អ្នកទោសម្នាក់ក្នុងចំណោមអ្នកទោសពីរនាក់ដែលបានរត់គេចចេញពីគុកមួយនៅក្នុងរដ្ឋ ញូវយ៉ក នៃសហរដ្ឋអាមេរិក កំពុងស្ថិតនៅក្នុងមន្ទីពេទ្យនៅឡើយនៅថ្ងៃច័ន្ទនេះ មួយថ្ងៃបន្ទាប់ពីត្រូវបានបាញ់ និងនាំមកគុកវិញដោយភ្នាកងារប៉ូលីស។
មន្ត្រីពេទ្យម្នាក់និយាយកាលពីល្ងាចថ្ងៃអាទិត្យថា អ្នកទោស David Sweat ស្ថិតក្នុងស្ថានភាពធ្ងន់ធ្ងរ។
គាត់បានចំណាយរយៈពេល ២៣ថ្ងៃ គេចខ្លួនពីអាជ្ញាធរបន្ទាប់ពីរត់ចេញពីគុកដែលមានការការពារសន្តិសុខដ៏តឹងរ៉ឹងបំផុត ជាមួយនឹងអ្នកទោស Richard Matt ដែលបានស្លាប់កាលពីថ្ងៃសុក្របន្ទាប់ពីត្រូវបានបាញ់ដោយភ្នាក់ងាររបស់សហព័ន្ធ។ Sweat ត្រូវបានចាប់ខ្លួននៅទីក្រុង Constable នៃរដ្ឋ ញូវយ៉ក ដែលស្ថិតនៅចម្ងាយ ៣០គីឡូម៉ែត្រពីកន្លែងដែលគាត់រត់គេចខ្លួនពីគុក និងស្ថិតនៅចម្ងាយ ៣គីឡូម៉ែត្រពីព្រំប្រទល់ជាមួយប្រទេសកាណាដា៕
