល​មក​ក្នុង​សហរដ្ឋ​អាមេរិក​នោះ​ទេ»។

លោក Sessions បាន​និយាយ​ថា ក្រសួង​សន្តិសុខ​មាតុភូមិ​នឹង​ចាប់ផ្ដើម​បញ្ជូន​ករណី​ដូច​នេះ​ទៅ​កាន់​ក្រសួង​យុត្តិធម៌​ដើម្បី​កាត់​ទោស ហើយ​រដ្ឋអាជ្ញា​សហព័ន្ធ​នឹង «ចាត់​វិធានការ​លើ​រឿង​ទាំង​នេះ​ក្នុង​លក្ខណៈ​មនុស្ស​ធម៌​ឲ្យ​បាន​កាន់តែ​ច្រើន​រហូត​ទាល់តែ​សម្រេច​បាន ១ រយ​ភាគរយ»។

មនុស្ស​ពេញ​វ័យ​ណា​ដែល​រង​ការ​ចោទ​ប្រកាន់​ថា​បាន​ចូល​មក​ក្នុង​សហរដ្ឋ​អាមេរិក​ដោយ​ខុស​ច្បាប់​នឹង​ត្រូវ​ប្រគល់​ជូន​នាយកដ្ឋាន​ប៉ូលិស​នៃ​ក្រសួង​យុត្តិធម៌ ដើម្បី​បញ្ជូន​ចេញ​ដោយ​ផ្ទាល់​ទៅ​កាន់​តុលាការ​សហព័ន្ធ។ ចំណែក​ឯ​កូនៗ​របស់​ពួកគេ​វិញ​នឹង​ត្រូវ​បញ្ជូន​ទៅ​ការិយាល័យ​ដោះស្រាយ​បញ្ហា​ជន​ភៀស​ខ្លួន នៃ​ក្រសួង​សុខាភិបាល និង​សេវា​ប្រជាពលរដ្ឋ ដែល​ការិយាល័យ​នេះ​នឹង​បញ្ជូន​ក្មេងៗ​ទាំង​នេះ​ទៅ​ឲ្យ​សាច់ញាតិ​របស់​ពួកគេ​នៅ​ក្នុង​សហរដ្ឋ​អាមេរិក ឬ​ក៏​បញ្ជូន​ទៅ​កាន់​កន្លែង​ស្នាក់នៅ​បណ្ដោះអាសន្ន​ដែល​គ្រប់គ្រង​ដោយ​អង្គការ​ឯកជន​នានា។

លោក Sessions ក៏​បាន​ប្រកាស​ផង​ដែរ​អំពី​គោល​បំណង​របស់​ក្រសួង​យុត្តិធម៌​នៅ​ក្នុង​ការ​ជំនុំជម្រះ​ព្រហ្មទណ្ឌ​ចំពោះ​ជន​អន្តោប្រវេសន៍​ណា​ដែល​ឆ្លង​ព្រំដែន​ខុស​ច្បាប់​ចូល​មក​ក្នុង​សហរដ្ឋ​អាមេរិក៕

XS
SM
MD
LG