គណៈកម្មាធិការរដ្ឋសភាសហរដ្ឋអាមេរិក នៅថ្ងៃអង្គារនេះ នឹងពិចារណាថាតើត្រូវចេញបទបញ្ជាមួយទៅរដ្ឋមន្ត្រីក្រសួងយុត្តិធម៌លោក William Barr និងរដ្ឋមន្ត្រីក្រសួងពាណិជ្ជកម្មលោក Wilbur Ross ដើម្បីស្នើរកឯកសារនានាពាក់ព័ន្ធនឹងការសម្រេចរបស់រដ្ឋបាលលោក Trump ក្នុងការដាក់សំណួរបន្ថែមទៀតនៅក្នុងជំរឿនពលរដ្ឋឆ្នាំ ២០២០ របស់សហរដ្ឋអាមេរិកឬយ៉ាងណា។
លោក Ross បាននិយាយថា ការសម្រេចចិត្តរបស់លោកកាលពីឆ្នាំមុន គឺផ្អែកលើសំណើមកពីក្រសួងយុត្តិធម៌ ដើម្បីពង្រឹងច្បាប់សិទ្ធិបោះឆ្នោតឲ្យកាន់តែប្រសើរ។ ប៉ុន្តែរដ្ឋមួយចំនួន និងក្រុមការពារសិទ្ធិមនុស្សបានជំទាស់ទៅនឹងការសម្រេចនេះ ហើយបានលើកឡើងថា ការសម្រេចនេះនឹងធ្វើឲ្យជនអន្តោប្រវេសន៍មិនចង់ចូលរួមនៅក្នុងជំរឿន ហើយជាលទ្ធផលគឺនឹងរាប់ឃើញចំនួនមនុស្សតិចរស់នៅតាមតំបន់មួយចំនួន នៅក្នុងប្រទេស។
ការធ្វើជំរឿន គឺមានគោលបំណងរាប់បញ្ជូលមនុស្សគ្រប់រូបនៅក្នុងសហរដ្ឋអាមេរិកនៅក្នុងពេលណាមួយជាមួយគ្នា មិនថាពួកគេមានសញ្ជាតិអ្វី ឬមានស្ថានភាពអន្តោប្រវេសន៍បែបណានោះទេ។
ការរាប់ចំនួនមនុស្សឲ្យបានត្រឹមត្រូវគឺមានសារៈសំខាន់ ពីព្រោះថាលទ្ធផលជំរឿននឹងត្រូវយកទៅប្រើប្រាស់ក្នុងគោលបំណងផ្សេងៗទៀត ដូចជាកំណត់ពីចំនួនតំណាងរាស្ត្រនៅតាមរដ្ឋនីមួយៗ បែងចែកថវិកាចំណាយរបស់សហព័ន្ធ និងអំពីការសម្រេចនានារបស់អាជ្ញាធរមូលដ្ឋាន នៅក្នុងការសាងសង់សាលារៀន និងផ្លូវថ្នល់ថ្មីៗ នៅតាមតំបន់នានាជាដើម។
គណៈកម្មាធិការត្រួតពិនិត្យនៃសភាកំពុងពិភាក្សាលើសេចក្តីសម្រេចមួយមកពីប្រធានគណៈកម្មាធិការលោក Elijah Cummings ខាងគណបក្សប្រជាធិបតេយ្យប្រចាំរដ្ឋ Maryland ដើម្បីចេញបទបញ្ជាមួយស្វែងរកឯកសារ និងសារទំនាក់ទំនងរបស់លោក Barr និងលោក Ross អំពីសំណើបន្ថែមសំណួរជំរឿននៅអំឡុងពេលឆ្នាំទីមួយនៃការកាន់តំណែងប្រធានាធិបតីរបស់លោក Trump ៕
