តំណាងរាស្ត្រអាមេរិកកាលពីថ្ងៃពុធម្សិលមិញបានអនុម័តបង្កើតគណៈកម្មការឯករាជ្យមួយដើម្បីស៊ើបអង្កេតការបះបោរនៅវិមានសភាកាលពីថ្ងៃទី៦ខែមករានៅពេលអ្នកគាំទ្រលោកអតីតប្រធានាធិបតី Donald Trumpព្យាយាមរារាំងមិនឲ្យសមាជិកសភាបញ្ជាក់ថាលោកចាញ់លោកJoe Biden ខាងគណបក្សប្រជាធិបតេយ្យក្នុងការបោះឆ្នោតកាលពីខែវិច្ឆិកា។
រដ្ឋសភាដែលគ្រប់គ្រងដោយគណបក្សប្រជាធិបតេយ្យចូលរួមដោយអ្នកសាធារណរដ្ឋ៣៥រូបបានបោះឆ្នោតដោយមានសំឡេង២៥២ ទល់នឹង១៧៥ដើម្បីបង្កើតគណៈកម្មការនេះដែលស្រដៀងនឹងគណៈកម្មការស៊ើបអង្កេតការវាយប្រហារសហរដ្ឋអាមេរិកដោយក្រុមភេរវកម្មអាល់កៃដាកាលពីឆ្នាំ២០០១។
ប៉ុន្តែអនាគតនីតិកម្មនេះនៅមិនប្រាកដនៅឡើយនៅក្នុងព្រឹទ្ធសភាដែលបែកខ្ញែកគ្នាផ្នែកនយោបាយ។ លោក Mitch McConnell មេដឹកនាំគណបក្សសាធារណរដ្ឋនៅក្នុងព្រឹទ្ធសភាកាលពីថ្ងៃពុធបាននិយាយថា លោកប្រឆាំងគណៈកម្មការនេះគឺមួយថ្ងៃបន្ទាប់ពីលោកបាននិយាយថា លោកបើកចំហចំពោះគំនិតនេះ។ គណបក្សប្រជាធិបតេយ្យត្រូវទទួលបានសំឡេងគាំទ្រពីគណបក្សសាធារណរដ្ឋយ៉ាងតិច១០នាក់ក្នុងព្រឹទ្ធសភាដើម្បីបង្កើតគណៈកម្មការនេះ។
សមាជិកសភាគណបក្សសាធារណរដ្ឋរាប់សិបនាក់ដែលភាគច្រើនស្មោះត្រង់នឹងលោក Trump បានសម្តែងការប្រឆាំងនឹងការបង្កើតគណៈកម្មាធិការនេះដែលជៀសមិនរួចនឹងបង្ហាញពីតួនាទីរបស់លោកទាក់ទងនឹងព្រឹត្តិការណ៍ថ្ងៃទី ៦ ខែមករា នៅការជួបជុំនៅខាងក្រៅសេតវិមានមួយម៉ោងមុនភាពវឹកវរនៅសភា៕
